Pichli video me humne dekha ki kaise John Dillinger(डिलिंगर) jail se chutne ke baad waapas se crime ki duniya me aa jaata hai. John Dillinger ab pehle se jyada corrupt aur tej ban kar lauta hai. Dillinger jail me bane apne kuch criminal dosto ke saath milkar, bank ko lootne ki taiyaari me hai. Issi kaam ke liye usne famous Bank robber “Herman Lamm”(हरमन लैम) dwara istemaal kiye gaye steps ko baariki se padh liya, taaki bank ko lootne me use asaani ho. Jail se chutne ke turant baad Dillinger ne “New Carlisle(कारलाइल) National Bank” ko loota aur waha se 10,000 dollars lekar faraar ho gaya. August 14, 1933 me, Dillinger ne Ohio ke ek bank ko loot kar apne dusre vaardaat ko anjaam diya. Lekin issi beech Ohio ki police, Dillinger ko pakadne me kaamyaab rahi aur use Ohio ke Lima ke ek jail me bhej diya. Lekin jail me daalne se pehle police ek baar Dillinger ki talaashi leti hai, jisme unhe ek document haath lagta hai. Asal me uss document me jail se bhaagne ka plan likha hua tha. Par police jab Dillinger se document ke baare me inquiry karti hai, toh woh unhe kuch nahi batata.
Wahi isse pehle bhi jab Dillinger jail me tha, toh woh apne criminal dost Russell, Pete ke alawa 6 dusre criminals ko jail se nikaalne ke liye plan taiyaar kar chuka tha. Jail me Dillinger ke kuch dost bhi the, jo jail se gun ki smuggling karte the. Yeh log Dillinger ke pakde jaane ke chaar din baad hi, use bacha kar jail se baahar nikaalte hai. Dillinger jab chori ke maamle me jail gaya tha tab wahi pe uski dosti Russell, Pete, Clark aur Harry jaise logon se hui thi. Yahi log aage jaakar “Dillinger gang” ka hissa ban gaye aur milkar crime karne ka waada kiya. Iss gang me Hamilton naam ka bhi ek member tha, jo pehle famous Bank Robber, Herman Lamn ki gang ka hissa reh chuka tha. Wahi jab Dillinger lima ke jail me band hua toh, uske gang members achaanak police officer ki wardi pehan kar, jail ke andar aa gaye aur Dillinger ko kahi aur le jaane ki baat kahi. Jab asli officers ne Dillinger ki gang ke member se identity card maanga, toh Pete ne asli officer ke sir pe goli chala di aur Dillinger ko jail se riha kar bhaga le gaye. Dillinger ko chudane ke liye 3 aadmi aaye the, jo waapas Indiana jaa kar, apne baaki ke members se mile. Yaha se Dillinger ne apni gang ke saath milkar saal 1933 se 1934 ke beech 12 banks ko loota. 1933 ke November me, Dillinger Evelyn nasm ki ek ladki se ek nightclub me mila aur phir dono saath ho gaye. Evelyn ke mutabik Dillinger uske liye kaafi accha tha aur use ek “lady” ki tarah yaani ki respectfully treat karta tha. Evelyn ke mutabik Dillinger uske liye cars, pets, jewelries laane ke alawa, use baahar bhi ghumata tha. Evelyn ke mutabik Dillinger ne woh sab kuch kiya, jo ek ladki ko chahiye hota hai. January 25, 1934 yeh wo din tha jab bank loot ke kaaran Dillinger aur uski gang ko Arizona me pakad liya gaya. Yaha se unhe Indiana state police dwara, Arizona se Indiana laaya gaya. Dillinger ko Indiana ke hi ek jail me kaid kiya gaya aur uss par bank robbery ke duaran, ek police waale ki hatya karne ka aarop laga. Wahi har baar kyunki Dillinger jail se bhaag jaata tha, issi wajah se iss baar Dillinger ko “escape proof” jail me rakha gaya. Police ne saare newspapers me khabar chapwa di ki, Indiana ka yeh jail poori tarah safe hai aur yaha se Dillinger bhaag nahi sakta. Iske alawa jail me extra guards ko bhi tainaat kiya gaya tha. Indiana ke iss jail me Dillinger ke liye khaas safety ke poore intezaam kiye gaye the, halanki tab bhi Dillinger 3 March, 1934 ko jail se bhaagne me safal raha. Asal me Dillinger baaki ke 15 kaidiyon ke saath subah ka exercise kar raha tha, ussi dauran achaanak Dillinger apne pocket se pistol nikaal kar jail ke officers ko hairaan kar deta hai. Dillinger 2 officers ko apne kabze me