“Chudail Baudi” Shimla ki sabse daravni jagah hai. Yeh jagah chota Shimla aur Navbhar ke beech, Shimla Highway pe stith hai. Kayi log jo raat me iss sadak se guzare hai, unhone white saree pehne, kaale-lambe baal me ek aurat ko dekha hai. Uss aurat ki shakal “Ghunghat” se dhaki hui hoti hai, jo logon se raat me lift maangti hai. Kaha jaata hai iss sadak pe kayi saare accident, sirf uss chudail ke lift maangne ke kaaran hi huye hai. Logon ne daawa kiya hai ki raat ke wakt jab aap uss highway se guzarte hai, toh aapki gaadi apne aap slow ho jaati hai. Chahe koi kitna bhi accelerator daba le, lekin gaadi ki speed badhti hi nahi hai. Ussi beech ek aurat safed saari aur kaale lambe baal me achaanak gaadi ke saamne aakar use rok deti hai aur lift maangti hai. Agar koi lift dene se mana kar deta hai aur apni gaadi ko tezi se bhagaane lagta hai, tab bhi woh aurat gaadi ki speed ke saath chalne lagti hai, yaa toh woh apne aap hi gaadi ke backseat pe baith jaati hai aur gaadi chalane waale ko peeche se ghoorti hai. Kaha jaata hai British raaj ke wakt Shimla ke jungle me ek aurat ki hatya ho gayi thi, jiska bhoot aaj bhi iss highway pe bhatkta hai. Iss aurat ko achaanak apne car me dekhne ke kaaran logon ka dhyaan uski yor chala jaata hai, jisse kayi logon ka accident ho gaya hai. Shimla ki yeh kahani Delhi cantt se kaafi milti hai.
Delhi cantt ya Cantonment ek aisa ilaaka hai, jise bhi log Shimla Highway jaisa haunted maante hai. Delhi cantt din ke ujaale me bhale hi khubsurat nazar aaye, lekin raat hone ke saath hi yeh jagah daravni ban jaati hai. Logon ne kaha hai ki raat ke wakt jab bhi woh Delhi cantt ke ilaake se guzare hai, toh unhone ek aurat ko lift maangte huye paaya hai. Jab koi lift dene ke liye apni gaadi ko rokta hai, tab woh aurat achaanak gaayab ho jaati hai. Wahi lift dene se mana karne pe woh gaadi ka peecha karti hai aur seedhe gaadi ke saamne aa jaati hai aur phir gaayab ho jaati hai. Kahani ke mutaabik ek road accident me kisi aurat ki maut ho gayi thi. Issi kaaran uski aatma aaj bhi Delhi cantt ke ilaake me bhatkti hai aur aane-jaane waale logon se lift maangti hai. Jyadatar yeh ghatna raat ke 1 se 4 baje ke beech घटती hai. Bahut se call center me kaam karne waale logon ko salaah di gayi hai ki raat me iss ilaake me, chahe kuch bhi ho jaaye apni gaadi ko naa roke aur naa hi kisi ko lift de. Kuch log yeh bhi kehte hai ki jo log uss aurat ko lift dene ke liye ruke hai, unhe phir kisi ne dobara nahi dekha. Jaankaari ke mutabik uss aurat ki aatma jo khud ek road accident ki shikaar hui hai, woh ab dusre logon ko apna victim banane ke peeche padi hui hai.
Dwarka sector 9 metro station ki bhi kuch aisi hi kahani hai. Kaha jaata hai ki station ke hi paas me ek bada sa peepal ka ped hai, jaha pe ek white saree me aurat ke bhoot ko kayi logon ne lift maangte huye dekha hai. Road ke construction ke liye government ki yor se uss ped ko hataane ke kayi prayaas kiye gaye, lekin uss ped koi nahi kaat paaya. Yaha tak ki jin labours ko uss ped ko kaatne ka kaam diya gaya tha, unhone raat me apne sapne me, white saree me ek aurat ko dekha, jo unhe ped ko kaatne se rokti hai. Jaankaari ke mutaabik kayi saal pehle ek aurat ka road cross karne ke dauran accident ho gaya tha. Uss driver ne gaadi tak nahi roka aur mauke se faraar ho gaya. Woh aurat buri tarah se gaayal ho gayi, jise bachane ke liye koi nahi aaya aur uski mauke pe hi maut ho gayi. Kaha jaata hai ab ussi aurat ka bhoot uss driver ki talaash me har kisi se lift maangta hai, jisne uski hatya ki thi.
Inn teeno kahani me do cheez common hai aur woh hai ek safed saari me aurat aur dusra lift maangti hui bhoot. Yeh kahani kisi ne kabhi na kabhi apni life me experience ki hai, tabhi iss baare me kahaniyaan bani hai. Par phir bhi hum puri tarah se tabtak yakin nahi kar sakte hai, jabtak iss cheez ko koi personally experience naa karle.
Khair, yeh thi aaj ki kahani ho sakta hai Bhool Bhulaiyaan-3 aisi hi kisi original incident pe based ho, jisse darshakon ko yeh film dekhne me aur maza aayega.
Tab tak ke liye hum chalte hai, par aap bane rahiye humare saath iss channel pe jiska naam hai Bollygrad studioz
The end