Dhoom franchise, criminals ko heroic andaaz dene ka kaam karti aayi hai. Pehle part me bike gangers ke baare me dikhaya gaya. Wahi Dhoom-2 loot pe aur Dhoom-3 bank robbery pe based thi. Aise me sochne waali baat yeh hai ki aakhir Dhoom-4 me kya hoga aur kis tarah ke crime ko iss baar anjaam diya jaayega? Dekha jaaye toh shayad iss baar jewellery heist ko shaamil kiya jaa sakta hai. Par Dhoom-4 ki kahani kaisi hogi, chaliye jaante hai.
Kahani hai 2007 ki, jab Harry Winston naam ke famous jewellery shop me achaanak kuch choron ne loot ko anjaam de diya. $37 million dollar ki yeh heist, criminals ko bahut munafa de gayi. Jab 6 October, 2007 ko Paris based Harry Winston ka shop khula, toh 4 chor pehle se hi dukaan me maujood the. Lekin sawaal yeh hai ki dukaan khulne se pehle woh andar pahuche kaise? Waise toh store ki keys har raat dukaan se door, security service dwara rakh di jaati thi aur phir subah 9:30 baje, guard ko dobara yeh keys di jaati thi. Iske baad guard baahar tab tak wait karta hai, jab tak ki dukaan ke baaki ke staffs naa aa jaaye. Asal me guard ko naa hi dukaan me akele ghusne ki permission hai, aur naa hi chaabi leke ghar jaane ki. Harry Winston ki baat kare, toh yeh ek famous brand hai, jo duniya bhar ke rare jewels ko bechta hai. Harry Winston ki dukaan Paris ke posh ilaake me stith hai. Winston ke alawa uss ilaake me aur bhi dusre bade brands the, jaise ki Valentino, Gucci, Dior yeh sabhi stores waha maujood the aur aisa bhi nahi tha ki, dukaan kisi sunsaan raaste pe thi. Inn sab ke bawajood aakhir uss din chori kaise hui chaliye jaante hai.
Harry Winston ki ek Emerald necklace uss din $3 millions dollar ke kareeb thi, jise choron ne baaki keemati patharon ke saath loot liya. Yeh sab, 6 October 2007 ke subah 9:50 ke lagbhag shuru hua, jab “Import-Export director” Anne Marie Capdeville (कैपडीविल) aayi aur security guards ko side entrance ka darwaza kholne ka order diya. Entrance pe lagayi safety machine se sabhi guzare aur general alarm band kar diya. Harry Winston ki dukaan humesha ki tarah white orchids ki acchi khushboo se mehak rahi thi. Guard ne apne keys ko workstation pe rakh diya aur phir bathroom ki taraf chala gaya. Kisi ne nahi socha tha ki din ke ujaale me, security alarms ke hote huye aur jab police station dukaan ke ekdam kareeb ho, tab bhi chori ko anjaam diya jaa sakta hai.
Anne 3rd floor pe based apne office ki taraf, seediyon ke raaste jaa rahi thi. Anne ko iss baat ka andaza bhi nahi tha ki chaaron chor apne saason ko rok ke, ek band darwaze ke peeche chupe huye honge. Anne apne office room ke anadar ghusi aur woh jaise hi apni jagah pe baithi, choron ne chaaron yor se Anne ko gher liya aur uska gala pakad liya. Choron ke paas laathi, dande aur handguns thi. Dukaan me kaafi dino se renovation ka kaam chal raha tha, jis baat ko chor kuch dino se mark kar rahe the. Yahi kaaran tha ki, chor painters ke kapde pehne aaye the, taaki logon ko aisa lage ki woh kaam karne waalon me se hi ek hai. Choron ne Anne ke gale ko jor se pakad neeche kiya aur jabardasti usse yeh jaan’ne ki koshish ki, ki aakhir store me kitne co-workers, uss wakt maujood the. Anne ne kaha ki, “sirf ek”. Do chor neeche gaye aur bathroom me maujood guard ke sir pe jor se attack kar diya, itna ki guard dar jaaye lekin behosh naa ho. Choron ko guard ki jarurat thi. Baaki ke bache do chor pehle se hi dari hui Anne ko bathroom me le gaye aur use muh ke bal neeche gira kar, uske dono haathon ko bandh diya. Chor jaante the ki, ab baaki ke staffs ke bhi aane ka wakt ho gaya hai. Issiliye unhone guard ko uski tay jagah pe