2007 me Kerala ke “Chelembra bank robbery”(चेलेम्ब्रा) ko kerela ki sabse badi bank robbery kahi jaati hai. Kerela ke Malappuram district me stith yeh bank, 2007 ko choron ke nishaane pe aa gayi thi. Loot ke liye choron ne “Kerala Gramin bank” ke floor pe hole kar diya tha aur waha se kareeb 80 kg ka sona aur 50 lakh rupay lekar faraar ho gaye the. Iss loot ko film Dhoom se bhi jodi jaati hai, kyunki iss loot ko anjaam dene waale chor ko loot ka idea, film Dhoom me John Abraham ko dekh kar aaya tha.
Kahani ki shuruat hoti hai 2007 se, jab shaam ke wakt Kerala ke Malappuram district me sith Chelambara naam ka ek chota sa gaaon, pure desh me headline banane laga. Jab logon gaur se kahani ko jaan’ne ki koshish ki, tab unhe pata chala ki raat ke wakt Kerala bank se looteron ne kareeb 8 crore ke rakam ka sona aur 50 lakh rupay cash ki loot ki hai. Jab police investigation karne aayi toh naa hi unhe koi fingerprints mili aur naa hi koi dusra saboot. Bas mila toh zameen pe kiya gaya ek bada sa hole aur bank ke diwaar pe likha tha “Jai maa” jise dekh kar yahi samjha jaa raha tha, ki yeh ho na ho kisi Naxalite ka hi kaam hai. Police bhi issi soch ke saath jaanch karna shuru kar chuki thi. Lekin aage jaa kar police ke haath ek phone number laga, jisse yahi pata chala ki jis chor ko police Naxalite samjh rahi thi, woh asal me khud ko Dhoom ka John Abraham samjhta hai. Issi ke saath maamla police ke liye thoda aur mushkil ho gaya. Halanki police bhi yeh baat samjh chuki thi ki agar chor khud ko Dhoom ka John Abraham samjhta hai, toh police bhi khud ko ACP Dixit yaani ki Abhishek Bacchan samjhne se peeche nahi hategi. 23 police waale ACP Dixit ki tarah poore 57 dino tak chor ka peecha karte rahe, lekin chor kaafi chaalaak tha aur unn saare police waalon ko maat dene me kaamyaab raha. Par sawaal yeh hai ki aakhir woh chor kon tha? Aur kis tarah se usne itne bade bank loot ko anjaam diya? Kya sirf Dhoom film hi dekh lene se logon ke andar loot karne ki kala jaag jaati hai? Are nahi aisa nahi hai. kyunki chor ke andar chori ki aadat bachpan se thi. “Babu” naam ke iss chor ki criminal history hume uske bachpan me le jaati hai, jab usne Christmas ke mauke pe पटाखे ki dukaan se patakhe chura liye the. Kerala me jyadatar log converted Christians hai. aise me waha pe Christmas ka mahaul bilkul Diwali ki tarah nazar aata hai aur Kerala ke logon ke liye yeh festival, kaafi khaas bhi hota hai. Babu ke liye bhi yeh din khaas tha aur usne issi liye patakhe ki dukaan ko apna pehla nishana banaya aur yahi se Babu ne criminal duniya me apna pehla kadam rakha. Aage jaa kar bhi Babu chote-mote crime ko anjaam deta raha, jiske liye use kayi baar jail ke chakkar bhi kaatne pade, lekin waapas laut kar woh phir ussi criminal dhandhe me shaamil ho jaata tha. Ek tarah se chori aur chote-mote apraadh uski zindagi ka hissa ban gaye the. Aise hi ek baar Babu kisi jurm me jail gaya tha, jaha pe uski mulakaat Shibu naam ke ek dusre apraadhi se hui. Issi dauran Babu ne Shibu ko apna bada sapna bataya. sapna tha “Ek badi chori ko anjaam dena aur phir maze ki zindagi bitana.” Lekin Babu ke iss sapne ke beech ek Anita naam ki ladki aa gayi, jise Babu pasand karne laga aur jald hi dono ne shaadi kar li. Pata chala ki Babu ki jis ladki se shaadi hui hai, uske pita ameer hai. Iss kaaran Babu ki zindagi aaraam se guzarne lagi. Shaadi ke baad Babu ne choti-moti jobs bhi talaashi, jisme woh kuch dino tak ek magazine ka editor raha aur kuch wakt tak desi drugs ki selling ki. Issi dauran Babu ki mulakaat ek baar phir Shibu se hui. Shibu ne Babu ko uske khoye sapne ke baare me yaad dilaya aur Babu ke andar uss sapne ko phir jagaya. Dono kuch dino tak kayi meetings bhi karte rahe, jisme woh paise kamane ke tarikon ke baare me discuss karte the. Issi beech unhe bank lootne ka idea aaya, jo unhe kaafi pasand bhi aaya. Babu aur Shibu ko yeh idea Dhoom film dekhkar aayi thi.
Wahi ab baari thi apne plan ko implement karne ki. Issi wajah se dono ab apne ilaake ke chote-bade banks pe nazar rakhne lage. Kuch dino tak aisa karne ke baad unhone “Chelembra gramin bank” pe apni sehmati banayi. Iss bank ko select karne ke peeche 2 bade kaaran the. Asal me jab Babu aur Shibu bank pe nazar daal rahe the, toh woh dekhte the ki Chelembra bank me raat me koi guard nahi maujood hota hai. Iske alawa bank 2nd floor pe stith hai, jiske neeche ek restaurant hai. Babu aur Shibu ke plan ke anusaar, unhe issi restaurant se apni loot ki zameen taiyaar karni thi. Yaani ki woh yahi se bank ke floor ko kaat’ne waale the aur loot kar faraar hone waale the.
