Kahani ki shuruaat hoti hai Pakistan se, jahan hum Parmit Khanna ( Ranveer Shorey ) ko dekhte hai jo Pakistani army ke liye dry fruits supply karne ka kaam karta hai. Hum dekhte hai ki Parmit dry fruits ka supply karne ke liye Pakistani Army ke headquarters jaata hai, vahan par vo ek soldier ko dry fruits ki delivery karta hai. Delivery karne ke baad Parmit uss soldier se bathroom jaane ka raasta poochta hai. vo soldier Parmit ko bathroom ka raasta bata deta hai, Jiske baad Parmit bathroom jaane lagta hai, lekin vo bathroom mein jaane ki bajay kisi or room mein chala jaata hai or vahan rakhi files ko dekhne lagta hai. Kuch der tak files dekhne ke baad vo un files mein se ek paper ko fold karke apni pocket mein rakhta hai, or fir headquarters se chala jaata hai. Ghar pahunchne ke baad jab Parmit jaldi se us file ke paper ko kholta hai, or fir us paper ko dekhte huye vo transmitter ki madad se ek coded message RAW headquarters bhejta hai. Tab humein pata chalta hai ki Parmit asal mein or koi nhi balki RAW ka ek agent hai, jiska codename Gopi hota hai or vo pichle kai saalo se Pakistan mein Parmit Khanna ke naam se ek dry fruit supplier ke taur par reh raha hai.
Gopi ne isse pehle bhi kai important information India bheji hoti hai, jiski madad se RAW ne apne kai missions ko anjaam diya. Hum dekhte hai ki Gopi RAW ko coded message bhejne ke baad uss paper ko jala deta hai, taaki kisi ko uspar shak na ho. Gopi ne iss baar jo jaankari bheji hai, vo kaafi important saabit hoti hai, jiski vajah se RAW Pakistan ki ek badi saajish ko rok paati hai.
Kuch dino baad jab Gopi apne ghar se bahar Jaa Raha hota hai, to ISI ke kuch agents use kidnap kar lete hai. ISI Wale Parmit ko ek room mein le jaate hai, or usko bohot torture karte hai. ISI ne Gopi ko kidnap kar liya hai ye baat RAW ko pta chalti hai, jab ye baat RAW ke director Shenoy ( Girish Karnad ) ko pta chalti hai to vo kaafi chintit hone lagte hai. Shenoy jaldi se ek emergency meeting bulaate hai. Shenoy sabhi officers se iss baare mein baat karte hai. Ek officer kehta hai ki ,” humein Gopi ko jald se jald ISI ke changul se chudana hoga, Varna agar Gopi ne apna muh khol diya to RAW ki important information ISI ko pta chal jaayegi”. Shenoy us officer ko tokte huye kehte hai ki “nhi Gopi itna kamjor nhi hai, vo mar jaayega lekin apna muh nhi kholega”. Shenoy aage kehte hai ki,” Gopi humara agent hai, or use bachana humaari jimmedari hai or humein use kisi bhi keemat par bachana hoga”. Shenoy Karan ( Anant Vidhaat Sharma ) se Gopi ke baare mein or jyada jaankari nikaalne ke liye kehte hai.
Karan turant hi Gopi ke baare mein jitni ho sake utni jaankari nikaalne me jut jaata hai. kai dino ki mehanat ke baad Karan ko Gopi ke baare mein kuch jaankari pta chalti hai. Karan jaldi se Shenoy ke pass jaata hai or unhe batata hai ki Gopi ko kai dino ke torture ke baad Pakistan Occupied Kashmir ke Baltistan prant mein sthith ek high security jail mein band karke rakha gaya hai. Ye vahi jail hai jiska istemaal ISI apne dushmano ko torture karne ke liye karti hai. iss jail mein jaane wale kaidi kabhi vaapas nhi aate the. Ya to unhe maar diya jaata tha, ya fir unhe lifetime kaidi banakar rakha jaata tha. Karan aage batata hai ki Iss jail ki capacity 450 kaidiyon ki hai, lekin abhi isme 1000 se jyada kaidi band hai. Shenoy ne Gopi ke pakde jaane ki khabar Prime minister ko bhi di hoti hai. Prime minister bhi Pakistan ke upar international pressure banane ki koshish karte hai. Or isi international pressure ki vajah se ek Indian doctor ko Gopi ka health checkup karne ki permission mil jaati hai. Jab vo doctor Gopi ka check up karne ke liye jail ke andar jaata hai, to iss mauke ka faayda uthaate huye Gopi apne dwara ( द्वारा ) Shenoy ko likhi gayi ek chitthi ( चिट्ठी ) doctor ko pakda detaa hai. Vo doctor us chitthi ko blood pressure check krne wali machine mein chipakar jail se bahar laane mein safal ho jaata hai, or vo doctor India jaakar wo chitthi Shenoy ko de deta hai. Iss chitthi ko padhne ke baad Shenoy kaafi emotional ho jaate hai, or vo decide karte hai ki vo Gopi ko jald se jald us jail se chudayenge.
To Kya Shenoy Gopi ko chudaane mein kaamyaab honge ? Kya Tiger chudaayega Gopi ko ? Jaanenge iss blog ke agle part mein.