jaane diya, jiski nigraani me baaki ke staff ko bina alert kiye anadar aane diya jaa raha tha. Guard ko jaisa kaha gaya, woh normal pretend kar raha tha. store ka manager Mathew aane waala tha, jinki gaadi me store me kaam karne waali do aur staffs bhi maujood thi. Gaadi ko park kar dene ke baad teeno security machines se guzare, jaise hi woh log andar ghuse, ladkiyon ko unke baalon ke sahaare kabze me le liya gaya aur unhe ghasit’te huye, bilkul Anne ki tarah haath baadh kar zameen pe muh ke bal gira diya gaya. Manager ke gardan pe gun point kar, lootere use mukhya seedhi se upar le gaye. Looteron ne Manager ko locker kholne ko kaha, lekin Manager itna darr gaya tha ki use lock ka sahi number yaad nahi aa raha tha. Chor uski gardan pe rakhi gun ko aur jor se daba raha tha. Fir ghabraya hua manager chillaya “Bérénice( बेहेनिस)ko bulaao!” Marie Bérénice naamak ek sales associate, jo abhi kuch hi der pehle store me aayi thi, uske bhi haathon ko unn looteron ne baandh diya. Halanki jab Manager ne Marie ko bulane ko kaha toh looteron ne uske haathon ko khol diya aur use 3rd floor pe le gaye, jaha pe dusre looteren Manager ke saath maujood the. Marie ne jaldi se locker me code enter kar diya. jaise hi locker khula, lootere jewelleries ko uski case se baahaar nikaalne lage aur uski chamak ko dekh, woh ek pal ke liye ussi me kho gaye. Iske baad ek chor ne Marie ko neeche jaane ka order diya, jaha pe keemti ghadi locker me store thi. Woh chor Marie ko locker ke paas le gaya aur kaha ki,“chinta mat karo Bérénice, mai baakiyon se accha hu”, aur aisa keh kar woh chor apne bag me rose-gold triple tourbillon watch ko bharne laga. Issi ke baad jor se ek chor chilaane laga, “Farid humare paas time nahi hai…humare paas time nahi hai.” Chor ke aisa kehte hi baaki chor bhi alert ho gaye aur jaldi jaldi bhaagne lage. Bhaagte huye unn choron ne saare cctv footage ke tapes ko apne saath le liya aur bathroom me kaid(कैद) staffs pe “tear gas” bhi chod diya. Chor store ke peechle gate se apni rented minivan se faraar ho gaye. Unn choron ne jo uss din 480 pieces ko loota tha, woh aaj tak recover nahi ho paaya hai.
Loot ke baad apne aansuon pe kaabu paate huye, police ko employees ne bataya ki Farid ke alawa unhone ek aur naam suna tha aur woh tha “Voldemort”(वोल्डेमॉर्ट), jo ki fantasy novel Harry Potter me ek villain ka naam hai. Iss khabar ke baad saare media outlets me yeh baat fail gayi, aur log ise “self-aware” move batane lage. Logon ka kehna tha ki, Harry Potter ka reference, Harry Winston ke dukaan me chori karte wakt istemaal karna, choron ki strategy me shaamil tha. Iske alawa employees ne choron ke muh se “Zarca” kehte huye bhi suna aur toh aur criminals ne apne peeche koi clue bhi nahi choda tha. Naa hi unke koi fingerprints dikhe, naa hi koi DNA traces mile. Police ne kaha ki, “itne bade jewellery shop ko, woh bhi Paris ke beech shehar me lootna koi asaan kaam nahi hai. Iske peeche ek acchi planning aur experience ki jarurat hoti hai. Saaf shabdon me kaha jaaye toh isme kisi organization ka haath lag raha hai.”
Thode research ke baad pata chala ki ho sakta hai iss maamle me, pink panthers naamak gang ka haath hoga.
Ab yeh Pink panther kon hai aur inke group ko kon chalata hai, jaisi saari baatein hum apne aane waale video me jaanenge. Iske alawa hum yeh bhi jaanenge ki aakhir Pink Panther ne Harry Winston ko hi apni loot ke liye kyun chuna, jab ki yeh dukaan Paris ke beechon beech tha. Toh inn sawaalon ke jawaab jaan’ne ke liye bane rahiye humare saath iss channel pe, jiska naam hai Bollygrad studioz.
TO BE CONTINUED…. PART-1