Kahani 2013 ki hai, jab Houston, Texas(ह्यूस्टन) ki rehne waali Emily Madonia ne Christmas ke mauke pe apni beti ko Disney ki Elsa Doll gift ki thi. “Elsa” Disney ki Frozen movie ki main character ka naam hai, jiski Doll ko Emily apni beti ke liye laayi thi. Elsa Doll naa sirf Frozen film ki dialogues bolti thi, balki agar uski necklace ko koi press kare, toh woh Frozen ka sabse famous gaana “Let It Go” bhi gaati thi. Doll aane ke 2 saal tak sab kuch sahi gaya, Emily ki beti ko bhi Elsa Doll kaafi pasand aa rahi thi, lekin ussi ke kuch wakt ke baad se hi Doll kuch ajeeb si harkatein karne lag gayi. Emily ke mutaabik Elsa shuruat me English me gaana gaati thi, lekin phir wahi doll 2015 se English ke alawa Spanish me bhi gaane lag gayi. Naa hi Doll pe koi button tha, naa hi uspe language change ka koi dusra option tha. Bas woh doll apne aap hi English ke saath-saath Spanish me bhi gaane lagi thi. Emily aur uske pariwaar ko yeh baatein ajeeb toh lag rahi thi, lekin unhe Elsa pe tab tak shak nahi hua, jab tak ki maamla aur badh nahi gaya. Asal me Emily ka pariwaar Elsa Doll ko pichle 6 saal se own kar raha tha aur unhone kabhi uss doll ki battery bhi nahi badalwayi thi. Emily ka kehna hai ki bhale hi Doll switched off ho, lekin woh kayi baar apne aap hi bolne aur gaane lag jaati thi. Samay beet’ta gaya aur 2013 se 2019 aa gaya. Emily chahati thi ki Christmas se pehle woh ghar ke puraane toys se छुटकारा paa le, taaki naye toys ke liye ghar me jagah bane. Shuruat me toh Emily ne Elsa Doll ko phenkne ke baare me socha bhi nahi tha, lekin Emily ki beti ko ab Elsa Doll se koi khaas matlab nahi tha. Issi kaaran use phenkna Emily ke liye asaan tha. Iske alawa Elsa Doll kaafi jyada puraani aur gandi ho chuki thi, yaha tak ki Emily ki beti ne doll ke chehare ko marker se rang bhi diya tha. Doll itni kharaab thi ki use donate bhi nahi kiya jaa sakta tha, issi kaaran Emily ne use kachre ke box me phenk diya. Lekin shaayad Elsa ko iss tarah se phenka jaana pasand nahi aaya, tab hi toh woh waapas Emily ke ghar pahuch gayi. Asal me jab Emily ka pariwaar apne living room me rakhe wooden box me kuch khoj raha tha, tab unhe waha se wahi Elsa Doll mili, jise Emily ne do haften pehle, kachre me phenk diya tha. Emily ke mutaabik uss box me jyadatar books aur dusri cheezen rakhi hui hai, issi kaaran woh box humesha hi band rehta hai. Agar woh uss din kuch khoj nahi rahe hote, toh woh kabhi bhi uss box nahi kholte. Aise me Emily ke pariwaar ka sawaal yahi tha, ki aakhir woh doll iss box me aayi kaha se. Jab Emily ke husband ki nazar box ke andar maujood Elsa Doll pe padi, toh woh jor se cheekh pade. Emily ne iske baad apne bacchon se Doll ko lekar sawaal kiya, ki kahi woh toh iss doll ko andar nahi laaye. Lekin Emliy ke bacchon ke mutaabik, unhone toh iss doll ko छुआ tak nahi tha. Emily bhi unki baaton ko maan gayi, kyunki uske bacche kachre ke box ke andar, iss doll ko nikaalne toh nahi hi jaayenge. Emily ka pariwaar ab acchi tarah samjh gaya tha, ki Elsa Doll haunted hai. Issi kaaran unhone isse humesha ke liye chutkara paane ka iraada banaya. Emily ke husband ne rubber gloves ko apne haathon me pehan kar, Elsa Doll ko acchi tarah se garbage bag me band kar diya. Iske baad woh uss doll ko lekar garbage box ki yor badhe, aur doll ko usme daal kar upar se dusre kachre ke bag ko rakh diya. Taaki uss doll ka baahar aana mushkil ho. Kuch hi der baad ek truck aaya, jo saare kachre ko saath le gaya. Lekin kuch hafton baad jab Emily ki beti apne ghar ke backyard me khel rahi thi, tab uski nazar ek kone me rakhi ussi Elsa Doll pe padi. Doll kisi bhi tarah ke bag me packed nahi thi. Emily aur uske husband Elsa ko dekh kaafi pareshaan aur darr chuke the. Woh jaante the ki jis tarah se unhone uss doll ko pack kiya tha, uska waapas aana naa-mumkin tha. Emily kehti hai ki yeh kaam kisi insaan ka nahi hai, kyunki ek kachre ke truck me jaakar doll waala bag kisi bhi insaan ke liye khojna, possible nahi hai. Emily ne yeh bhi bataya ki doll ko phenkne se kuch dino pehle tak se Elsa Doll sirf aur sirf Spanish me baat kar rahi thi. Woh English ka ek shabd bhi nahi keh rahi thi. Iske alawa woh gaana gaana bhi band kar chuki thi. Emily ab doll se itni pareshaan ho chuki thi, ki usne Elsa Doll ko apne ek dost ke ghar bhejne ka iraada kiya. Lekin jab Emily uss doll ko pack kar rahi thi. Tab Elsa Doll kareeb 30 sec tak lagataar hansi thi. Jiske baad woh kuch bolne lag gayi. Emily ke mutaabik usne isse pehle itne daravne tarike se uss doll ko hanste huye kabhi nahi dekha tha. Doll ki ajeeb hansi ko dekh Emily aur uske husband ke hosh udd gaye the. Jiske baad unhone jaldi se doll ko box me band kiya aur use Minnesota(मिनेसोटा) bhej diya. Philhaal uss doll ka naya owner Minnesota me hi reh raha hai, jo bhoot’on pe vishwaas nahi karta hai.
Ab dekhna yahi hai, ki woh doll waapas Emily ke ghar aati hai ya nahi.
Khair, yeh thi aaj ki kahani, agar hum baat bhool Bhulaiyaa-3 ki kare toh iss film ko, iss baar haunted dolls pe based hona chahiye. Waise bhi jis tarah se western culture me Annabelle famous hai, ussi tarah se India ki haunted doll ki bhi ek alag kahani honi chahiye, jo darshakon ko darane ke saath entertain karne ki taakat rakhti ho.
The End