Bollywood ki duniya me har din kuch naa kuch naya aur mazedaar hote hi rehta hai. Kabhi Karan Johar party host karte nazar aate hai, toh kabhi kisi actor ki affair ki khabarein aati hai. Dekha jaaye toh aisa ek din nahi gaya, jab audience ko iss industry se kuch takadti-phadkti khbarein naa mili ho. Par har baar jaruri nahi ki news positive hi ho. Ab Chunky Pandey ko hi dekh lijiye, bechaare kaha gaye the Amsterdam Housefull ki shooting karne aur kaha unhe waapas lautna pada, apne upar case file karwa kar.
Aree haa Chaunkiye mat! Ab baat hi kuch aisi hai…kya batayein! Are nahi, hum toh batayenge aap zara apne kaanon ko toh paas laayiye, garam garam gossip jo taiyaar hai.
Toh Kahani 2009 ki hai, jab Bollywood actor Chunky Pandey film Housefull ki shooting ke silsile me, Amsterdam pahuche the. Asal me unhe Amsterdam ke airport pe security guards dwara rok liya gaya, kyunki guards ko aisa laga ki Chunky Pandey ek Mexican drug peddler hai. Aisa nahi tha ki Chunky ki original look unhe ek mafia jaisi dikh rahi thi, balki woh film ke liye jis kirdaar me dhale the, yeh sab ussi ki wajah se hua tha. Sajid Khan ki Housefull ke liye, Chunky Pandey ne apne look me kaafi badlaav laaya tha. Unhone apne baalon ke saath apni lambi beard bhi rakhi thi, jis wajah se security guards ne unhe Mexican drug peddler samjh liya aur unhe airport par kareeb aadhe ghante tak hiraasat me rakha. Chunky Pandey ne uss din shaayad hi yeh socha hoga, ki unki daadhi ek din unhe police ke chakkar me parwa degi. Shaayad issiliye har ladke ko thode baal bhi badha lene pe apni mummy se yeh sunne ko jarur milta hai “aree baal katwa le, gunda lagra hai gunda!” aur bichare unn ladkon ko galat fehmi rehti hai ki woh cool dikh rahe hai. Chunky Pandey ke saath bhi kuch aisa hi ho gaya. Security guards Chunky Pandey ko ek alag room me le gaye, jaha pe unse khub puch-taach ki gayi. “Tum kon ho?” Aur “kaha se aaye ho?”, “Tumhare saath aur kon-kon shaamil hai” jaise tamaam sawaal Chunky Pandey se, Amsterdam ke airport ke security guards ne pucha. Chunky ne unhe batane ki koshish bhi ki, ki woh koi peddler nahi balki seedhe-saadhe Bollywood actor hai. Par unki baat aakhir sure bhi kon. Chunky ne kaha “Sir! Mai koi Mexican criminal nahi balki Chunky Pandey hu. EK Bollywood actor! Trust me mai jhuth nahi bol raha.” Chunky ne guards se yeh bhi kaha ki woh unhe baahar le jaaye, taaki airport pe maujood koi bhi Indian unhe pehchaan sake. Chunky ne kaha “Sir! Agar aapko meri baaton pe bharosa nahi toh aap mujhe bahar le chaliye, taaki mai kisi Indian se aapko yeh bharosa dilwa saku ki mai koi apraadhi nahi, balki ek actor hu.” Guard ne kaha “Aur hum yeh kaise maan le ki tum sach bol rahe ho. Kya pata yeh tumhari hi koi plan ho taaki tum yaha se bhaag sako.” Guard ki inn baaton ko sun kar toh Chunky ki aakhein phati ki phati reh gayi. Bechaare ke panic hone ka saboot toh unke chehare ka paseena hi de raha tha. Phir bhi jaise-taise Chunky Pandey ne himmat jutayi aur guards se kaha “Aap mujhe hand-cuffed karke hi rakhna taaki mai bhaag naa saku. Par please sir! give me a chance to prove myself! Mai yeh saabit kar sakta hu ki mai ek actor hu aur yaha shooting ke silsile me aaya tha.” Guards ne ek dusre ko dekha phir woh Chunky Pandey ko ek mauka dene ko raazi ho gaye. “Thik hai lekin agar tum nahi prove kar paaye ki tum ek actor ho, toh tumhe humare saath police station chalna hoga.” Guards ki inn baaton pe Chunky ne apni sehmati jatayi aur woh room se baahar aa gaye, jaha pe unse sawaal-jawaab ki jaa rahi thi. Baahar aakar Chunky ki nazarein har jagah daur rahi thi. Woh bus ek Indian ki