Doris Marie Payne ek aisi aurat hai, jise duniya ke notorious चोरों ki list me, shaamil kiya jaata hai. Doris ka janam 10 October 1930 ko, U.S.A ke West Virginia me hua tha. Doris ke pita David coal miner the, wahi unki maa Gilbert house wife thi. Doris ke 4 bhai aur ek behan hai. Doris Payne kareeb 6 dashak tak robbery ke dhandhe me shaamil rahi, jis beech use kayi baar arrest bhi kiya gaya.
Doris “Career criminal” thi, yaani ki woh insaan jo apni zindagi me crime ko apna profession banata hai aur lagataar ek ke baad ek Crime karte jaata hai. 1970s me Doris ko, Monte Carlo se 10 carat ki diamond ring churane ka doshi banaya gaya tha. Diamond ring ki keemat 500,000 US dollar thi, jo waise toh 4 crore rupaye hoti hai, lekin aaj ke zamane me iss ring ki keemat kaafi jyada hai. Doris iss ghatna ke baad France chali gayi. Halanki use France ke ek shehar me arrest kar liya gaya aur phir use Monte Carlo le jaya gaya. Yaha pe Doris 9 mahine tak hirasat me rahi, kyunki authorities diamond ka pata lagane me nakamyab the.
2010 me bhi Doris giraftaar hui thi. Asal me iss baar usne California ke hi ek store me rakhe “Burberry” brand ke trench coat se tag hata kar, khud uss coat ko pehan kar dukaan se baahar aa gayi thi. Iss coat ki keemat kareeb 1300 dollar yaani ki 1 lakh rupay thi. Iske baad 2013 me, Doris ko 83 saal ki umar me 22,500 dollar ki diamond ring churane ke aarop me California se hi giraftaar kiya gaya tha. Doris ne iss chori ke liye 2 saal jail me aur do saal Parole pe bitaye the. Iss jurm ke baad Doris ko jewellery shop se door rehne ko keha gaya tha. Jail se riha hone ke baad bhi Doris chori karti rahi. 2015 me uspar aarop laga ki usne 33,000 dollar ki ring churayi hai, halanki iss baat ko lekar koi strong saboot nahi mil paaya. 2015 me ek hi baar Doris police ke nishaane pe aa gayi, jab ek store ke security camere me Doris ko Christian Dior ke earrings ko apne pocket me rakhte huye dekha gaya. yeh ghatna U.S ke Atlanta me hui thi. Iss jurm ke baad Atlanta ki police ne Doris ko giraftaar kar liya.
Doris apne crime ko lekar humesha se hi khul kar kehti aayi hai. Doris ke mutabik woh abtak apne 20 उपनाम, 10 phone numbers aur 9 date of birth ka istemaal kar chuki hai. 2015 me Doris ek aur Jewellery shop me gayi aur jab woh dukaan se nikali, toh store ke employees ne paaya ki 33,000 dollar ki ek diamond ring store se gaayab hai. Police department ne aas-paas ke saare jewelers ko iss baare me khabar kar di aur unhe sambhal kar rehne ko kaha. Doris ke khilaaf iske baad arrest warrant jaari kiya gaya. Iske alawa bhi Doris ne aage chal kar kuch keemti bracelets aur jewelries ko churana jaari rakha.
Doris Payne pe ek documentary film bhi bani hai, jiska naam “The Life and Crimes of Doris payne” hai. Iss documentary me, Doris ne apni life me abtak kiye gaye choriyon(robberies) ke baare me bataya hai. Iss documentary me Doris ne apne criminal career ke saare details diye hai, ki aakhir woh kaise 2011 me arrest hui thi aur usne kaise keemti jewelries ko churaya tha. Iss documentary ka aakhiri interview, Doris ne jail me rehne ke dauran diya. Halanki woh jald hi yaha se release ho gayi aur aage chal aur bhi choriyon ko anjaam diya.
Doris ki zindagi pe gaur kare toh woh kehti hai, unka janam coal ke shehar ke beech hua. Doris ke pita padhe-likhe nahi the aur woh Virginia ke hi coal mine me kaam karte the. Doris bachpan me hi depression ki shikaar ho gayi thi. Doris ko kaha jaata tha, ki unke sapne unn jaisi black ladkiyon ke liye bilkul bekaar hai. Doris aise logon se ghiri hui thi, jo unke potential ko humesha limit karte aaye the. Doris ek jewellery shop me kaam karti thi, jaha ke owner ne ek White customer ke aane pe Doris ko dukaan se baahar nikaal diya tha. Halanki naa hi racism aur naa hi gareebi Doris ko rokne ke liye kaafi thi. Doris ko jo karna tha woh usne kiya aur unhone apni maa ko abusive(अपमानजनक)relationship se bhi bachaya. Doris apni sujh-bujh se jald hi jewellery heist ke dhandhe me aa gayi aur phir woh kabhi nahi ruki. Doris kyunki Diamond churati hai, issiliye unhe “Diamond Doris” bhi kaha jaata hai.
