Waise toh aksar hi log jab bhi shaadi-party me shaamil hote hai, toh professional photographers ko jarur hi hire karte hai.
Aisi koi event nahi hoti jisme photographer naa invited ho. Par kya aapne kabhi yeh suna hai ki shaadi me shaamil hua photographer, asal me ek chor hai? Agar nahi, toh aayiye aaj hum aapko aise hi ek photographer se milwane waale hai, jo asal me ek chor hai.
Anil Kapoor naam ka 40 saal ka aadmi, khud ko photographer ke look me dhaal leta hai aur phir parties me shaamil hokar, waha se expensive cameras, phones aur dusri keemti cheezen loot leta hai.
Bollywood actor ka naam rakhne waala yeh chor, Faridabad ka rehne waala hai.
Anil surkhiyon me tab aaya jab apni chori ke kaaran woh 2011 me news headline ka hissa ban gaya. South Delhi ke ek expensive party me shaamil hua Anil, khud ko professional photographer bata kar mauke se camera aur 7 lakh ki keemti cheezen loot kar faraar ho gaya. Anil pehle bhi aise aur 35 loot ko anjaam de chuka tha.
Ek baar apni issi harkat ki wajah se Anil pakara gaya. Asal me police ko jyadatar 5 star hotels, farmhouse aur dusre wedding spot se complaint aane lage, ki unke yaha se cameras, phone aur dusre keemti cheezon ki chori ho gayi hai. Police ko thoda shak hua ki achaanak sabhi event se samaano ki chori kaise hone lagi. Tabhi police ne apni jaanch shuru ki aur kuch photographs ki madad se unhe pata chala, ki Anil unn saare events me maujood tha, jaha pe loot hui thi. Investigation team ke liye khushi ka wakt tab aaya, jab lajpath nagar ki ek journalist, apne bhai ki party me chor ki tasveer lene me kaamyaab rahi. Issi photo ke through police ne chor tak pahuchne ka apna investigation shuru kiya.
Anil ko jab giraftaar kiya gaya tha toh uske kabze se 21 camera, ek i-phone aur 7 lakh ke keemat ka dusra samaan mila. Faridabad ka rehne waala yeh chor badi-badi parties me yeh keh kar ghusta tha ki woh ek professional photographer hai, jo magazine ke liye kaam karta hai. Ek baar party me shaamil ho jaane ke baad, Anil jaldi-jaldi keemti samaano ko apne kabze me leleta tha. Anil kyunki ek photographer tha issi wajah se kisi ko bhi uspe shak nahi hota tha. Chori kiye gaye saamaano ko Anil Delhi ke chor bazaar me bech deta tha aur usse aaye paison se maze karta tha.
Kuch saalon se Anil iss dhandhe me itna shaamil ho gaya ki kuch hi mahino me usne 30 se jyada parties me chori ko anjaam diya.
Lajpath Nagar ki rehne waali ek resident, 5-star hotel me ho rahe ek shaadi me shaamil hui. Issi dauran usne dekha ki uska expensive camera gaayab hai. Hotel ke security staff ko jab iss baat ka pata chala toh unke beech Hotel ke reputation ko bachane ki harkamp mach gayi. Hotel ke security staffs ne jab thodi- jaanch ki tab unhe pata chala ki Anil naam ka photographer koi anjaan aadmi hai, jo bina invitation ke party me shaamil hua tha.
Hotel management ne turant police ko iss baare khabar kiya aur Lajpath nagar ki uss lady ne jo chor ki photo li thi, woh tasveer Police tak pahuchi aur chor turant unke giraft me aa gaya. Acchi baat yeh rahi ki jaise hi Anil police ke pakar me aaya, waise hi police ne uske dwara pehle kiye gaye 35 aur cases ko solve kar diya. Anil ne pakre jaane ke baad bataya ki uske pita ek professional photographer the aur usne bhi same profession apne liye chuna tha. Lekin 3 saal pehle Faridabad me maujood uski photo studio kisi विवाद ke kaaran seal kar di gayi, jis wajah se financially Anil ko bahut dikkaton ka saamna karna pad raha tha. Issi kaaran Anil ke dimaag me chori karne ka idea aaya aur usne lagataar kayi saare loot ko anjaam diya. Anil ke mutabik usne kabhi nahi socha tha ki woh aisa karega, lekin paison ki kami ne mazbooran use ek photographer se chor bana diya.
Apne loot ko kaamyaab banane ke liye Anil khud ko magazine photographer batata tha aur iske liye usne ek acchi gaadi aur mehange kapdon ka intezaam kiya, taaki kisi ko bhi uspe shak naa ho aur sab ko aisa lage ki woh sach me ek magazine photographer hai. Anil ko police ne apni giraft me le liya aur usse jitna ho saka utna maal waapas lene ki koshish ki. Anil ne jyadatar samaan pehle hi bech diya tha aur usse aaye paison se woh apne expenses poori karta tha. Anil pe chori aur loot ke aarop me case darj kar, use jail me daal diya gaya.
Photographer ke chor banne ke iss angle ko agar Dhoom ke makers apni aagmi film ke plot me shaamil karte hai toh yakinan kahani ko ek naya roop milega. Waise toh iss franchise me har tarah ke criminals ka kirdaar shaamil ho hi chuka hai toh kyun naa iss baar ek photographer ko shaamil kiya jaaye, jo daytime me sach ka ek photographer ho wahi woh raat hote hi khud ko expert chor me badal leta hai. Maana jaa raha hai iss baar Akshay Kumar Dhoom ka hissa banenge, jinhe shaayad purani rati-ratayi plot nahi pasand, toh iss hisaab se who, ek aise kirdaar ki talaash me honge jo unke fans ko anticipate karne ki taakat rakhta ho aur yeh kaam Anil ki tarah ek photographer cum chor kar sakta hai.
Toh khair, yeh thi aaj ki kahani agar aapko yeh video pasand aaya toh ise like karna naa bhule aur dekhte rahiye humara yeh channel jiska naam hai Bollygrad studioz.
Dhanyawaad