Punjabi Singer Siddhu Moosewala ki hatya me do logon ka naam sabse pehle aaya tha, Lawrence Bishnoi aur Goldy Brar. Lawrence ke baare me humne aapko apni pichli video me bataya. Wahi iss video me hum jaanenge ki aakhir Goldy Brar kon hai.
Toh Goldy Brar Canadian based gangster hai jiska asli naam Satinderjeet Singh hai. Waise toh Goldy ko lekar kaafi kam jaankaari logon ke beech maujood hai, lekin kaha jaata hai Goldy Punjab ke DAV college ka student tha, jise college ke politics me kaafi ruchi thi. 2011 ke dauran Goldy ki mulakaat Lawrence Bishnoi naam ke ek, dusre student se hui, jiske saath milkar Goldy ne college me kaafi aatank failaya. Goldy ka mann tha ki woh aur uska gang, college me ho rahe student election ko har baar jeete aur baaki students pe apni pakar banaye rakhe. Bilkul kuch ussi tarah se, jaise gunde aam janta pe apni pakar jamaate hai.
Goldy Brar ka janam Punjab ke “Kot kapura” me saal 1988 ko hua tha. Philhaal Brar ki umar 34 saal hai. Brar ka hometown Kot-kapura se 30 km door stith Muktsar hai, jaha Lawrence aur Goldy ne kaafi aatank failaya tha. Goldy Brar ke pita Punjab Police me ASI(Assistant Sub Inspector) the, jinhe 2021 me Goldy ke badhte crime ko dekh jaan-bujh kar police ki taraf se retirement de di gayi.
Goldy ke alawa uska cousin Gurlal Brar bhi criminal duniya se jooda tha, jise do anjaan aadmiyon ne Chandigarh ke ek mall ke saamne, 2020 me goli maar di thi. 2022 me Punjabi Singer Siddhu Moosewala ki hatya karne ke baad, Canada me reh rahe Goldy ne apne Facebook account pe post kar, hatya ki zimmedaari li thi. Kaha jaata hai Goldy Brar aur Lawrence Bishnoi apne dost Vikramjeet Singh Middhukhera ki hatya ka aaropi, Sidhu Mossewala ko maante the. Vikramjeet urf Vikcky Youth Akali Dal ka leader tha, jiski hatya 2021 me Mohali me hui thi. Asal me Vicky ki hatya me Punjabi Singer ke personal secretary ka naam jab se saamne aaya tha, tab se Brar aur Bishnoi gang ke members singer se dushmani rakhne lage the. Goldy Brar pe Congress leader Gurlal Singh Pehalwan ki hatya ka aarop laga tha. Goldy Pehalwan ko maar kar, apne cousin Gurlal Brar ki hatya ka badla lena chahta tha. Goldy ka maan’na tha ki Congress neta pehalwan ne hi uske bhai Gurlal Brar ki 2020 me hatya karwayi thi.
Issi kaaran Goldy ne Canada se hi Lawrence ke gang ke saath milkar, 2021 me Pehalwan ki hatya karwa di. Iss hatya ke liye shooters ko Goldy ne hi hathiyaar provide karwaya tha. Pehlawan ki hatya ke baad pure desh me Goldy aur Bishnoi gang ka aantak, logon ke beech khauf bana raha tha. Sarkaar ne issi khabar ke baad Goldy ko desh me ban karwa diya. Iske alawa Goldy ke pita jo Punjab Police me ASI(Assistant Sub Inspector) ke taur pe kaam kar rahe the, unhe bhi police ne Goldy ke badhte crime ko dekh jaldi retirement de di. Pehalwan ko maar kar apne bhai Gurlal Brar ka badla lene ka baad, Goldy ke agle target Punjabi Singer Moosewala the.
Goldy jyadatar murders me khud hi planning karta hai aur Bishnoi gang ke through use implement karta hai. Lawrence Bishnoi ko ek apraadhi banane me Goldy Brar ka bahut bara haath hai. College me reh kar aatank faila rahe Goldy ko, ameer ghar ke Lawrence me apna ek dost nazar aaya, jiske baad inn dono ki dosti itni badh gayi ki Bishnoi seedha jail me paaya gaya. Wahi Goldy videsh bhaag gaya. Jaankaaron ka kehna ki Goldy saal 2019 me Student Visa ke naam pe Canada bhaag gaya. Goldy apne aage ki padhai Canada se karna chahta tha lekin Canada pahuch kar Goldy kayi tarah ke criminal act me shaamil ho gaya. Woh videsh me hi reh kar Punjab me apna criminal racket chlane laga. Goldy jald hi jabran vasooli aur contact killing bhi karne laga. Dekhte hi dekhte Canada me reh raha Goldy, Bharat me naami gangster ban gaya, jis kaaran use sarkaar ne “Most Wanted Criminal” ke list me shaamil kar diya hai.
