Agar aap U.P se taaluk rakhte hai toh aapne Munna Bajrangi ka naam toh jarur hi suna hoga. Ek aisa gangster, jo politician bhi tha aur bada criminal bhi. Munna Bajrangi ko lekar kaha jaata hai ki woh ek baar, apne upar 11 goli lagne ke bawajood bhi usne apne saans ko rokar, apni bacha li thi. Munna Bajrangi ka asli naam Prem Prakash Singh hai, jiska janam 2 June 1967 ko Jaunpur, U.P me hua tha. Munna Bajrangi U.P ka famous politician, contract killer aur gang leader tha. Munna Bajrangi ka criminal career poore do dashak tak chala, jisme Munna pe Murder, murder karne ka pryaas aur vasooli jaise kayi aarop lage the.
Uttar Pradesh ki dharti pe sirf do hi aadmi ne AK-47 chalane ki himmat dikhayi thi, pehla tha gangster Shri Prakash Shukla aur dusra tha Munna Bajrangi. 2009 me Munna Bajrangi ko jail ki saza sunayi gayi thi, kyunki Munna ka naam MLA Krishnanand Rai aur BJP leader Ramchandra Singh ke murder me shaamil tha. Kayi saalon tak Munna Samajwadi party ka supporter raha, halanki 2000s ke shuruat me Munna apna dal badal kar, BSP yaani ki “Bahujan Samaj Party” ka support karne laga. 2012 Munna, Tihar Jail me reh kar “Apna Dal” aur “Peace Party of India” ke taraf se election me khada hua tha.
Munna Bajrangi peshe se ek Carpet weaver tha, jisne 17 saal ki umar me pehla murder kiya. Iske baad Munna U.P ke ek Crime gang me shaamil ho gaya, jise Gajraj Singh naam ka criminal operate karta tha. Munna uss zamane ka tha, jaha pe bade-bade gangsters, politician ban rahe the. chahe woh Raja Bhaiya ho ya phir Brijbushan Singh, saare gangsters politics me apni ruchi dikaane lag chuke the aur inhi me se ek Prem Prakash Singh aka Munna Bajrangi bhi tha. Munna ,Gajraj singh ke baad criminal-politician Mukhtar Ansari ke gang me shaamil ho gaya. U.P me 1990 ke dauran, Samajwadi Party power me thi aur ussi dauran criminal gangs bahut safalta haasil kar rahe the. 1996 me Mukhtar Ansari U.P ke Mau se elect hua, jiske baad Mukhtar ke gang members, jinke paas AK-47 aur dusre hathiyaar the, woh bhi U.P ke Mau, Jaunpur, Gazipur aur Varanasi jaise illakon ke bade naam ban gaye. Mukhtar ka gang political madad se government contract leta tha, jinse unki acchi-khaasi kamayi ho jaati thi, Jaise ki koi zameen ka contract leleta tha toh koi रेत(sand) ka. Aage chal kar Mukhtar ke gang ka Brijesh Singh se kisi baat ko lekar jhagda ho gaya. Brijesh bhi naami gang-lord tha, jo BJP ke neta Krishnanand Rai ke saath milkar kaam karta tha. 2001 me Brijesh Sing ke gang ne घात लगाकर Mukhtar ke gang pe हमला किया(ambushed). Yeh humla Mau-Lucknow Highway pe hua, jisme dono gang ke 3 log maare gaye. Munna Bajrangi bhi Mukhtar ke hi gang me shaamil tha aur uske power pe apna naam kama raha tha. 2002 ke election me Mukhtar ke bhai Afzal ki election me haar ho gayi. Afzal ki Mohammadabad se pichli 5 election me jeet haasil hui thi, halanki 2002 me woh Mukhtar ka rival aur BJP neta, Krishnanand Rai se haar gaya. 2005 me Rai apne 6 aadmiyon ke saath gaadi se safar kar rahe the, jab unpe 7 gangsters ne milkar humla kar diya. Iss attack me Munna bajrangi aur Mukhtar Ansari ke gang ke dusre members shaamil the. Aage jaakar CBI ne kayi aur logon ko iss attack ka aaropi banaya. Iss attack me kareeb 6 Ak-47 se 400 bullets fire kiye gaye, jisme Krishnanand Rai ke saath unke sabhi saathi bhi maare gaye. Unn saaton ke bodies se kareeb 67 bullets mili thi. Ek police officer ne iss attack ko “mafia battle me abtak huye golibaari ka, sabse bada pradarshan” kaha. Wahi issi attack ke baad se Munna Bajrangi, police ke “most wanted” ke list me shaamil ho gaya. 2003 me Munna Bajrangi pe kareeb 7 lakh ka cash reward ghoshit kiya gaya, jiske baad Munna ko Mumbai ke Malad se arrest kar liya gaya. Munna Malad stith ek apartment me, apne 3 teenage bacche aur wife ke saath, apne asli naam Prem Prakash Singh se reh raha tha. Munna 2012 ke Vidhaan sabha election me bhi khada hua tha. Uss duaran Munna Tihar Jail me band tha aur uspe mukadme ki kaaryawahi chal rahi thi. Halanki Munna iss election me Samajwadi Party ki candidate Shraddha Yadav se 12% ke vote se haar gaya aur teesare position pe raha.