Doris Payne racial inequality ke bhi khilaaf thi. Woh jab bhi apni maa ki magazine ko padhti toh usme white models ko keemti bracelets pehne dekh, Doris humesha sochti thi ki, “woh mere se behtar nahi hai.” Doris ke pita abusive husband the, yahi kaaran raha ki jald hi Doris ne apni maa ko pita David se छुटकारा dilwaya. Jab Doris U.S ke Cleveland me reh kar nurse ka kaam sambhaal rahi thi, toh woh apna thoda wakt nikaal kar Pittsburgh bhi chali jaati thi taaki woh waha se kuch jewels ko chura sake. Doris ki sab se badi chori tab hui jab woh sirf 23 saal ki thi. Asal me Doris ne Pittsburgh ke hi ek jwellery shop se, 20,000 ki keemat ka diamond ring chura liya tha. Halanki iss chori ke baad Doris ko aisa lagne laga ki koi uska peecha kar raha hai, jisse woh ghabra gayi aur apni raat ek station ke bathroom me bitayi. Agli subah woh apni iss chori se itni jyada pareshaan thi ki woh waapas uss ring ko lautane dukaan chali gayi, halanki raaste me hi Doris ko ek resale store dikha jaha pe Doris ne 7,000 ke extra profit ke saath uss ring ko bech diya. Aaj ke zamaane me uski keemat kareeb 65,000 dollars, yaani ki 53 lakh hogi.
Bhale hi Doris ke crime se aa rahe paison ne uski zindagi se financial burden kam kar diya ho, lekin yeh cheezen kabhi bhi uski maa aur Doris ko nazdeek nahi laa paayi. Doris ne apne paison se kayi saare ghar khareede the, taaki uski maa aur woh aaram se reh sake. Par Doris ki maa धार्मिक thi aur issi wajah se woh humesha Doris ko uske crime ke liye tokti thi, lekin iska matlab yeh nahi tha ki Doris ki maa unn paison se mil rahe aaram ka maza nahi leti thi. Doris ne bhale hi shaadi naa ki ho, lekin uske do bacche hai, jinka naam Ronny aur Rhonda hai, jinhe Doris ne unke pita ke ghar bhej diya tha. Halanki woh har mahine unke kharch ko cover karne ke liye paise bhijwa deti thi. Doris ka maan’na tha ki woh maa banne laayak nahi hai. Doris kehti hai “ek aurat jo world-class theif(chor) banne ki raah pe hai, woh apna jyada samay ghar pe nahi bita sakti.” Wahi 1950s woh daur tha jab Doris ne chori ko apna full-time job bana liya tha.
Doris apne maata-pita ke failed marriage ke baare jaanti thi aur iss wajah se uska shaadi ko lekar kabhi accha perspective nahi raha. Doris kehti hai “shaadi aapko sirf brutality se baandhti thi.” Doris ki sabse acchi soch yeh hai ki woh kabhi bhi financially, ek aadmi pe dependant nahi hona chahti hai.
Doris aaj 92 saal ki hai. Shyaad ab woh choriyon se door hai. Woh aisa ek wakt pe aakar band karna bhi chahti thi, lekin kyunki chori uski aadat ban gayi thi issi wajah se woh aisa kar nahi paa rahi thi.
Toh yeh thi Doris Payne ki kahani, jo ek female jewel thief hai. Sunne me aaya hai ki iss baar Dhoom-4 me Deepika Padukone nazar aane waali hai, issi wajah se iss baar ek female gangster ka shaamil hona lagbhag tay hai. agar kahani jewellery heist pe based hogi toh Deepika ka kirdaar Doris pe kuch hadd tak based ho sakta hai. Par ab dekhna hoga ki film ka plot aakhir iss baar kis direction me jaayega.
Khair, toh yeh thi aaj ki kahani, agar aapko yeh blog pasand aayi toh ispe comment karna naa bhule dhanyawaad.
The End