2014 ki yeh bank robbery India ki history mein kaafi jaani pehchaani hai.
Toh hua yun ki Punjab National Bank, jo ki India ka mashoor bank hai kaafi taraki kar raha tha, jab inn choron ke dimaag mein plan aya ki iss bank ko luta jaaye. Sonepat district ke Punjab National Bank ko unhone apna nishana bana liya tha. Iss robbery ki planning kaafi samay se chal rahi thi kyon ki jab hum aapko iss robbery ka tarika batayenge, toh aap bhi kahenge ki “bhai wah! Kitni mehnat ki hai choron ne”.
Sabse pehle choron ne yeh pata lagaya ki iss Punjanb National Bank ka map kya hai. Yaaniki baar baar Bank jakar yeh chor bank ka naksha bana rahe the, taaki unhein saare checkpoints pata rahein. Unhein chori ke pehle se hi pata tha ki kaun kahan baithta hai, kaunse room mein aya ja sakta hai, kahan main cash hai aur kahan se block kiya ja sakta hai logon ko. Iske baad unhone aas paas ka hi ek aisa ghar dhundha jo ki khali ho. Aur kismat ki baat hai ki Sonepat ke iss district mein, bank ke paas hi aisa ghar tha bhi jahan koi rehta hi nahi tha. Inn choron ne wahan se ek tunnel khodna start ki. Ji haan, aapne sahi suna “Ek Tunnel”. Yeh tunnel lagbhag 125 feet gheri thi jo direct hi bank ke locker room mein jaati thi. Yeh tunnel khodne mein unhein zyada time nahi laga, magar iski planning kaafi lambe samay se chal rahi thi. Lagbhag 77 lockers ko loot liya gaya tha jahan 350 lockers the. Reports ke baad pata chala tha ki iss chori mein jewelry, cash aur bonds loote gaye hain jinki kimat 100 crore rupay thi. Ji haan, 100 crore!
Baad mein investigation mein pata chala tha ki yeh chori bank ki laparwahi ki wajah se bhi hui hai kyon ki jis locker room ko loota gaya, uska floor cement ka tha jab ki saaf saaf guidelines hoti hain ki floor aur wall ka kaam paka karaya jaaye, taaki aisi koi bhi wardaat na ho.
Chori ke 2 din baad 3 chor jo iss robbery mein involved the pakde gaye the, magar kamal ki baat hai ki iss chori ke mastermind ki maut ho chuki thi. Jewelry aur bonds toh recover karliye gaye the, magar cash Police dundh nahi paayi thi.
Magar aaj bhi uss mastermind ki maut logon ko shock mein chod deti hai, aur yeh bhi ki itni patli tunnel se kaise perfectly inn logon ne raasta naap kar, yeh sab execute kiya tha.
Toh bus aisi hi kuch chori ki kahani hamein mashoor film franchise Dhoom ke 4th part mein dekhne ko mil sakti hai.
Tab tak agar aapko hamara yeh blog pasand aya toh isse like aur share karein.
-By Pratima Ratwani.