Munna ki death 2018 ke raat ko hui thi. Asal me Munna ko Jhansi Jail se Bagpat Jail shift karwaya gaya, kyunki use vasooli ke case ke aarop me, 9 July, 2018 ko court me pesh hona tha. Halanki 9 July ke subah kareeb 5:30 baje Munna Bajrangi ke sir pe goli maar di gayi. Yeh goli Munna ke saath Jail me reh rahe gangster Sunil Rathi ne maari thi. Sunil ne aarop lagaya tha ki Munna ne use “Mota” kaha tha aur issi gusse me usne Munna ko goli maar di thi. Halanki Munna Bajrangi ki wife Seema Singh ne ek press conference me 1 hafte pehle hi keh diya tha, ki Munna ko target kiya jaa sakta hai. Seema ke issi bayaan ke 1 hafte baad, Munna ki Sunil rathi dwara hatya kar di gayi. Munna ki umar tab 51 saal thi. Sunil Rathi ne Munna ke sir pe 10 goliyan fire ki thi, jisse yahi pata chalta hai ki Munna ka murder pehle se hi planned tha.
Mirzapur-3 ki agar hum baat kare toh iss baar series me Kaleen bhaiya, Munna Bajrangi jaise local goon se saamna kar sakte hai aur iske kayi kaaran bhi hai. Pehla yeh ki Mirzapur ki shooting jyadatar U.P ke Mirzapur, Jaunpur, Varanasi, Gazipur jaise ilaake me hui hai, jaha pe Munna Bajrangi ka khof pehle se hi hai. Kaleen Bhaiya Mirzapur pe raaz karte hai, par woh apne opium ke business ko badhaane ke liye, U.P ke dusre ilaake me bhi apna rukh kar sakte hai, jaha pe Kaleen bhaiya ka saamna Munna Bajrangi se hoga, jo seedhe dono ke beech conflict ki yor le jaayega. Yeh ladai power ko lekar hogi. kyunki jaha Munna Bajrangi pehle se hi Jaunpur aur Gazipur ka maalik hoga, wahi Kaleen bhaiya ko ab Mirzapur ke alawa inn ilaakon ka bhi raaja banna hai, par aisa karne ke liye kayi logon ka murder hoga aur local goons me battle bhi hoga. Iske baad Munna bhaiya, Guddu aur Bablu Pandit ki entry hogi aur khub saara drama hoga. Goliyon ki awaaz, politician ka raaj aur U.P ke sartaaj banne ki iss chaah me kayi criminal act kiye jaayenge, jo iss series ko aur bhi jyada powerful bana degi. Mirzapur ke andaaz me kahe toh kahani ekdum “bawaal” saabit hogi.

Toh yeh thi U.P ke gangster Munna Bajrangi ki kahani, Agar aapko yeh blog pasand aayi toh ispe comment karna naa bhule. DHANYAWAAD
THE END
~Khyati