Pichli blog me humne dekha ki kaise Raj gharane ke Raja bhaiya dheere-dheere politics me apni pakar banate huye, crime ko bhi gale laga lete hai.
Raja bhaiya ke liye 2002 mushkilon se bhara daur tha. Yeh wahi wakt tha jab Mayawati apni BSP sarkaar ke saath U.P me nayi aayi thi. Issi daur me Raja bhaiya pe aarop laga ki unhone Jhansi ke former MLA, Puran Singh Bundela ki kidnapping karwayi hai. Raja bhaiya pe iss aarop ki wajah se unhe 2 saal tak jail me rehna pada. Issi case me Raja bhaiya ke khilaaf POTA (prevention of terrorism) Act laga. Lekin jail me apni saza bita lene ke baad, Raja bhaiya ke upar se POTA kanoon hata diya gaya. Baad me kuch rumors bhi spread hui, ki Raja Bhaiya ke garden me bane pond me, human skeleton aur hathiyaar mile hai. Kuch ka kehna hai ki Raja bhaiya ne apne pond me crocodiles rakhe hai, issiliye woh apne dushmano ko issi pond me daal kar maar dete hai. Lekin ek baar jab Bihar ke former CM Lalu Yadav ne unse iss baare me pucha ki “kya sach me aapke talaab me magarmach rehte hai?” iss sawaal ko sunn kar Raja bhaiya hans pade, jaise ki Lalu koi masaak kar rahe ho.
Ab yeh toh pata nahi ki Raja bhaiya apne dushmano ke liye crocodiles paalte hai ya nahi, lekin iss tarah ke rumors me Raja bhaiya aaj se nahi balki kayi saalon se ghirte aaye hai. Ho sakta hai ki unse related kuch rumors sach bhi ho.
Wahi aisa lagta hai ki Raja bhaiya aur Mayawati ki sarkaar ke beech acchi relationship nahi hai. Tabhi toh 2002 ke baad jab Mayawati ki sarkaar 2010 me dobara lauti, toh ek baar phir Raja bhaiya ko jail jaana pada. Iss baar Raja bhaiya pe aarop laga ki unhone panchayat election ke representative ko dhamkaya hai. 2011 me Raja bhaiya jail se riha huye aur 2012 me jab U.P me samaajwaadi party ki entry hui, toh unhone aate hi Raja bhaiya ko mantri ka kaarya saunp diya.
2013 me ek baar phir Raja Bhaiya pe hatya ka aarop laga. Shaayad se unhone Pratapgarh ke DSP ki hatya karwa di thi. Issi mamale ke kaaran unhe mantri ke post se resign dena pada. DSP ki hatya ka case itna aage badha ki seedhe CBI ko case ki jaanch karne ka order mila. CBI ne maamle ki jaanch ki aur Raja bahiya ko iss maamle se mukt kar diya. CBI ke iss decision ke baad, DSP ki wife ne iss baat ko seedhe High Court me chunauti di, jiske baad ek baar phir maamle ki CBI jaanch hui. Lekin iss baar bhi Raja Bhaiya case se bari ho gaye. Aksar jab aap politically strong hote hai, toh yeh fark nahi padta aapke saamne high Court hai phir CBI, aap tab bhi badi asaani se dosh-mukt ho sakte hai, bhale hi aapne apni zindagi me kitna hi bada crime kyun na kiya ho.
Raghuraj Pratap pe abtak 47 cases file ho chuki hai. Inme se kayi cases me woh nirdosh saabit huye, toh kayi cases unpe aajtak chal rahi hai. Lekin yeh baat kabhi bhi unki weakness nahi ban paayi aur unka politics me rutba(attitude) kaayam raha.
Mayawati aur Raja bhaiya ke kharaab political rishte ka ek proof yeh bhi hai, ki 2002 me Mayawati sarkaar ne jis POTA(prevention of terrorism) act ko Raja bhaiya pe lagu karwaya tha, woh 2003 me unki sarkaar jaate aur Samaajwaadi party ke aate hi Raja bhaiya se hata di gayi. Lekin jab Mayawati 2010 me dobara lauti toh ek baar phir unhone Raja bhaiya ko apna nishana banaya. Aisa nahi ki Raja bhaiya pe jo aarop lage the woh jhuthe the, lekin Mayawati ki sarkaar bina dushmani ke kisi pe jyada sakti karti nahi hai. Aapko gangster Vikas Dubey toh acche se yaad hoga, jisne khulam-khula Mayawati sarkaar ke baare me kaha tha ki “who usse darti hai.” Ab aap isse poore maamle ka andaaza toh acche se laga sakte hai.
