1998 woh saal tha jab mashoor star Salman ka sabse mashoor blackbuck killing case samne aya tha. Yeh case sabhi news channels capture kar rahe the kyon ki Bollywood ke bhai ko Jodhpur court ne 5 saal ki saza suna di thi.
Magar isi saal kuch aur bhi hua tha. Coimbatore ke blasts bhi 1998 mein dekhe gaye the, jisse puri India ki janta dang reh gayi thi. Yeh series of bomb blasts the jo ki Coimbatore mein Hindu- Muslim riots ki wajah se hue the. Pehla hi blast Coimbatore Junction Railway Station par lag bhag 3:15 din mein hua tha jahan par 6 log maare gaye the. Yeh suicide bombers the jo ki BJP ke Lal Krishna Advani ko target lekar aye the. Unke election ke samay 2nd bomb SB Towers mein phute jahan 3 log mare, aur phir 3rd bomb Shanmuganandham Road par phuta jahan 4 log aur maare gaye. Uske baad 4th bomb Rajarajeswari Tower mein phuta aur uske baad Coimbatore General Hospital mein bhi ek car explode hui jismein 2 nurses, 1 doctor aur 1 patient bhi maare gaye. Yeh sabhi bombs kuch 1.5 ghante mein phut chuke the jisne pure Coimbatore ko hila diya tha. Kisne socha tha ki Tamil Nadu ki yeh pyari si city Jahan jharne aur itne sundar aur rangeen mandir hain, wahan khoon ki nadiyan beh rahi hongi.
Kul mila kar 12 bomb phate the uss din jismein 58 log maare gaye aur 200 log ghayal bhi hue the. Lekin yeh sab hua kyon?
Yeh bombings hui 1997 ke Coimbatore riots ke chakar mein. Coimbatore mein ek Police officer ki hatya kardi gayi thi aur woh bhi ek Muslim ladhke ne Al-Ummah ke detention dispute ko lekar. Iske baad Police walon ko gussa agaya tha aur unhone Hindu Munnani aur Hindu Makal Katchi ke members ke saath milkar innocent Muslim logon ki properties par hamla kardiya tha. Iss hamle mein baat aage badh gayi thi jiski wajah se Police ne open fire kardi thi. Iss open fire mein 10 Muslims maare gaye the. Woh Muslims jinka uss Police Officer ki hatya se kuch lena dena hi nahi tha. Riots ke antt mein 18 Muslim aur 2 Hindu apni jaan gawa chuke the. Itna hi nahi kuch Muslims ko zinda jala diya gaya tha, aur kuch ko tab tak mara gaya tha jab tak unki jaan na chali jaaye. Abb aise kale samay mein Muslims ke dil mein badle ki bhawna dikhi jiske chalte unhone Coimbatore mein yeh bomb blasts karwaye. Yeh bomb attacks riots ke lagbhag 2 mahine baad hi hogaye the, jisne Coimbatore ki janta ko Thanda chod diya.
Abb aisi hi kuch bomb attacks ki kahani hamein Sooryavanshi 2 mein dhalti dikh sakti hai.
Tab tak hamein subscribe karein aur hamare blog ko like aur share karna na bhulein.
Pratima Ratwani.
