Kahani ki shuruaat hoti hai Raat ke andhere se. Jahan toll naake par bahut sari truck khadi hain. “Aee chalo re, aage badho.” Toll naake ka aadmi kehta hai. Tabhi vahan police ki gaadi aati hai. Jisme se police inspector Shiva bahar niklta hai. Shiva kehta hai, “Kya kaam chal raha hai Shinde?” Toll naake ka aadmi Shinde kehta hai, “Kuch nahi Sahab, vahi apna purana kaam.” Shiva trucks ki taraf dekhta hai or kehta hai, “Koi bhi truck yahan se bina checking karaye nahi jayegi.” Shinde kehta hai, “Jaisa aap kahe sir.” Checking shuru hoti hai. Ek ek karke sabhi truck vahan se jane lagte hai. Tabhi Hawaldaar Pratap ko ek truck par shaq hota hai. Vo uss truck ki talaashi lene lagta hai. Piche khadi dusri truck mai baitha Kaalu kehta hai, “Aee agar humara maal pakda gaya na toh saari pol khul jayegi.” Driver seat par baitha Kamlesh kehta hai, “Lekin bhau(भऊ) ab kya kare.” Kaalu kehta hai, “ Apne pass ek idea hai. Sun.” thodi der baad hi Kamlesh Truck se utarta hai or chhori chipe Toll officer ke cabin mai pahuchta hai jahan officer so raha hai. Kamlesh vahan rakhi chaabhi ko churane lagta hai. Or jaan bujh kar pass mai rakhi files gira deta hai. Aawaz aate hi officer ki neend khul jati hai. Or vo Kamlesh ko dekh kar ‘chor chor’ chillane lagta hai. Andar se aawaz aane par Shiva kehta hai, “Aee jakar dekho re.” Sabhi Halwdaar Truck ko chhod kar cabin ki taraf bhaagte hain. Idhar Kamlesh office se nikal kar wapas road par aata hai. Shiva ki nazar Kamlesh par padti hai. “Are ruko.” Aisa keh kar Shiva Kamlesh ke piche bhaagne lagta hai. Mauka pakar Kaalu toll naake ko todte huye vahan se bhaag jata hai. Or raaste mai hi Kamlesh ko utha leta hai. Truck ko jate huye dekh kar Shiva ko pura maanjara samjh aa jata hai. Tabhi Shiva ki nazar Truck par padti hai. Vo dekhta hai ki truck par uski number plate hi nahi hai. Shiva kehta hai, “Ye jo koi bhi hai. Main use pakad kar rahunga.”

Agle scene mai Sehar ka sabse college St. Thomas ke principal office ka cabin dikhaya jata hai. Cabin ke andar college ke principal Rajesh Sharma baithe hain. Bahar se students ka shor aa raha hai. Cabin ke andar economics ka professor Sunil Rastogi aata hai or kehta hai, “Sir aap yahan baithe huye hain, bahar sabhi ladkon ne hungama khada kar rakha hai.” Principal gussate huye kehta hai, “Toh aap kya chahte hain main bhi vahan jakar unke sath shor karu?” Sunil kehta hai, “Nahi sir, kuch hi deir mai humare Chief guest DIG sahab aane wale hain. Agar aise hi sab shor karte rahe toh humare college ki izzat mitti mai mil jayegi.” Principal gussa kar bahar aata hai. Students use dekh kar or bhi tez tez chillane lagte hain. Principal kehta hai, “Dekhiye Shant ho jaiye, shant ho jaiye.” Tabhi ek student Rahul kehta hai, “Hum shaant nahi rakhenge sir. Hume RD iss function mai chahiye hi chahiye. Usi ke liye toh itni badi reunion party rakhi hai.” Principal kehta hai, “Dekho, agar vo yahan aaya toh main iss function se chala jaunga.” Rahul kehta hai, “Vo aapki marzi Sir. Lekin hume RD chahiye. Aap use bulaiye.” Door khadi college ki new professor Ananya ye sab sun rahi hai. Sunil Rastogi uske paas aakar khada ho jata hai. Or muskurate huye kehta hai, “jab se aap aayi hain, college bhara bhara lagne laga hai.” Ananya kehti hai, “Rastogi ji, ye RD kaun hai?” Rastogi muh banate huye kehta hai, “Ek number ka badmash hai. Usne hi sabhi students ko barbaad karke rakha hai.” Ananya kehti hai, “ Toh usko college se suspend kyu nahi kar dete?” Sunil kehta hai, “Are Ananya ji, aap kitni bholi hain. Vo student nahi balki teacher hai.” “Kya? Teacher?” Ananya shocked hokar poochti hai. Sunil kehta hai, “Haa ek no. Ka gunda badmash hai. Lekin pata nahi kya jaadu kar rakha hai usne students par. Aap zara door hi rahiyega uss se.”