U.P ek aisa rajya hai, jaha pe sadiyon se local gangsters ka bol-bala chala hai. Mirzapur ke Kaleen Bhaiya bhi issi raajya se taaluk rakhte hai aur unke jaise kayi aise gangsters hai, jise dekh koi bhi keh de “Don ko pakadna mushkil hi nahi naa mumkin hai.” U.P ke kisi bhi Don ka, asaani se police ke haathon aana utna asaan nahi hai, jitna lagta hai. Aisi hi ek kahani hume Gangster “Anshu Dixit” ki yaad dila rahi hai. Anshu Dixit kaafi naami criminal tha, jiski jail me goli lagne se maut ho gayi thi. Anshu U.P ke Sitapur ka rehne waala tha. Anshu ke pita provision store chalate the. Anshu ki do badi behan aur ek bhai tha. Kaha jaata hai ki Anshu sirf 12 saal ki umar se hi Sutli bomb(Hydro bomb) banakar logon me dar paida karne laga tha. Sutli bomb Indian pathake ka naam hai, jo jyadatar Diwali me istemaal kiya jaata hai. Anshu ke sutli bomb se logon ko darane ki baat jab police ke paas pahuchi, toh unhone ise Anshu ka bachpana samjh kar use jaane diya. Lekin unhe kya pata tha ki uss din ki ek छूट, unhe aage jaakar baadhi padne waali hai. Saal 2003 me tab ke samaajwaadi party ke MLC(member of legislative council) Bharat Tripathi ke bete pe, Anshu ki behan se badtimizi karne ka aarop laga tha. Iss maamle ko lekar pariwaar police ke paas pahucha, lekin politician ke power ke aage Anshu ke pariwaar ki ek naa chali aur bina FIR darj kiye, police ne Anshu ke pariwaar ko waapas ghar bhej diya. Bus phir kya tha police ka yeh behaviour Anshu ke man me reh gaya aur usne mann hi mann MLC Bharat Tripathi aur uske bete se dushmani leli. Issi ke baad Anshu ne police head office ke aage, MLC ke bete ki car pe fire kar diya lekin woh bach gaya. Anshu ne police ko ek baar apni criminal life history batayi thi. Anshu ke mutabik MLC Bharat Tripathi ka beta, aaye din Anshu ki behan ko pareshaan karta tha. Kitni baar neta ke bete ko samjhaya gaya lekin woh nahi maana. Ek baar neta ke bete ne khuleaam Anshu ki peetayi kar di aur uske baad goli bhi chala di, jo seedhe Anshu ke पैर me jaakar laga. Anshu ne iski complain police station me ki thi, lekin SO(station officer) ne neta ke bete ke khilaaf case file karne se saaf inkaar kar diya tha. Iss dauran Anshu aur uske pariwaar ko kayi tarah se mentally torture bhi kiya gaya. Issi ke baad Anshu ne thaan liya ki use ab Bharat Tripathi aur uske bete se badla leke rehna hai. Issi beech Anshu ko Faizabaad ke ek neta ka support mila, jiske through Anshu criminal world me aa gaya. Anshu Lucknow aa gaya aur Lucknow University me apna admission karwa liya. Sabhi jaante hai ki Lucknow University me kitni politics chalti hai. Yahi kaaran raha ki Anshu kayi criminals ke bhi contact me aa gaya. University me hi reh kar Anshu ki dushmani do student leader se ho gayi, jiske baad Anshu ne University ke neta “Vinod Tripathi” aur “Gaurav Singh” ki hatya kar di. 2007 me issi ke baad Lucknow me Anshu ke khilaaf pehla case file hua. Ab Lucknow aur Sitapur, dono jagahon ki police Anshu ko dhoondh rahi thi. Kyunki Anshu ne apne hometown Sitapur ke alawa ab Lucknow me bhi crime ki shuruat kar di thi. Kayi baar police ne Anshu ko pakadne ki koshish bhi ki lekin woh har baar hi faraar ho jaata tha. Issi beech Anshu ne Lucknow court me surrender kar diya. Police ne Anshu ko aaropi bana kar jail me daal diya. Anshu kayi saalon tak jail me raha. Beech-beech me uspe kayi tarah ki cases file hoti thi, jisse uski saza bhi badhti thi. Yahi kaaran tha ki Anshu ko ek jail se dusre jail transfer karwaya jaata tha. Jaanch me pata chala ki jaise hi Anshu 2007 me crime ki duniya me aaya, uske baad uska pariwaar kahi gaayab ho gaya. Anshu ka pariwaar kaha rehta hai aur woh kaha gaye, iss baare me kisi ko nahi pata. Anshu bhale hi crime ki raah pe aa gaya ho lekin woh B.Com tak padha tha. Anshu ki acchi English bhi logon ke beech popular thi. Woh U.P ke famous gangster Shri Prakash Shukla se kaafi jyada inspired tha aur ussi ki raah pe Anshu chalne ka sapna dekhta tha. 2021 me garmi ka wakt tha, jab Anshu ne achanak jail me uske saath reh rahe do criminals ki goli maar kar hatya kar di. Iss hatya ke baad Police se lekar sarkaar tak, sab hairaan the ki aakhir jail ke andar Anshu ke paas hathiyaar aayi kaha se. Anshu ko peshe se “Sharp shooter” kaha jaata hai. Criminals ki hatya karne ke baad, jail me maujood guards ne Anshu ko surrender karne ke liye kaha, lekin Anshu ne unki ek baat nahi suni aur ulta guards pe hi firing shuru kar di. Issi ke jawaab me jail ke security guards ne bhi police pe firing ki, jiske baad Anshu unke encounter me maara gaya. Iske baad 30 min ke andar jail me police ki badi force aa pahuchi. Iss force me S.P, DM, commissioner aur IG sab shaamil the. Sabhi ne mauke ki talaashi li aur maamle ko samjhne ki koshish ki. Isse pehle bhi Anshu kayi baar police waalon pe goliyan chala chuka tha. Ek baar Anshu ne Bhopal me M.P aur U.P task force pe humla kiya tha, jiske baad use jail hui thi. Iske alawa bhi woh kayi baar aise crime ko anjaam de chuka hai. Lekin 2021 me Anshu Dixit ki maut ho gayi. Kaha jaata hai Anshu jabtak Sitapur me raha woh vasooli ke kaam ko anjaam deta tha. Iske alawa woh kuch politician ke saath milkar contract killing bhi karta tha. Anshu ki issi harkat ki wajah se uske pariwaar kahi door chale gaye. Yeh bhi nahi pata ki Anshu ka uske pariwaar se baat tha bhi ya nahi.
Mirzapur-3 ki baat kare toh Anshu jaisa jail se bhaaga hua apraadhi ka kirdaar, series me apni jagah bana sakta hai. Kaleen bhaiya ka purana rival jaan-bujh kar Anshu jaise ek sharp shooter ko jail se riha karwayega, taaki woh Kaleen bhaiya ki hatya kar sake. Yeh ek tarah ka contract killing hoga, jiske baad Kaleen Bhiaya ka rival unki saari property ko apne naam karne ke baare me sochega. Lekin aisa hone se pehle hi Kaleen bhaiya ke wafadaar unhe rival ke iss plan ke baare me bata denge aur woh ussi sharp shooter ko jyada paison ki lalach dekar apne rival ki hatya karwane me, uska istemaal karenge. Aisi kahani kaafi had tak audience ko anticipate kar sakti hai.
Toh yeh thi aaj ki blog agar aapko yeh kahani pasand aayi toh ise share karna naa bhule dhanyawaad.
The End
