Jab bhi baat Underworld ki aati hai toh usme Dawood Ibrahim ka naam humesha aata hai. Dawood Ibrahim ek aisa naam hai jiske kehne maatra se hi Mumbai ka commissioner tak badal diya jaata hai. Dawood Ibrahim Kaskar(कास्कर) ka janam 26 dec 1955 ko, Maharashtra ke Ratnagiri me hua tha. Dawood Ibrahim ke maata pita bahut hi seedhe saadhe insaan the. Dawood ke pita Sheikh Ibrahim, Mumbai police ke head constable ke pad pe the. Dawood ko bachpan me hi alcohol ki aadat lag gayi, jis wajah se jab usse iss kaam ke liye ghar se paise nahi milte the toh woh chori, loot aur drug supply jaise crime ko anjaam dene laga. Dawood ka mann kabhi bhi padhai me nahi laga. Usne apni buri aadaton ki wajah se apni padhai beech me hi chod di. Dawood ke pariwaar uski iss aadat se pareshaan the. issi wajah se unhone Dawood ki shaadi Zubina Zareen se karwa di. Halanki Dawood ki buri aadatein nahi ruki.
Dawood apne shuruati dino me bahut gareeb ho gaya tha. Jis Dawood ko log aaj sabse ameer terrorist ke roop me dekh rahe hai, woh ek wakt pe itna gareeb tha ki ek roti tak nahi afford kar sakta tha. Waise toh Dawood ke pita naukri karte the lekin woh itna nahi kama paate the ki unhe har din accha khaana mil sake. issi wajah se Dawood ne crime ki duniya me aane ki sochi. Dawood Ibrahim ne apna bachpan Karim Lala, Haji Mastan jaise Don ko dekh kar guzara hai. Dawood kyunki inn logon se prabhavit tha. issi wajah se woh aage jaakar Karim Lala ke group me shaamil ho gaya lekin iske baad, Dawood ne apne bhai ke saath milkar apni alag gang bana li. 1980 tak Dawood ne apna naam Mumbai ke Underworld ki duniya me sabse upar me bana liya tha. Issi wajah se Dawood ki pahuch ab Bollywood industry se lekar gambling ki duniya tak pahuch gayi thi. Dawood ka aatank 80 ke dashak me itna badh gaya tha ki woh ab logon ko dhamka kar फिरौती lene laga tha. Uski iss kaam ki wajah se woh Mumbai police ke nishaane pe aa gaya, jis wajah se usse kayi baar jail bhi jaana pada tha lekin woh har baar bach jaata tha aur har baar jail se nikal kar ek naye crime ko anjaam deta tha. Mumbai ke log Dawood ke aatank se khauf me the. Mumbai police usse pakarne ke peeche kaafi dino se thi lekin woh unhe chakma dekar Dubai bhaag gaya. Issi dauran uski mulakaat dusre Don se hui jiska naam Chote Rajan tha. Dono ne milakar Bharat ke baahar se crime ko anjaam diya. Dawood videsh me baith kar kayi aatanki samuh, aur apni gang ki madad se Bharat me kayi crime ko anjaam deta raha. 12 March 1993 ko Mumbai me kayi jagah bhaari bomb dhamake huye jisme 257 logon ne jaha apni jaan gawayi, wahi 700 se jyada log iss dhamake se ghaayal ho gaye. Jaanch ke baad iss dhamake me Dawood ka naam mastermind ke roop me ubhara, jiske baad woh Underworld ka sabse bada aur India ka most wanted Don bana gaya. Halanki iss dhamake ke baad Chote Rajan aur Dawood ki dosti me daraar pad gayi aur dono ki dosti bhaari dushmani me badal gayi, jiske baad dono alag ho gaye. Dawood Pakistan ke Karachi chala gaya jaha reh kar usne Bharat me apne jurm jaari rakhe. Iske baad Bharat ki khufiya Agency ne Dawood ko uski beti Mahrukh(महरुख) ki shaadi me usse maarne ka plan banaya lekin khabar leak hone ki wajah se woh bach gaya. Wahi samay-samay par Bharat me Dawood ko laane ki maang uthti rahi aur iss wajah se Bharat, Pakistan pe dabaav banata raha lekin Dawood bhi apne thikaane ko lagataar badalta raha jis wajah se woh aaj tak Bharat ke pakar me nahi aa paaya hai. Dawood ne kayi baar apne naam aur pehchaan badle hai aur iske baad crime ko anjaam diya hai. Dawood ko lekar kaha jaata hai ki woh police se bachne ke liye kayi baar apne chehare ki surgery bhi karwa chuka hai. Dawood ke paas 4 passport hai. Kaha jaata hai ki Dawood ki pakar aatanki group “Lashkar-ye-Taiba” se bhi hai. iske alawa yeh bhi kaha jaata hai ki Dawood aatanki Osama bin laden ko bhi jaanta tha. Dawood atanki samuh ko khaane peene ki cheezen pahuchaane ke alawa unhe financially bhi madad karta hai. 2003 me Dawood ko India aur USA dwara ek global terrorist ghoshit kar diya gaya hai.
Toh Darshakon yeh thi Bharat ke most wanted Don Dawood Ibrahim ki kahani. Agar aapko yeh blog pasand aaya toh isse like karna naa bhule dhanyawaad.