leta hai aur bina ek bhi goli chalaye, woh jail se bhaagne me poori tarah se successful ho jaata hai. Wahi Dillinger ke bhaagne ke baad pata chalta hai ki, jis pistol ke sahare Dillinger faraar hua tha, woh asal me nakli tha. John Dillinger jab jail se faraar hua, uss dauran ek dusra kaidi bhi Dillinger ke saath faraar ho gaya tha, halanki woh kuch dino baad Police ke haathon maara gaya. Issi criminal ne police ko bataya ki Dillinger, Michigan ke ek ilaake me chupa hua hai. Iss jaankaari ke baad Police turant Dillinger ki khoj me nikal padi, lekin Dillinger unke haath nahi lag paaya. Dillinger ko khoj nikaalne ke liye special jury aur “Bureau of Investigation” ki team ko taiyaar kiya gaya. Wahi Dillinger jab Indiana ke jail se bhaaga, toh woh seedhe jaakar apni dost Evelyn se mila, jisne Dillinger ko apne apartment me chupane me madad ki. Jaankaaron ke mutaabik Dillinger Evelyn ke ghar 2 hafte tak ruka. Iske baad woh dono Minnesota chale gaye aur waha ke ek apartment me 15 din rahe. Iske baad Dillinger apne saathi Hamilton se mila, jiske baad dono ne milkar apni ek nayi gang banayi, jisme kuch aur bank robbers bhi shaamil the. Dillinger ne apne nayi gang ke saath milkar, South Dakota ke ek bank aur Mason city ke “National bank” ko loot liya. Iss ghatna ke baad Dillinger Evelyn ke saath Minnesota ke hi dusre apartment me rehne lag gaya. Apartment me rehne ke liye dono ne Mr. And Mrs. “Carl T. Hellman” ke उपनाम ka istemaal kiya. Halanki Apartment ki landlord Daisy ko unn dono pe shak tha. Jis wajah se thodi jaanch-padtaal karne ke baad Daisy seedhe FBI office ke pass gayi aur Dillinger Evelyn ko lekar officers ko kuch jaruri jaankaari di. Daisy ne yeh bhi bataya ki apartment ke peeche Dillinger ne apani nayi gaadi ko park kiya hai.
Daisy ki jaankaari ke basis pe officers ne do agents Rufus aur Rusty Nall ko raat bhar apartment ki nigraani karne ke liye kaha. Lekin agents ne uss dauran kuch bhi ajeeb nahi paaya. Ho sakta hai issiliye, kyunki uss wakt kamre ka parda dhaka tha.
Agli subah police officer Henry ke saath agent Rufus, Dillinger ke ghar ke darwaze pe pahuche aur use knock kiya. Knock ki awaaz sunkar Evelyn ne darwaze ko 2 se 3 inch tak hi khola. Isse pehle ki officers kuch keh paate, Evelyn ne unse request ki, ki woh thodi der me aaye, kyunki woh abhi thik se dressed nahi hai. Halanki officers ne kaha ki woh baahar intezaar kar lenge. 2 se 3 min tak intezaar karne ke baad, Rufus apartment ke basement me gaye, jaha pe caretakers rehti thi. Unse Rufus ne phone maanga taaki woh FBI ko phone kar sake. Call karne ke baad woh waapas police officer Henry ke paas laut aaye aur Evelyn ke darwaza kholne ka wait kiya. Issi dauran Dillinger ka saathi Homer bhi aa gaya. Homer ne Rufus se pucha “kya tumhara naam Johnson hai?” ispe Rufus ne “naa” me jawaab diya. Iske baad Homer seedhiyon se neeche jaane laga ki tabhi Rufus ne Homer se uska naam pucha, jispe Homer ne kaha woh “soap salesman” hai. Agent Rufus ne Homer se sawal kiya ki ‘aakhir uska sample kaha hai.’ Homer ne turant jawaab diya ki ‘usne apne soap samples ko gaadi me rakha hai.’ Rufus ne phir Homer se sawaal kiya “kya tumhare paas koi certified document hai?” Homer ne “naa” me jawaab diya aur phir neeche jaane laga. Rufus kuch der socha aur phir Homer ka peecha karte huye Apartment ki lobby me aa gaya, jaha pe pahuch kar Homer ne Rufus pe khuleaam goli chala di.
Kahani yaha se ek interesting twist lene waali hai kyunki police ka Dillinger ko pakadna ab thoda mushkil hote jaa raha hai. Aage hum jaanenge ki aakhir kis tarah se police Dillinger ko apne jaal me phasane me kaamyaab hoti hai aur kis tarah se Evelyn bhi Dillinger ki wajah se phansti hai. Toh bane rahiye humare saath iss channel pe jiska naam hai Bollygrad studioz.
To Be Continued…part-2