June 2013, kahani ki shuruaat hoti hai Jammu & Kashmir ke Pulawama district ke Yachu Guchan gaon se. Subah ka waqt hota hai or gaon mein kaafi Shanti hoti hai, lekin tabhi AK-47 rifle ke firing ki awaaj se gaon ki shanti bhang ho jaati hai. Hum dekhte hai ek aatanki Indian Army ke soldiers ke upar firing karte huye chupne ki jagah dhoondh raha hota hai. Ye aatanki koi mamooli aatanki nhi balki Jaish-E-Muhammad ka khoonkhar aatankwadi Altaf Baba ( Puru Raj Kumar ) tha. Kashmir ke most wanted aatankiyon mein se ek Altaf level A ka target tha, jiska pakda Jana Indian Army ke liye kaafi faaydemand saabit hone wala tha. Altaf ne Jaish-E-Muhammad or Hijbul Mujahideen ke beech network establish karke na jaane ab tak kitne aatankwadiyon ko Kashmir ghati ke andar la chuka tha. Lekin aaj ye aatanki Indian Army ke haathon mein aa chuka tha, Indian Army ne Altaf ko chaaron taraf se gher liya tha. Seb ke baag mein chupe Altaf ke pass ab bhaagne ke liye koi rasta nhi bacha tha, isliye vo firse firing karne lagta hai. Kuch der firing karne ke baad Altaf ko ahsaas hota hai ki ab uske pass sirf ek magzine bachi hai. AK-47 ki ek magzine mein 7.62 mm ke jyada se jyada 30 rounds hi aa sakte the, Altaf apni last magzine apni rifle mein attach karta hai or firing karne lagta hai. Tabhi hum dekhte hai ki Indian Army ka ek Major Altaf ki rifle se fire ho rahi goliyon ko gin ne lagt hai 30,29,28,27,26,… ,16, 15. Apni aadhi magzine khaali karne ke baad Altaf ab bachi hui goliyon ko ruk ruk kar fire kar raha tha, vahi vo Major abhi bhi Altaf ki rifle se fire ho rahi goliyon ko gin raha tha 5,4,3,2,1. Jaise hi Altaf ki rifle se last round fire hota hai, vaise hi Indian Army ka ye major us baag ki taraf bhaagna shuru kar deta hai. Iss Major ka saathi Sipahi peeche se cover fire de raha hota hai. 2 minutes ke baad baag mein do goliyaan fire hone ki awaaj aati hai, jiske baad hum Major ko dekhte hai jo radio par apne Commanding Officer ko apne iss operation ke successful hone ki soochna de raha hota hai. Altaf ko maarne wale Indian Army ki 44 Rashtriya Rifles ke iss officer ka naam tha Major Mukund Varadarajan ( Booby Deol ). Major Mukund Varadarajan Indian Army ke one of the finest officers mein se ek the. Unhone saal 2006 mein Officers Training Academy se pass out hokar Indian Army ki Rajput Regiment ki 22nd battalion ko as a Lieutenant join Kiya tha. Major Mukund United Nations Mission ke tehat Lebanon mein bhi apni services de chuke hai. Saal 2012 mein Major Mukund ko Rashtriya Rifles ki 44th battalion ke saath joda jata hai, or unhe Kashmir ke Shupiyan district mein post kar diya jata hai.
Altaf ke encounter ke baad Major Mukund ka naam poori Kashmir ghati mein kaafi famous ho jaata hai, har koi unki goliyon ko gin ne wali technique ke baare mein baat kar raha hota hai. Altaf ke encounter ke baad uski checking karne par Indian Army ko uske pass se kai saare phone numbers or matrix code baramad huye the. Major Mukund in Matrix codes ko crack karne ke liye Srinagar mein sthith Indian Army ki Electronic Warfare unit ke pass le jaate hai. Teen mahine tak mehnat karne ke baad aakhirkaar in matrix codes crack kar liye jaata hai, in codes ke andar bohot saari important information bhari padi thi . Ye codes aatankiyon ke aane ke routes or un sleeper cells ka khulasha karte hai, jo Seema paar se aane wale aatankiyon ko suraksha or doosri cheeje provide karte the. In sab information ke beech mojood tha Shopia ke Qazipathri gaon ka map, iss map mein un sabhi gaon ki jankari di hui thi jinka istemaal seema paar se aane wale aatankiyon ke rukne ke liye kiya jaata tha. Iss jaankari ke according aatanki Line Of Control cross karke Yarwan ke jungle ke raaste Qazipathri gaon mein aate the, or kuch din in gharo mein bitaane ke baad apne apne raaste nikal jaate the. Major Mukund apne Commanding Officer Colonel Amit Singh Dabas ( Sudesh Berry ) ko iss baare mein brief karte hai, or unhe batate hai ki unhone in sabhi gharo par najar rakhna shuru kar diya hai.