Babu aur Shibu ne do aur logon ko loot me shaamil kiya aur who the Radhakrishnan aur uski wife, Kankeshwari. Chaaron logon ko lekar Babu restaurant ke maalik se milne gaya aur use 50,000 per month aur 300 rupay per day pe, restaurant unhe rent pe dene ka offer diya. Offer sun kar maalik turant maan gaya aur Babu aur uske gang ko restaurant rent pe dene ko taiyaar ho gaya. Deal set hone ke agle din tak table-chair jaise dusre restaurant ki cheezen laayi gayi. Babu ne uss jagah kayi saare building material bhi collect karwa diye, taaki aisa lage ki building me remodeling ka kaam chal raha hai. Agle kuch mahinon tak sab kuch normal raha. restaurant ke andar se tod-fod ki awaazein sunayi dene lagi, lekin kisi ko bhi shak nahi hua. Andar se Babu aur uske saathi restaurant ki chat yaani ki Bank ke floor pe hole bana rahe the. 30 December 2007, ko Babu restaurant me bane uss hole ke raaste se bank me ghusa, aur gas cutter ki madad se bank ke locker ko kaat diya. Iske baad Babu ne bank me rakhe sone aur cash ko apne kabze me liya aur mauke se chaaron faraar ho gaye. 31st December 2007 ko har din ki tarah bank khula lekin waha ke staffs ne paaya ki bank se cash aur sona dono gaayab hai. Yeh chori kareeb 8 crore se jyada ki thi. Itni badi khabar ko sun, pal bhar me pura desh hairaan bhari nazaron se news Channel ko dekhne lag gaya. Yeh uss dauran ki sabse badi bank robbery thi, jis wajah se choron ko pakarne ka pressure police pe pura tha. Turant Malappuram ke S.P ki nigraani me police team form ki gayi, jo choron ko pakarne ke liye puri tarah se taiyaar thi. Lekin police ke liye yeh kaam bilkul bhi asaan nahi tha. Babu ne itni safayi se chori ko anjaam diya ki usne naa hi restaurant me aur naa hi bank me apni koi fingerprints chori thi. Saboot ke naam pe bus bank ke floor pe bani badi si hole thi aur dusra usi ke diwaar pe “jai maa” ka naara likha gaya tha. Malappuram me uss dauran Naxalite ka bhi kaafi bol-bala tha. Naxalite pichle kuch saalon me iss ilaake me kayi chote-mote banks ko loot chuke the, jis wajah se police ka pehla shak unhi pe gaya. Par kuch hi wakt me police ko kuch calls aane lage, jo shayad unke liye suraag ka kaam kar sakte the. Pehla call Hyderabad ke ek hotel se aaya, jaha ki ek room me kuch sone mile the. Wahi jabtak police ispe dhyaan deti unhe aur bhi calls aane lagi. Police jald hi samjah gayi ki yeh sab choron ki hi saajish hai, taaki police main case se distract ho jaaye. Police ne naye tarike se jaanch ko phir se shuru kiya. Asal me jis ilaake me chori hui thi usi ke paas ek mobile tower tha. Police ka kaam tha ghatna waali raat iss tower se gayi sabhi calls ko trace karna. Lekin yeh utna asaan nahi tha jitna ki lagta hai. Police ko kareeb 20 lakh calls ko monitor karna tha. Isme kayi hafton ki mehnat gayi, tab jaakar police ko ek number pe shak hua, jisse koi “Babu” naam ka aadmi baat kar raha tha. Babu uss raat CDMA(code division multiple access) phone ka istemaal kar raha tha, jisme Sim lagane ki koi jarurat nahi hoti hai. Are wahi phone, jisse Taarak Mehta me Daya apni maa ko phone kar kehti hai “Haa Maa”. Yeh ussi tarah ki phone thi. Wahi police bhi jaise-taise Babu ke asli location ko trace karne me kaamyaab rahi. Police Babu ke asli ghar tak pahuchi aur use arrest kar liya. Baad me pata chala ki uska asli naam Joseph tha. Babu jaise hi pakra gaya, usne turant Shibu ke thikaane ke baare me bata diya. Pata chala ghatna me shaamil Radhakrishnan ki wife Kankeshwari, use chod Shibu ke saath hi reh rahi thi. 57 dino ki khoj ke baad Police saare apraadhiyon ko pakarne me kaamyaab rahi. Police loote gaye maal me se 80% maal, recover karne me kaamyaab rahi. 5 saal tak iss maamle pe sunwayi hui, jisme Kankeshwari ko chod sabhi apraadhiyon ko 10 saal ki saza sunayi gayi. Wahi Kankeshwari ko 5 saal ki saza mili. Jab Babu jail se waapas aaya toh sudharne ke badle, usne ek aur jewelry shop me loot karne ki sochi. lekin woh dukaan me lage cctv camere ki wajah se pakra gaya. Iss case ki sabse acchi baat yeh rahi ki 20% loot ka maal jo choron ne bech diya tha, woh bhi recover kar liya gaya. Aur jabtak yeh recover hua, tabtak inn sone ki price kaafi jyada badh chuki thi. Aisa 2008 me aaye financial crisis ki wajah se hua.
Issi ke saath bank ka maal, jitni looti gayi thi usse double amount me use waapas mil gaya.
Wahi bhale yeh chori film Dhoom se inspired ho, lekin ho sakta hai ki Dhoom-4 iss chori se inspired ho jaaye. Agar aisa hua toh yeh apne aap me hi ek history create kar jaayegi.
The End