White House me naa sirf Abigail Adams balki U.S ke 7th president Andrew Jackson ka bhi bhoot bhatakta hai. 1824 me Andrew Jackson John Quincy Adams se, itihaas ke sabse controversial election me haar gaye the. Iss kaaran 6th President bhale John Quincy Adams bane lekin 4 saal baad U.S ke 7th presidential election me Andrew phir khade huye aur America ke naye president bane. Halanki president ban’ne ke bawajood bhi Andrew naa sirf John Quincy se naaraaz the, balki woh logon se bhi चिड़े huye the, jinhone pichle election me unke badle John Quincy ka support kiya tha. 1860s me president Abraham Lincoln ki wife Mary Todd jab White House me rehti thi, tab unhone Andrew Jackson ko hall me chalte aur gaali dete huye suna tha. Iske alawa Andrew ko lekar yeh bhi kaha jaata hai ki unka bhoot aaj bhi “Rose Room” yaani ki unke puraane bedroom me aata hai, jaha pe Andrew apne presidential term ke dauran rehte the. Kayi logon ne unke kamre se, Andrew ke jor se hansne ki awaazein bhi suni hai. Logon ke anusaar Rose Room poore White House me sabse jyada haunted kamra hai. Andrew ka bhoot America ke 33rd president rahe Harry Truman ke presidential term ke dauran bhi aaya tha. June 1945 me Harry ko president bane sirf do hi mahina hua tha, ki woh apni wife ko ek letter likh kar White House ke bhoot ke baare me batate hai. Harry ne apni wife se kaha tha ki woh bhooton ke presence me reh kar raat me apna kaam karte hai. Kabhi-kabhi bhoot hallway me upar-neeche chalta hai toh kabhi woh Harry ke study room me hi aa jaata hai. Harry ne apne letter me naa sirf White House ko purana kaha tha, balki woh ise haunted hone ka bhi jikr kar rahe the. Harry ke mutaabik kamre ke parde apne aap khul kar band ho jaate hai. Harry kehte hai ki “Mai yaha pe reh kar Andy Jackson aur Teddy Roosevelt ko, Franklin Roosevelt pe behas karte huye imagine kar sakta hu.” Harry yaha pe Andy, Andrew Jackson ko keh rahe hai wahi woh Teddy, Theodore Roosevelt ko keh rahe hai. 1946 me Harry ne apne bedroom ke darwaaze me knock suna tha, lekin waha koi nahi tha. Harry iss baare me apni wife ko ek aur letter likhkar kehte hai ki
“Knock sun kar mai jaldi se bed se utha aur bathrobe pehan kar darwaza kholne gaya, lekin waha koi nahi tha. Maine kamre ke baahar jaakar dekha, upar-neeche har jagah dekha, lekin waha koi nahi tha. Maine tumhare aur Margie ke bhi kamre me dekha, lekin waha bhi koi nahi tha. Maine wapaas aakar apne bedroom ke darwaaze ko andar se acche se lock kar liya. Halanki Maine galti se tumhare kamre ko khula chod diya tha aur mujhe uss kamre se kisi ke chalne ki awaazein sunayi de rahi thi. Mai phir utha aur baahar jaakar check kiya, lekin waha pe tab bhi koi nahi tha. Yeh jagah sach me haunted hai. Maine agle din secret service se bhi iss baare me baat ki, lekin unhone kaha ki uss wakt mere kamre ke paas koi watchman tak nahi gaya tha. Isse pehle ki yaha ke bhoot mujhe kahi le jaaye, Tum aur Margie jaldi wapaas aakar mujhe yaha se bachaao.” Harry ki wife Bess aur beti Margie uss wakt White House ke baahar kisi kaam ke kaaran reh rahi thi. Ussi beech Harry ke saath yeh saari ghatnaayein huyi thi. Halanki White House ke yeh bhoot Abraham Lincoln ke bhoot ke saamne normal hai. White House me naa sirf Abraham Lincoln ka bhoot rehta hai, balki unke 12 saal ke bete ka bhi bhoot, White House me bhatakta hai. Kayi staffs yeh pehle hi maan chuke hai ki unhone ek chote ladke ka bhoot dekha hai jo 13 se 15 saal ke beech ka lagta hai. Yeh staffs asal me Abraham Lincoln ke bete ke bhoot ke baare me baat kar rahe hai. President Abraham Lincoln ki maut 1865 me hui thi, halanki unka bhoot aaj bhi White House me maujood hai. White House me Abraham Lincoln ke baad jitne bhi presidents aur first ladies aayi, sabhi ne Lincoln ki presence ek wakt pe White House me feel ki hai. Yaha tak ki President Obama ne bhi Abraham ke bhoot ko apne presidency ke dauran White House me mehsoos kiya tha. Kaha jaata hai apne marne se thik ek saal pehle Abraham ki health kharaab ho rahi thi. Unke aankhon ke neeche dark circles aur chehare pe kayi ghehare lines aa gaye the. Aisa lag raha tha jaise koi baat President ko pareshaan kar rahi hai. Uss dauran Abraham koi chutti bhi nahi lete the aur kaafi kam sote the. Kaha jaata hai unhe kisi baat ki pareshaani thi aur woh tha unke maut se jooda woh sapna, jo unhone apne assassination se pehle dekha tha. Abraham ke khaas dost kehte hai ki Lincoln ne unhe 1865 me apne dekhe sapne ke baare me bataya tha.
Aage hum jaanenge ki aakhir Abraham Lincoln ne apne sapne me kya dekha tha aur kaise unke 12 saal ke bete ki maut achanaak se ho gayi thi. Kaha jaata hai Lincoln ki wife Superstitious thi aur woh white House me aksar bhooton se baatein karti thi. Aakhir woh thi kon? Jaan’ne ke liye dekhte rahiye humara yeh channel jiska naam hai Bollygrad studioz.
To be continued…part-2