Car racing ka culture famous toh khoob hai India mein, magar abhi tak kuch khaas races dekhne ko nahi mili hain. Log kaafi races jaise Formula 1 ke peeche pagal hain, aur iss saal 2022 mein aisa hi kuch naya aya hai India mein.
Haalin mein Hyderabad mein Telangana IT Minister K Tarakarama Rao ne Indian Racing League (IRL) event ko inaugurate kiya tha. Yeh bahut bada event tha, jiske liye puri India ki janta nazrein gadayi baithi thi. Yeh streetcar Racing mein ek naya badlaav hai, jo India ko dekhne ko mila hai, aur aisa hi event pehli baar Hyderabad mein organize karaya gaya hai. Iski 1st race, ji haan India ki pehli Indian Racing League ki race agle saal 2023 mein February 11 ko hogi, jiske liye India ki young janta toh khoob excited dikh rahi hai. Jab news channels par aise hi Hyderabad ke logon se, yaa yun kahein ki Hyderabad ki young janta se pucha gaya toh unki Khushi ka thikana nahi tha. Yeh IRL Formula E race ke liye trial bhi kehlaya jaa sakta hai. Formula E racing kaafi jaani pehchani race hai, jiska telecast lakhon log dekhte hain.
Iss race ke liye 2.83 kilometer lamba stretch Hyderabad ke hi Hussain Sagar ke aas paas tyaar kiya gaya hai. Yeh track NTR Gardens se hote hue IMAX tak pura federation ke instructions ke mutabik banaya gaya hai. Yeh mashoor International Federation of Automobiles ki demand hai jisse khaas taur par follow kiya hai taaki logon ke liye racing experience kaafi behtreen ban sake.
Iss race mein single seater cars 300 kilometer prati ghante ki speed se daudengi.
Aur thoda aur agar hum aapko batayein toh 6 teams ne Hyderabad mein ismein participate kiya hai, aur harr team mein 2 Indian drivers, 2 international drivers aur yaa tak ki 1 female driver bhi hogi!
Yeh race relay style mein hone wali hai, jisse dekh kar race ke deewanon ko khoob maza aane wala hai. Abhi tak kaun kaun si sports cars janta ko dekhne ko milengi yeh toh nahi pata chala hai, lekin already iss league ke liye log tickets khareedne ki koshish mein lag gaye hain.
Aaj tak jo raftaar Formula 1 mein dekhne ko mili thi, woh abb Hyderabad ki sadkon par bhi dekhne ko milne waali hain. Hyderabad ke log khaas kar iske liye khoob wait kar rahe hain, aur jaldi hi iske hoardings bhi laga diye jaayenge taaki iski publicity ho sake.
Toh bus race ki baat ho, aur race movie ki franchise hamare dimaag mein na aaye aisa toh ho nahi sakta. Isi liye hi aisa kuch hamein dekhne ko mil sakta hai.
Tab tak agar aapko hamara blog pasand aya, toh isse like aur share karein.
-By Pratima Ratwani.