Isse pehle bhi Goldy ne Surjit aur Paramjit naam ke do bhaiyon ki hatya Gurgaon me karwayi thi.
Asal me Alcohol ki illegal business ko lekar Surjit aur Paramjit ki dushmani Goldy Brar se ho gayi thi, jis kaaran Goldy ne unhe iss duniya se hi door kar diya. 2021 me Punjab Police me Goldy ke khilaaf ek aur case file hui. shaayad ek businessman ne Goldy ko vasooli dene se mana kar diya tha, jiske baad Goldy ne uss business ki hatya karne ki saajish shuru kar di thi. Goldy bhale hi har case ka mastermind hota hai, lekin uska asli power Bishnoi gang se aata hai, jisme kareeb 700 shooters shaamil hai. Kaha jaata hai Facebook pe Goldy, “Lawrence Bishnoi” naam ka ek criminal group bhi chalata hai.
Moosewala ki hatya ke iss pure maamle me, ek ajeeb baat yeh rahi ki Siddhu Moosewala ki hatya ke baad, Lawrence ke naam se kiye gaye Facebook post ki zimmedaari Lawrence nahi le raha tha. Lawrence ke mutabik woh post usne nahi ki thi. Dekha jaaye toh police ko koi saboot bhi nahi mila, jo yeh prove kar sake ki woh post Bishnoi ne hi ki hai. Wahi naa sirf Lawrence balki Goldy dwara bhi ek Facebook post ki gayi thi, jisme usne hatya ki zimmedaari li thi. Par iss baat ka koi mazboot saboot nahi hai, ki yeh post unhone hi ki thi. Kayi baar Lawrence yeh bhi keh chuka hai ki use police, juthe aarop me bhi phansa chuki hai. Toh kya hum yeh maan le ki Goldy Brar aur Lawrence Bishnoi ka naam istemaal kar, kisi dusre ne Punjabi Singer ki hatya karwayi ho aur woh Goldy ko kuch paise dekar use hatya ki zimmedaari lene ko kaha ho? Punjabi Singer ko lekar ek theory yeh bhi hai ki unki hatya se thik kuch din pehle hi unki security kam kar di gayi thi. Singer ke security me aayi kami ke kaaran hi, unhe itni asaani se maarna unke dushmano ke liye asaan tha. Logon ka sawaal bus yahi hai, ki sarkaar ne aakhir kyun Moosewala ki security kam karwayi thi. Dusri conspiracy singer ki yor se release kiye gaye “SYL”(Sutlaj-Yamuna link) gaane ko lekar thi, jise Indian government ke aadesh pe YouTube se hata diya gaya tha. Iss gaane me Punjabi Singer ne Punjab aur Sikh ki ekta ke baare me baat ki. Iske alawa unhone 1984 me, Indira Gandhi ki hatya ke duran huye Sikh riots ke baare me bhi kaha. Yaha tak ki Punjabi Singer ne apne music video me Farmer protest ki bhi jhalak dikhayi thi. Logon ka maan’na hai ki yeh sab baaten khule-aam desh me nahi ki jaa sakti, kyunki yeh politically controversial topic hai. Wahi Singer ki hatya ke taar Political conspiracy se bhi joor rahe hai. Jaankaaron ka bus yahi kehna hai, ki “jo log power hold karte hai, woh apne gande kaam khud se nahi balki dusron se karwate hai.”
Jo yeh baat samjh jaaye, use duniya ki raajneeti bhi samjh aa jaayegi.
Goldy ki baat kare toh use Moosewala ki hatya ke thik kuch hafte baad USA ke California se pakar liya gaya tha. Philhaal Goldy naam badal kar Canada me hi reh raha hai.
Toh yeh thi aaj ki kahani, jo ki Goldy Brar ke baare me thi. Desh me Goldy ek ku-khyaat apraadhi hai, jiski pakar Bishnoi gang se hai. Goldy ko lekar logon ke mann me aakrosh tab jaaga, jab uska naam Sidhu Mossewala ki hatya me saamne aaya tha.
Goldy Brar jaise criminal ka kirdaar, Mirzapur-3 me shaamil hokar alag level ka too toofan macha sakta hai. Iss videshi gangster ko pakarne ke peeche Kaleen bhaiya ke saare desi gunde lag jaayenge. Lekin jeet kiski hogi, yeh toh series dekh ke hi pata chalegi.
The End
