Women safety ki baat aati hai toh sabse pehle entertainment industry ko hi witness box me rakha jaata hai. Aisa issiliye hai, kyunki aksar iss industry se joodi ladikiyon ko harassment se guzarna pad hi jaata hai. Yaad hai jab Housefull-4 under production thi aur usi dauran film ke director Sajid Khan “MeToo” campaign ke shikaar ho gaye the? Agar yaad hai toh aapko yeh bhi yaad hoga ki kaise film ke lead actor Akshay Kumar Sajid se doori banane ko puri tarah se taiyaar the. Agar yaad nahi bhi hai toh fikr not! Hum hai na!
Aaj hum aapko ussi dauran ki puri kahani batane jaa rahe hai. Yeh maamla shuru hua Housefull ki actress, Lara Dutta ke husband Mahesh Bhupati se. Asal me Mahesh Bhupati Mumbai me huye “We the women” movement ka hissa bane, jaha pe women safety aur assault se joodi baatein aur kahani batayi jaa rahi thi. Kayi ladkiyan harassment se joodi apni experiences bata rahi thi, tabhi stage pe Mahesh Bhupati aaye aur mic ko haath me lekar ek bahut hi controversial baat kar di. Mahesh ne kaha ki unki wife Lara Dutta ke mutabik, Housefull ki ek actor Sajid dwara bully hui thi. Mahesh kehte hai “yeh tab ki baat hai jab mai aur Lara ek dusre ko date kar rahe the. Lara uss wakt Housefull ki shooting kar rahi thi, issi silsile me hum London aaye huye the. Lara ki sabse close friend ek hair-dresser thi. Jab bhi Lara ghar waapas aati, woh ghaton apni dost se Sajid ke baare me baat karti ki kaise woh film ki ek co-actor se badtimizi se pesh aa raha the” Sajid Khan ka naam uss din jaise hi Mahesh Bhupati ne liya sabki aakhein hairaan nazron se ek dusre ko dekhne lag gayi. Kisi ne nahi socha tha ki Sajid bhi kisi ko aise treat kar sakte hai. Mahesh ne aage kaha ki “Maine Lara ko kaha tha ki kaise naa sirf tumhari balki tumhare co-stars ki bhi iss maamle me galti hai. Agar tum log Sajid ko kisi ke saath galat behave karte huye dekh rahe ho aur koi action nahi le rahe, toh yeh tum sab ki bhi galti hai.” Mahesh ne jab yeh baat Lara se kahi thi, toh unhone bhi Mahesh ki baaton se sehmati jatayi thi. Halanki logon ka kehna yeh bhi tha ki “Sajid ke khilaaf khada hona kaafi mushkil hai, kyunki kayi logon ka career hi unpe depended hai. Yeh baat aisa maahaul create kar deti hai, jis wajah se aurat kuch bhi kehne se pehle kayi baar sochti hai. Kyunki unka ek galat step unke career ko khatre me bhi daal sakta hai.” Yeh baat waha pe maujood ek journalist ne Mahesh se kahi thi, jo sahi bhi thi. Lekin Mahesh ne kaha ki agar log galat baaton pe awaaz nahi uthayenge toh phir aage bhi woh insaan wahi karega. Mahesh ki baat sirf Mumbai ke uss event tak hi seemit nahi rahi. Asal me unki yeh baat itni viral ho gayi ki dheere-dheere baaki ke actors bhi saamne aane lage aur Sajid ke khilaaf awaaz uthaane lage. Dekhte hi Dekhte Sajid ‘MeToo’ campaign ke ek popular topic ban gaye. Yaha tak ki Bollywood Diva Bipasha Basu ne bhi Sajid ke khilaaf apni awaaz uthayi thi. Bipasha Basu ke mutabik Sajid ajeeb jokes Crack karte the aur woh kaafi jyada rude bhi the. Mahesh Bhupati ne bhi Sajid ko “Vulgar aur Rude” kaha tha. Wahi Bipasha Basu ke mutabik film “Humshakal” unki life ka sabse kharaab experience tha. woh bhi sirf Sajid Khan ki wajah se. Aap sunna nahi chahenge ki aakhir Bipasha ne Sajid ko lekar kya kaha?
Bipasha kehti hai “Waise toh mere saath Sajid ne kuch nahi kiya, halanki woh set pe maujood dusri ladkiyon ke saamne khul kar lewd(bhaddi) jokes crack karte the aur woh baaki ladkiyon ke saath kaafi rude bhi the. Mujhe sabne yahi kaha ki mujhe unki level pe gir kar kuch bhi nahi kehna chahiye. Issiliye maine professionalism maintain rakh kar, shaanti se maine apna kaam khatam kar liya. Lekin maine shoot ke baad producer se keh diya ki mai ab aur iss film ka hissa nahi ban sakti, kyunki ab mai kabhi bhi apna temper ko kho sakti hu.” Bipasha ki baaton ko sun saaf pata chalta hai ki woh Sajid aur unke bartaav se kitni jyada gussa thi. Lekin ek professional career hone ki wajah se woh kuch keh bhi nahi sakti thi. Dekha jaaye toh aksar hi unn ladkiyon ko aise logon dwara target banaya jaata hai, jo unke under kaam karti hai. Warna Bipasha ya phir Lara Dutta jaise famous actresses ke saath aisa bartaav karne ke baare me Sajid soch bhi nahi sakte hai. Sajid jab subah uthe aur unhone apne baare me social media pe dekha toh unke toh hosh hi udd gaye. Jaha dekho waha, sirf “MeToo” me unka naam aa raha tha. Yaha tak ki unki co-actors hi khud aage aakar unki pol khole jaa rahi thi. Waise iss pure maamle me Sajid ki behan Farah khan door rahi. Ab kon beech me pade aur apna reputation bhi daav pe laga de. Yahi soch kar shaayad unhone bhi kuch nahi kaha hoga. Par inn sab se alag Akshay Kumar rahe, jinhone seedhe taur pe keh diya ki woh Sajid Khan ke saath aage bhi kaam karenge. Akshay ne kaha “mujhe nahi pata ki aakhir maamla kya hai. Par agar woh acquitted saabit ho jaate hai toh mai unke saath aage bhi kaam karna chahunga.” Ab Akshay ki iss baat pe kya hi tippani ki jaaye. Par yeh jarur hi keh sakte hai ki jab tak aise logon ko support milta rahega “Women safety” pe sawaal bhi uthta rahega.
Waise toh Housefull-4 ko lekar yeh bhi kaha gaya tha ki Sajid se film ki direction license lene ki baat chal rahi hai. Aise me ek bara sawaal yeh hai ki MeToo ke baad Sajid Housefull-5 me apni entry karte hai ya nahi.
Toh yeh thi aaj ki kahani agar aapko yeh blog pasand aaya toh ise ko share karna naa bhule.
Dhanyawaad.
The End.