1994 me aayi Ajay Devgan, Sunil Shetty aur Raveena Tondon ki film Dilwale me, Ajay ke kirdaar ne critics se accha review haasil kiya tha. Yeh ek aisi film thi, jisme pehli baar Ajay ne ek mentally disabled insaan ka kirdaar nibhaya tha. Wahi Film me jis tarah se Sunil shetty ne apne pyaar ko sacrifice kar, Ajay aur Raveena ko dobaara ek dusre se milwaya tha, waise hi ek kahani ke baare aaj hum aapko batane jaa rahe hai. Halanki iss me bas twist yahi hai ki iss Diwale ne bhale hi apni jaan, apni girlfriend ki maa ke liye sacrifice kar diya ho par tab bhi uss ladke ki girlfriend use chod kar chali gayi.
Haa yeh sawaal toh humara bhi hai ki aakhir aisa bhi kya kar diya iss Dilwale ne, ki ladki uske madad ke bawajood bhi use chod kar chali gayi. Chaliye jaante hai.
Log kehte hai “Pyaar andha hota hai” shaayad yeh baat Mexico ke Uziel Martinez(उज़िएल मार्तीनेज़) ke saath sahi bhi ho gaya. Uziel ne apni girlfriend ki maa ke liye apni jaan ki parwaah nahi ki, lekin Uziel ke “Diwala” banne ke baad bhi unki girlfriend ne kisi aur se shaadi kar li.
Uziel Martinez Mexico me ek teacher hai. Ujiel ne apne saath huye iss dhoke ke baare me ek Tik Tok video banaya aur use upload kar diya, jiske baad jald hi unke videos ko lakhon views milne lag gaye aur Uziel ki kahani logon ke saamne aa gayi. Asal me Uziel ki girlfriend ki maa ki haala,t bahut kharaab thi. Unhe kidney failure thi, jis kaaran unke kidney ko jald se jald transplant karwana tha. Jab apni girlfriend se Uziel ko iss baat ka pata chala, toh unhone apni girlfriend ki khushi ke liye apni jaan ki bhi parwaah nahi ki aur seedhe apni kidney donate karne ko raazi ho gaye. Uziel ne turant doctor se iss baare me consult kiya, jiske turant baad Uziel apne kidney dene ke saare procedures ko follow karne ke liye raazi ho gaye. Jab Uziel ki girlfriend ko iss baare me pata chala toh woh Uziel se kaafi khush hui aur unka kayi baar shukriya bhi kiya. Uziel ne unse kaha ki “hum sab ek family hai aur tumhari maa meri bhi maa jaisi hai.” Uziel yeh kehte huye apne kidney ko donate karne ke liye aage badhe aur jald hi saara procedure khatam kar liya. Uziel ki girlfriend ki maa critical condition me thi, jinhe agar wakt pe kidney nahi milti toh shaayad unka zinda bach paana naa-mumkin tha. Woh toh accha hua ki wakt rehte Uziel ne apni kidney donate kar di, jis kaaran unki girlfriend ki maa ki jaan bach paayi. Uziel ki girlfriend ki maa ki surgery successful rahi aur woh dheere-dheere recover bhi karne lagi thi. Wahi apne kidney dene ke baad Uziel ko bhi kuch dino ke liye bed rest pe rehna pada. Shaayad issi dauran woh apni girlfriend se nahi mil paaye. Surgery ke seedhe 1 mahine baad Uziel ke saath aisa kuch hua, jiski unhone sapne me bhi Kalpana nahi ki thi. Asal me surgery ke thik 1 mahine baad Uziel ki girlfriend ne unse break-up kar liya aur Uziel ko ek shock situation me chod kar chali gayi aur usne jald hi kisi dusre aadmi se shaadi bhi kar li. Uziel jabtak sab kuch samjh paate tabtak bahut der ho chuki thi aur unki girlfriend ki abtak shaadi bhi ho chuki thi. Uziel ne apne tik-tok video me kaha ki woh apni girlfriend se bahut pyaar karte the. Yahi kaaran tha ki woh apni kidney dene se bhi peeche nahi hate. 16 million views mile tik-tok video me, Uziel ek sofe pe baithe nazar aate hai, jaha woh apni kahani ko logon se saajha karte hai. Kayi logon ne comment kar Uziel ke iss acche kaam ki taarif ki. Log khush the ki Uziel self-less hokar, unhone apni kidney donate kar di. Wahi dusri yor Uziel ki girlfriend ko logon ke gusse ka saamna karna pada. Sab Uziel ki girlfriend ko curse kar rahe the, kyunki usne Uziel ka faiyeda uthaya. Halanki logon ke reaction se alag unhe apni former girlfriend ko lekar bilkul bhi grudges nahi hai. Uziel kehte hai “actually mai thik hu aur shaayad woh bhi thik hogi. Mujhe usse koi grudges nahi hai balki hum dono acche terms pe hai.” Uziel ne aage apni girlfriend ko lekar kaha “hum dost nahi hai lekin hum ek dusre se nafrat bhi nahi karte hai. Maine bus yeh video tik-tok ke liye banaya tha. Mujhe nahi pata tha yeh out of control ho jaayega.” Kisi ne tik-tok user ne kaha ki “aisi galti dobara mat karna.” Ispe Uziel ne masaak me kaha “yeh galti dobara karne ke liye mere paas ab koi extra kidney bhi nahi bachi hai. Humare paas sirf do hi kidneys hoti hai aur jab unme se maine ek already dedi hai toh ab mere paas sirf, ab mere hi liye hi kidney bachi hai.” Uziel apne tik-tok video me kaafi dukhi nazar aa rahe the, jise dekh log bhi unke video pe comment karne se khud ko rok nahi paaye. Ek user ne Uziel se kaha ki tumhe udaaas hone ki koi jarurat nahi hai kyunki uss ladki ne ek generous aadmi ko khoya hai. Wahi kisi aur ne kaha “Jaao aur ek aisi ladki ko chuno jo tumhare originality ko accept kare aur tumhe admire kare.” Halanki apni iss video ke viral ho jaane ke baad Uziel ne ek aur video upload kiya tha, jisme unhone bataya ki unke aur unki former girlfriend ke beech koi grudges nahi hai. Logon ne bhi iss diwale ki video khub share ki aur uski kaafi tarrifen bhi ki. Aisa lagta hai bhale hi Uziel ne apni girlfriend ko kho diya ho, lekin unhone duniya bhar ke logon ka dil apne kaam ke kaaran jeet liya.

Toh yeh thi aaj ki video, jisme Dilwale Uziel ne apni girlfriend ki maa ki jaan bachane ke liye apni kidney donate kar di. Wahi dusri taraf unki girlfriend unke iss generosity ke badle unhe chod kar chali gayi.
Dilwale-2 ki baat kare toh ho sakta hai iss baar film me aisa bhi koi angle ho, jisme bhale hi hero dilwala ban kar film ki heroine ke liye sacrifice kar deta hai, lekin heroine uss sacrifice ke badle hero ko dhokha de jaati hai.
Khair, agar aapko yeh blog pasand aaya toh ise share karna karna naa bhule dhanyawaad.
The End