Pichli blog me humne padha ki kaise “Isabella Stewart Gardner museum” pahuche do looteron ne, museum ke guards Rick aur Randy ko bandi bana kar, mauke se 13 artworks ko loota aur faraar ho gaye. Agli subah security director jab museum pahuche, toh museum ki haalat dekh, woh dang reh gaye. Security director turant police ko iss baare me khabar karte hai. Police director ke complaint pe turant museum pahuch kar, apni jaanch shuru karti hai. Thodi der khoj karne ke baad, Police ko museum ke basement se Rick aur Randy milte hai, jinke haath ab bhi bandhe huye the. 1990 ke March me hui iss chori me 13 artworks ki loot hui. FBI ke anusaar inn artworks ki keemat kareeb 500 million dollars thi. Lekin dusre art dealers ne, loote gaye artworks ki keemat 600 million dollars bataye the. Maana jaata hai ki “Isabella Stewart Gardner museum” ki robbery duniya ki sabse badi museum robbery thi. Museum me ek “Dutch room” tha, jaha pe Dutch painters ke artworks rakhe gaye the. Yeh pure museum me sabse keemti room thi, kyunki isme rakhe gaye artworks bahut valuable the. Looteron ne issi room ko apna pehla nishana banaya aur kayi famous Dutch painters ki paintings ko woh apne saath le gaye. Dutch painter Vermeer(वहमीयः) ki ek painting, akele “200 million dollars” ki thi. Yaani ki loot ke paison ka aadha hissa sirf iss painting tha. Experts ke mutabik Vermeer ki yeh painting, loote gaye maal me sabse jyada valuable thi. FBI ke liye yeh case solve karna issiliye bhi mushkil tha, kyunki chron ka koi physical evidence nahi tha. Yaani ki loot ke duran naa hi choron ke footprints ka pata chala aur naa hi unke baalon ka. Museum se jo fingerprints mile, uspe bhi shak tha ki aakhir woh museum ke employees ke the ya phir choron ke. 1990 ke duaran DNA test utni advance nahi thi, lekin jaise-jaise wakt beeta aur iss field me scientist ne tarakki ki, waise-waise FBI bhi iss case ko solve karne me lag gaye. Halanki kayi saalon tak file me pade iss case ki jyadatar evidence bhi kho chuki hai. Rick aur Randy ke alawa, loot ke dauran sadak pe maujood logon se FBI ne choron ki physical feature jaan’ne ki koshish ki. Logon ke mutabik ek chor ki height kareeb 5 feet 9 inch thi, jo apne late 30s me lag raha tha. Wahi dusra chor 5 feet 10 inch ka tha, jo apne early 30s me lag raha tha. FBI ne security guard Rick ki sabse pehle talaashi li, kyunki unhe Rick pe shak tha. FBI ke mutabik loot se kuch der pehle, Rick museum me patrolling kar raha tha, jaha pe usne museum ke side door ko ek baar khol kar band kiya tha. FBI ko aisa laga ki looteron ko signal dene ke liye Rick ne shaayad aisa kiya hoga. Rick ne FBI ko samjhaya ki woh aisa har din karta hai, taaki use pata chal sake ki museum ka darwaza acche se lock hai ya nahi. Rick ke support me uske dusre dost ne kaha ki agar Rick aisa har din karta hoga, toh FBI ise asaani se camere ke recordings me check kar sakti hai. FBI ne aisa hi kiya aur issi ke saath yeh prove ho gaya ki Rick bekasoor hai. Rick ki problem yahi nahi khatam hui. Aage jaakar bhi FBI ne Rick ko apni jaanch me shaamil kiya. Halanki hafton tak chale iss jaanch me FBI iss decision pe nikli, ki Rick aur Randy dono dimaag se itne tez nahi ki woh itni badi chori ko anjaam de paayen.
FBI ki jaanch kaafi saalon tak chali lekin asli chor ka pata laga paana din prati din mushkil hote jaa raha tha. Jaise-jaise saal beet rahe the, witnesses ke liye loot waalen din ke exact scene ko yaad kar paana mushkil hote jaa raha tha. Jaankaari ke mutabik loot kar jaane se pehle, looteren ne guards ko check kiya ki unki haalat thik toh hai. Asal me looteren bina kisi ko nuksaan pahuchaayein apni loot ko anjaam dena chahte the. Jaate-jaate looteren apne saath video cassettes bhi le gaye, jisme unke museum me enter karte wakt ki recording, aur motion detector me maujood, data print-outs the.
Aapki jaankaari ke liye hum batana chahte hai ki yeh museum, “Isabella Stewart Gardner” ke naam pe kholi gayi thi, jise art ki collection karna pasand tha. Isabella ke paas kaafi keemti artworks ki collection maujood thi, jise woh ek museum me badalna chahti thi. Isabella ki issi wish ke baad “Gardner museum” 1903 me banwaya gaya. Tab se lekar iss museum me aur bhi kayi saare artworks shaamil hote gaye. Kaha jaata hai Isabella Stewart ameer thi, jinhe traveling ke alawa fashion aur art me kaafi interest tha.
Aage hum jaanenge, ki aakhir mafia kyun apni gang ko keh kar choron ka pata lagwane ko kehta hai. Puri baat jaan’ne ke liye bane rahiye humare saath iss blog pe jiska naam hai Bollygrad studioz.
To be continued… part-2