Khair, agar Raja bhaiya ki political dushman Mayawati rahi toh wahi unka sabse bada sahyogi samaajwaadi party raha, jiske 2003 me aate hi 25 min ke andar Raja bhaiya pe se POTA act hata diya gaya. Bhale hi Supreme court ne party ke iss decision pe sawaal khada kiya tha. Inn saare aaropon me ghire rehne ke bawajood Raghuraj Pratap Singh urf Raja Bhaiya 2000s decade me politically strong neta ban kar ubhre. Jo dar Raja bhaiya ko logon ke beech banana tha woh ab kaam kar raha tha. Gundaraaj waapas aa gaya, shaayad uss daur me U.P me woh raaj kabhi gaya hi nahi tha.
Police officer R.S Pandey ne Raja bhaiya ke ghar raid maara toh badle me Raja bhaiya ne unhe jaan se hi maar daala. Police officer R.S Pandey ne pehle hi logon ko keh diya tha ki Raja bhaiya unke khilaaf प्रतिशोध(vendatta) le rahe hai. Iske bawajood Raja bhaiya ke khilaaf koi karwahi nahi hui aur R.S Pandey ek car accident me maare gaye, jiska aarop Raja bhaiya pe aaya. Clean chit milne ke bawajood Raja bhaiya pe andar hi andar, ab bhi iss maamle ko lekar CBI jaanch chal rahi hai, jo shaayad aage bhi chalegi bhale hi iska nateeja kuch nahi nikalne waala hai.
2005 me jaise hi Raja bhaiya “Food Minister” bane waise hi unhe “Z” category ki security de di gayi, bhale hi unpe koi khatra nahi tha. Woh alag baat hai ki unse kayi logon ko khatra tha. Aam taur par Z security khaas logon ko di jaati hai. yeh security prime Minister ke security se sirf 1 position neeche ki hoti hai. 2003 se 2007 ke beech Raja Bhaiya pe lage hatya se lekar zameen harapne ke saare aarop waapas le liye gaye. 2013 me Kunda ke gaaon waalon aur police ke beech kisi baat ko lekar clash hua, jisme Police Deputy Superintendent Zia Ul Haq ki maut ho gayi. Ek baar phir Raja bhaiya dusre police officer ko maarne ke aarop me ghir gaye. Logon ne sawaal uthaya, ki Kunda Raja bhaiya ka ilaaka hai aur yaha pe DSP ki hatya itni asaani se agar hui hai, toh kahi na kahi Raja bhaiya ka isme jarur hi haath hoga. DSP ki wife ne Raja bhaiya ke khilaaf case darj kiya, jiske baad Pratapgarh ki police ne Raja bhaiya ke khilaaf case file kiya ki unhone jaan-bhujh kar plan kiya, jisme gang-war ke baad DSP Zia Ul Haq ki maut hui. DSP ki wife ne kaha ki Raja bhaiya aur unke gundon ne hi milkar DSP ko maar daala hai. Raja bhaiya ne apni zindagi me naa jaane kitne crime kiye honge, lekin yeh bhi sach hai ki woh bilkul bhai ki tarah charity ka bhi kaam karte hai. 2019 me Raja bhaiya ne 6 saal ki cancer patient ke ilaaj ka pura khracha khud uthaya. Iske alawa 1993 ke baad se har saal Raghuraj Pratap Singh unn saari ladkiyon ka saamuhik vivaah(organized wedding) karwate hai, jinke pariwaar shaadi ka kharch afford nahi kar sakte.
Philhaal Raja bhaiya apne ilaake Pratapgarh ke Kunda se MLA hai. 2022 me huye election me bhi Raja bhaiya ki bhaari votes se jeet darj hui hai.

Toh yeh thi U.P ke sabse popular Raja bhaiya ki kahani. Mirzapur-3 ki agar hum baat kare toh isme gang-war aur local goons ka angle toh aa gaya hai, lekin tab kya hoga jab Mirzapur ke raaja kahe jaane waale Kaleen bhaiya ka saamna, unhi ke raajya ke khatarnaak politician se hoga. Aise neta ka maksad sirf Kaleen Bhaiya ko maar kar unke illake pe kabza jamana hoga. Toh aapko kya lagta hai kya Kaleen bhaiya ek aise neta ko harane me kaamyaab honge, jiski logon ke beech acchi reputation hai par wahi unki khud ki reputation ek gunde ki hai. Kya who Mirzapur ke logon ke saamne sach laa paayenge?
Dekhte hai aisi kahani kis yor le jaayegi Mirzapur-3 ko. Tabtak ke liye aap padhte rahiye humari yeh blog, jiska naam hai Bollygrad studioz.
The End part-2