Bollywood ke bhai ka kon nahi diwaana hai. Bollywood me agar kisi actor ki sabse jyada fan following hai toh woh sabke bhaijaan Salman khan ki hi hai. Iske alawa bhai ki charity bhi logon se chupi nahi hai, unhi charity me struggling actor ko filmon me kaam dilwana bhi shaamil hai. Lekin aisa lagta hai ab sirf Salman actors aur models ko hi nahi, balki khel-jagat se joode logon ko bhi Bollywood ki family ka ek sadasya banana chahte hai. Ji haa!
Are nahi samjhe kya? Lagta hai aapne abhi tak Boxer Vijender Singh ki Bollywood debut ki khabar nahi suni hai.
Asal me 2023 ke Eid pe, Salman hume ek baar phir Eidi apni nayi film ke through dene waale hai. Bhai ki nayi aur most awaited film “Kisi ka bhai kisi ki jaan” aane waali hai aur issi film me Boxer Vijender Singh bhi nazar aane waale hai. Aisa lagta hai Vijender ko Salman ka woh sahara mil gaya hai, jiska sapna har struggling actor dekhta hai, lekin buttering karne ke bawajood bhi unki daal nahi galti hai. Wahi dusri yor mehnati aur desh ka naam Roshan karne waale Boxer Vijender ka, Salman ka khaas banne me jyada wakt nahi laga. Inn dono ki badhti bonding ki khabar khud Salman ne hi di hai!
29 October 2022 ko har din ki tarah sabhi ke liye aam din tha, lekin bahut kam logon ko pata hai ki uss din Boxer Vijender ka birthday hai. Salman khan ke fans aaram se weekend ki din uth kar apni Chai ki chuskiya le rahe the, tabhi unki phone ki ghanti baji. Phone on karke dekha toh Salman ka Insta post notification tha, jise unke har fan ne on rakha tha. Achaanak desh ke har kone me baithe Salman ke fans, apni favorite chai ko side karte hai aur hairaan bhari nazaron se insta khol kar Salman ka post dekhne lagte hai. “Aree ab bhai ne kya daala hoga..dekhna toh banta hai.” Gwalior ka Chintu kehta hai, jiska 12th exam nazdeek tha. Delhi ki shanaya ko bhi Instagram Story daalni thi issiliye usne bhi apna makeup chod kar sabse pehle Salman ki post dekhne ki sochi. Sabhi apna Insta kholte hi dang reh jaate hai. Aakhir aisa kya tha uss post me? Asal me Salman ne “Kisi ka bhai kisi ki jaan” ka BTS(Behind the scene) pic post kiya, jisme Salman, boxer Vijender, Jassi Gill, Siddharth Nigam aur Raghav Juyal nazar aa rahe the. Iss post ke neeche Salman ne Vijender ko tag karke caption me likha “Haapy Birthday boxer bhai… welcome on board.” Yaani ki “Vijender tumhara film me swagat hai.” Iss post me Salman apne naye look me nazar aa rahe the. Unhone white shirt aur black pant pehni thi. Iske alawa unke sir pe chot bhi nazar aa rahi thi. Maana jaa raha hai Salman ke sir pe chot ,unke kirdaar ka hi hissa hai.
Iss post ko dekhte hi unke fans ke beech thehalka mach gaya. Sab post pe lagataar comment aur ise like karne lage. Kisi ko nahi pata tha ki unke bhai, Vijender ke birthday pe iss baat ko disclose karenge ki ab woh bhi film me shaamil hai. Kaha jaa raha hai ki film me Vijender villain ka role play karenge. Vijender ke alawa Abhimanyu Singh aur Jagapathi Babu bhi film ke villain honge. Salman Vijender ko training bhi de rahe hai, taaki woh apna kirdaar acche se nibha sake. Pichli bahut saari film Salman ki acchi nahi kamayi kar paayi hai. Yahi kaaran hai ki iss baar Salman apni nayi film ko lekar kaafi jyada possessive nazar aa rahe hai. Unhe kisi bhi haal me apna kaam accha chahiye. Salman ne apni film me Yo Yo Honey Singh ko bhi jagah di hai, jise sun Honey Singh ke fans itne khush hai, ki woh apne aap pe se control kho rahe hai. Honey Singh kehte hai “Salman bhai ne mujhe phone kiya aur kaha ki woh mere saath kaam karna chahte hai.” Honey ne bataya Akshay kumar ne bhi unhe apni film ke liye ek gaana offer kiya hai. Honey Singh dono actors ko dhanyawaad karte hai. Kyunki Bollywood ke inn actors ne Honey ko unke struggling phase me madad ka haath badhaya hai.
Rapper King Honey Singh ka swaagat unke saare fans kar rahe hai.
Jis din se Salman ne apni agaami film “Kisi ka Bhai kisi ki Jaan” ka announcement kiya hai, tab se unke fans, film ke intezaar me baithe huye hai. Sab apni-apni reaction film ko lekar lagataar de rahe hai. Koi Vijender ko dekh kehta hai “Boxer bhi Superstar se kam nahi” toh koi film me Sehnaaz Gill ke look ka wait kar rahe hai. Ab Chintu ka 12 th ka exam saamne aa jaaye ya phir Shanaya ka makeup hi kyun naa saamne aa jaaye, lekin yeh sabhi log sabse pehle khud ko Salman khan ki pics, aur film ko lekar current news se updated rakhne waale hai.
Pichle mahine ek 13 saal ka baccha black color ke kapde pehan khud ko bhaijaan samjh raha tha, woh toh accha hua ki uski ammi-jaan ne wakt rehte use apne teacher ko yeh kehne se rok diya ki “Hum tumme itne ched karenge…” nahi toh pata nahi uss 13 saal ke bacche pe sawaar bhai ka boot kya-kya kar deta hai. Khair, film ki baat kare toh iss baar gaane ke visuals pe bhi kaafi kaam kiya jaa raha hai. Salman chahte hai ki unke film ka gaana unke scenes se match kare. Nahi toh pichle kayi filmon ka downfall kamzor gaane ko bhi diya jaa raha hai. Aisa lag raha hai, jaise Salman ab koi risk nahi lena chahte aur woh apna jitna ho sakta hai utna best dena chahte hai.
Dekhna ab yahi hoga ki iss film me ab aisa kya tadka lagega, jise dekhte hi log keh uthenge “Woh dekho bhai aa gaya.”
Toh yeh thi aaj ki kahani. agar aapko yeh video pasand aaya toh ise share aur karna naa bhule.
Dhanyawaad
The End