Qazipathri gaon ke un gharo par najar rakhte huye 44 RR ko 7 mahine ho chuke the. Hum dekhte hai ki 25 April 2015 ke din Major Mukund Varadarajan mess mein lunch karne hi Jaa rahe hote hai, ki tabhi unke phone par unke ek khabri ka call aata hai. Vo khabri Major Mukund ko soochna deta hai ki Jaish-E-Muhammad ka naya commander Altaf Wani ( Mir Sarwar ) Qazipathri gaon ke ek ghar mein chupa hua hai. Bilkul bhi der na karte huye Major Mukund apni team ko ready hone ke liye kehte hai, or turant hi Colonel Amit ko call karke Altaf ke Qazipathri gaon mein chupe hone ki khabar ke baare mein batate hai. Major Mukund Colonel Amit ko ye soochna dene ke baad apni Quick Response Team ke saath Qazipathri gaon ke taraf nikal padte hai. Altaf Baba ke maare jaane ke baad hi Altaf Wani ko Kashmir ghaati mein Jaish-E-Muhammad ka naya divisional commander banaya gaya tha, taaki vo apne Kashmir ghaati mein dehsat faila sake. Din ke 3 baje tak Major Mukund Varadarajan apni QRT team ke saath Qazipathri gaon pahuch jaate hai. Qazipathri gaon mein andar ghuste huye Major Mukund apni QRT team ke saath 6-6 ke pairs mein divide ho jaate hai, or us double story building ko gher lete hai jisme Altaf Wani ke hone ki khabar mili thi. Iske baad Major Mukund Varadarajan sabse pehle apne aadmiyon ko iss ilaake mein rehne wale civilians ko surakshit jahag par le jaane ka order dete hai, taaki kisi bhi civilian ki jaan ko khatra na ho. Jis ghar mein Altaf Wani ke hone ki khabar thi vo Ghar poore gaon ka sabse bada ghar tha. Vo Ghar ek bade se compound mein bna hua tha jisme ek bageecha or do outhouse bhi Bane huye the.
Major Mukund ki team ke snipers apni sniper rifles ke saath pados ke gharo ki chha par apni apni positions le lete hai. Major Mukund apni team ke saath operation ki planning karne lagte hai, tabhi unhe khabar milti hai ki Altaf Wani akela nhi hai uske saath Lashkar-e-Taiyaba ke do or aatanki mojood hai. Major Mukund radio par Altaf Wani ke sath do or aatankiyon ke hone ki khabar Colonel Amit ko batate hai. Lekin isse pehle ki Colonel Amit kuch bol paate poore gaon mein goliyon ki awaaj goonjne lagti hai. Aatankiyon ki taraf se Golibaari itni tej ho rahi thi ki Colonel Amit ko goliyon ki awaaj sunne ke liye radio ki koii jarurat nhi thi, unhe apne base camp se hi goliyan fire hone ki awaaj sunai de Rahi thi. Goliyin ki awaaj sunte hi Colonel Amit base camp se or bhi jyada soldiers ko Qazipathri gaon ke liye ravana kar dete hai. Major Mukund Varadarajan jaldi se apni team se position lene ke liye kehte hai, or isi ke saath Major Mukund aur aatankiyon ke beech ek kaafi khatarnaak or jabardast fire fight shuru ho jaati hai. Ye aatanki ek double story building mein chupe huye the, jo ki us area ki sabse unchi jagah bhi thi. Jis vajah se aatanki Major Mukund aur unki team ke mukaable kaafi achii position mein the. Vo aatankwadi Major Mukund aur unki team ko asaani se target kar sakte the, isliye Major Mukund apni team ke soldiers ko cover lete huye aatankiyon par counter firing karne ke orders dete hai. Isi ke saath Major Mukund apne soldiers ko ye bhi order dete hai ki koi bhi ghar ke andar grenade nhi fenkega, kyunki ho skta hai us ghar ke andar civilians bhi mojood ho.
Kya Major Mukund Varadarajan Altaf Wani ko maar paayenge ? Kya Altaf Wani bach kar nikal jaayega Major Mukund ke changul se Jaanenge iss blog ke agle part mein.
