Yenkappa ek 28 saal ka kisaan hai jiske mungfali ke khet hain. Yenkappa apni family ke saath Bagalkot naam ke gaon mein rehta hai, jo ki Karnataka mein hai. Woh hamesha se hi apne gaon mein famous raha hai ki woh kisi bhi cheez se darta nahi hai. Darsal Yenkappa apne gaon ka Rowdy Rathore hai!
Toh kuch din pehle hua yun ki Yenkappa roz ki tarah apne tractor par ghaas ka dher lekar jaa raha tha. Yeh dher 30 feet uncha tha aur pura tractor isi se bhara hua tha. Yeh Yenkappa ke liye koi nayi baat nahi thi. Uska roz ka kaam tha aise hi ghaas ko gaon ke ek kone se dusre kone tak lejana. Woh subah uth kar jab kaam ke liye nikalta tha, toh sabse pehle yahi pura karta tha. Uss din bhi yahi hua. Yenkappa khuli hawa mein, ache mood ke saath tractor ko chala raha tha. Subah subah woh tandrust mehsoos kar raha tha, aur toh aur gaana gun gunate hue jaa raha tha. Achanak se usse kuch jalne ki badboo aayi.
Usne dekha ki kyun ki ghas bahut uchi thi, toh tractor kone se niklate samay paas ki hi Bijli ki taar mein atak gaya hai. Abb uss Bijli ki taar mein tha current! Toh hua yun ki ghaas ne aag pakdh li thi. Issi wajah se Yenkappa ko jalne ki badboo aane lagi thi. Abb Yenkappa janta tha ki kuch minton mein hi agar iss aag se chutkara nahi paya toh gadbad hojaayegi. Woh jis jagah se nikal raha tha, uss jagah bahut saare kache ghar the. Toh unmein bhi aag lag sakti thi. Isi liye hi Yenkappa ko jaldi hi decision lena padha!
Phir bus gaon ke iss hero ne turant hi apne tractor ko paas ke talab mein dubba diya. Usne jaldi se tractor bhagaya aur usse talab ke nazdeek lekar gaya. Talaab aate hi woh khud kud gaya, aur tractor ko usne paani mein jaane diya. Usse kudne ki wajah se chottein aayi, aur toh aur tractor gaya uski wajah se 30,000 ka nuksaan bhi hua, magar usne kisi ki jaan par aanch nahi aane di. Isse pehle ki aag phailti usne tractor ko kurbaan kardiya.
Pure gaon mein uska yeh karnama famous hogaya, aur gaon ke sarpanch ne uski bhadhuri ko saraha bhi. Usne jo kaam kiya, bina khud ka nuksaan dekhte hue, woh sach mein taareef ke toh laayak tha hi. Tabse hi Yenkappa aur bhi chaudh mein ghumne laga gaon mein!
Toh bus yahi karnama hamein hamare Rowdy Rathore bhi karte dikh sakte hain. Akhir Rowdy Rathore aka Akshay Kumar bhi toh kahan hi aag se darte hain. Toh bus aise gazab ke scene ke liye tyaar hojayiye Rowdy Rathore 2 mein!
-By Pratima Ratwani.
