Kahani ki shuruaat hoti hai Chennai sehar ke sabse badnaam Jail se. Jahan Kaidi humesha maze mai rehte hain. Unke liye uss jail mai aana kisi lottery se kam nahi hota hai. Or sarkaar bhi iss maamle mai kuch nahi kar pa rahi hai kyunki ye sehar ka sabse bada or sabse purana Jail hai. Peon Rannu kehta hai, “Kya sir, kuch toh kariye. In Kaidiyon ne naak mai dam kar diya hai” Jail ka Jailer Iyer kehta hai, “Are kya kahu Rannu yaar. Main toh khud baar baar court mai arzi dekar thak chuka hu ki koi action le action le, Lekin nahi sunta kaun hai hum log ki.” Rannu kehta hai, “Ek baat kahu sir?” Jailer kehta hai, “Haa Kaho.” Rannu kehta hai, “Sir, jab tak ye Raghu hai na tab tak kaidiyon ki mauj hi mauj hai.” Jailer kehta hai, “Kya kare? Vo hai bhi toh itna bada aadmi. Andar se lekar bahar tak har jagah uski setting chalti hai.” Tabhi vahan jail ke andar 2 kaidi aapas mai ladne lagte hain. Rannu kehta hai, “Are sir, vo dekhiye vo dono toh khoon karne ko taiyaar hain ek dusre ka.” Jailer kehta hai, “Marne do saalon ko. 2-3 kam ho jayenge toh kya hi fark padega.” Tabhi sabhi kaidi chillane lagte hain. Rannu kehta hai, “Aiyoo, sir vo toh mar gaya.” Jailer Or Rannu daud kar vahan jate hain or zakhmi kaidi ko hospital mai admit kar dete hain. Hospital mai Rannu kehta hai, “Sir, agar isko kuch huya na toh samjhiye aap gaye.” Jailer ladkhadati Zubaan mai kehta hai, “Yee kya bakvas kar rahe ho?” Rannu kehta hai, “Sir, bakvas nahi. Abhi vo Raghu kuch din ke liye bahar gaya hai. Lekin jab vo aayega na tab aap samjhiye aapki kya haalat hogi.”
Agle din mai Jail mai Rannu or Jailer baithe hote hain. Tabhi vahan Inspector Rana aata hai. Jailer kehta hai, “Aaiye Rana bhai, kahan hain aaj kal? Dikhayi nahi dete.” Rana kehta hai, “bas vahi kabhi janta ki seva toh kabhi Politicians ki. Aapke liye ek gift laya hu.” Jailer kehta hai, “Mere liye? dikhayi toh.” Rana aawaz lagate huye kehta hai, “Andar aa jao.” Saamne ek or kaidi khada hai. Use dekhte hi Jailer ka muh latak jata hai. Jailer muh banate huye kehta hai, “Kya Rana ji, ab aap bhi humara mazak bana lijiye.” Rana kehta hai, “Are isme mazak kaisa?” Jailer kehta hai, “Ye kaidi gift? waah. Aise 500-600 gift maujood hain iss jail mai.” Jailer File mai dekhne lagta hai. “Kya number hai iska kya number hai… are?” Jailer number dekh kar hasne lagta hai. Jailer kehta hai, “Are Rannu, isko dekh ye toh khud mohar lagwa kar aaya hai 420 ka. Isko 420 ka uniform dede.” Kaidi number 420 ek Dara sahma aadmi hai. Uske haav bhaav dekh kar koi bhi ye nahi keh sakta hai ki ye aadmi koi Gunaah karke jail aaya hai. Rannu use jail ke kapde deta hai. Kaidi number 420 apne kapde badal par jail mai ghusta hai. Jahan use dekh kar har koi hasta rehta hai. Raat ka andhera hai. Rannu sabko khana de raha hai. Rannu Kaidi no. 420 ko khana dete huye kehta hai, “Oye uth, 420. Khana kha le. Or agar 10 minute mai khana khatm karke apni thaali nahi dhoyi na.. Toh ग्यारहवें minute par tu upar pahuch jayega.” Kaidi no. 420 apne khane ki thali aise kheechta hai jaise kai din se usne kuch nahi khaya ho. Rannu use hairani se dekhne lagta hai. Jailer ke pass jate huye Rannu kehta hai, “Sir, use dekhiye. Vo kaise kha raha hai.” Jailer use dekhne lagta hai. Tabhi Kaidi no. 420 ki nazar uss par padti hai. Jailer muskurate huye usase poochta hai, “Or khana chahiye?” Kaidi no. 420 Haa mai sir hilaate hai. Jailer kehta hai, “Tera baap bana kar gaya tha ya teri ma? Jo tujhe or khana chahiye. Chup chaap jitna mile kha lene ka. Samjha?” Kaidi no. 420 ka muh latak jata hai. Or vo hath or plate dho kar Jail mai hi so jata hai. Agle din sabhi kaidi mil kar apne apne Jail ki safai kar rahe hain.