talaash me the. Tabhi unhe Airport pe kuch Indians nazar aaye. Chunky ne guards ko unn Indians ki taraf chalne ko kaha. Handcuffed Chunky Indians se kehte hai “Hey Hey! Excuse me!” Chunky ki har-barayi awaaz ko sun Indians ka dhyaan unpe gaya. Chunky ne unse kaha “Mai Chunky Pandey hu, Bollywood actor kya aap mujhe pehchante hai?” Indians unhe kuch der tak dekhte hai phir unhe pehchaan’ne se saaf inkaar kar dete hai. Kyunki Chunky ki lambi daadhi aur unke lambe baalon se, unke asli avatar ko pehchaan’na kisi ke liye bhi asaan nahi tha. Indians ke jawaab ko sun, Chunky guards ko dekhte hai aur guards bhi Chunky ko shak bhari nazaron se dekhte hai. Dono ke iss aankhon ke khel ko ek guard yeh kehte huye khatam karta hai ki “Ab bus bahut ho gaya! yeh saabit ho gaya hai ki tum asal me ek apraadhi ho naaki ki koi actor. Chalo humare saath!” yeh sun kar Chunky ke toh hosh hi udd gaye. Aisa laga ki unke neeche se zameen hi hat gayi hai. “Sir! Sir Give me a chance….yeh dekhiye mai aapko Bollywood gaane sunata hu…” Chunky ne security guards ko hindi gaano ke kuch bol sunaye lekin woh khud ko saabit ab bhi nahi kar paa rahe the. Tabhi ek budhi aurat paas se guzar rahi thi. Unhone guards se maamle ki jaankaari li aur phir Chunky Pandey ko kaafi acche dhang se dekha. Jabtak woh aurat Chunky ko dekh rahi thi aisa lag raha tha, jaise film ka koi scene chal raha ho, jisme background me ghadi ki “Tik-tok…tik-tok” sunayi de rahi ho. Chunky ke dil ki dhadkan kaafi badh chuki thi. Kyunki agar woh aurat bhi Chunky ko pehchaan’ne se mana kar degi, toh pata nahi Chunky ka phir kya hoga. Aurat ne Chunky ko apni tej nazaron se dekhne ke baad kaha “Haa yeh sach me Bollywood actor Chunky Pandey hi hai. Maine inki kayi filme bhi dekhi hai.” Apni baaton ko prove karne ke liye budhi aurat ne guards ko Chunky Pandey ke filmon ke naam bhi bataye. Par ab bhi guards ko ek confusion thi, ki agar yeh Bollywood actor Chunky Pandey hai toh phir passport pe “Suyash Sharad Pandey” ka naam kyun likha hai. Tab jaakar guards ko samjhaya gaya ki “Chunky” unka stage name hai aur unka asli naam “Suyash Sharad” hai. Tab jaakar guards ko yakeen hua aur unhone Chunky Pandey ko jaane diya. Chunky Pandey ko bachane me sabse bada kaam uss budhi aurut ne kiya, kyunki agar woh naa hoti toh pata nahi uss din kya hota. Are haa yeh sawaal toh humara bhi hai ki aakhir baaki ke crew members uss wakt kaha the? Kya pata lekin iss wakya ke baare me Chunky kehte hai “police ne mujhse Spanish me puchtaach ki aur mai ek shabd bhi nahi samjh paa raha tha. Unhone internet pe dekha aur paaya ki mai ek Indian actor ki tarah dikhta hu. Par Passport pe mera naam alag tha, jis kaaran isse mujhe koi madad nahi mili. Tabhi ek budhi aurut mili aur usne mujhe issiliye pehchaan liya kyunki usne meri filme dekhi thi. Iske baad mai seedhe Mumbai aaya aur yaha aakar mai sabse pehle apne barber ke paas gaya.” Sach me yeh ek alag level ki thrilling scene thi. Reports ne dawa kiya ki shayad Chunky apne film ki wajah se lambe baalon me the, lekin woh Amsterdam apne kaam se gaye the, naaki shooting ki wajah se. Ab maamla jo bhi ho lekin film ke chakkar me woh videsh ki jail tak pahuch jaate. Woh toh bhala ho uss aurat ka jinke kaaran Chunky surakshit India aa paaye.
Waise Housefull me “Pehla Pasta” ka kirdaar nibha rahe Chunky Pandey iss baar bhi Housefull-5 ka hissa banne waale hai. Lekin iss baar unhe apne look se thoda saavdhaan rehna chahiye, kyunki kya pata iss baar woh kisi aur chakkar me naa pad jaaye.
Toh yeh thi aaj ki kahani agar aapko yeh blog pasand aaya toh ise share karna naa bhule, dhanyawaad.
The End