Pichli blog me humne dekha ki kaise John Dillinger ko pakadne aaye officer Rufus aur Henry, Dillinger ke aadmi Homer ke shikaar ban jaate hai. Apartment ki lobby me FBI officer Rufus pe Homer khuleaam goli chala deta hai, lekin woh bach jaate hai. Iske baad Homer officer Rufus ka peecha karta hai. Homer ke peecha kiye jaane pe Rufus jaldbaazi me baahar ki yor bhaag jaate hai, jiske baad Homer dobara Apartment ke front entrance se andar ghus aata hai. Homer ko bhaagte huye dekh, bahaar intezaar kar rahe dusre officer Rusty ki nazar uspe padti hai. Rusty, Rufus ko Homer ke gaadi ki yor ishaara ka, use destroy karne ka order dete hai, jiske baad Rufus turant Homer ki gaadi ke aage waale left tire pe goli chala dete hai. Rufus jab tak Homer ki gaadi ka dhyaan rakh rahe hote hai tab tak Rusty paas ki dawa ki dukaan se, police aur FBI dono ko phone karte hai, lekin phone lag nahi paata kyunki dono hi lines busy hoti hai. Asal me 1930s me log landline phones ka istemaal karte the, tab logon ke paas aaj ki tarah personal phone nahi hote the. Khair, jab tak Rufus Homer ki gaadi pe nazar rakh rahe the, tab tak Homer saamne se aa rahe coal truck pe kud(कूद) ke baith kar faraar ho jaata hai. Wahi Evelyn ne apne trial testimony me bataya, ki jab officer Henry aur Rufus uske darwaze pe aaye, toh usne officers se jhooth bol diya ki woh abhi thik se dressed nahi hai issiliye woh thodi der baad darwaza kholegi, jiske baad officers darwaze pe wait kar rahe the, tabtak Evelyn ghar ke andar maujood Dillinger ko inform kar deti hai ki officers aaye hai. Homer ne jab Rufus pe, apartment ki lobby me goli chalayi, tab 3rd floor pe reh rahe Dillinger ko bhi iski awaaz sunayi de di. Awaaz ko sunte hi Dillinger turant darwaze se hi baahar khade Henry pe, submachine gun se open fire kar deta hai. Police adhikaari Henry apni jaan ko bachane ke liye khud ko cover karne ki koshish karta hai. Dillinger ab baahar nikalta hai aur ek baar phir Henry pe goli chala deta hai. Henry bhi turant apna revolver nikaalta hai aur Dillinger pe fire karne lagta hai, lekin jald hi uski bullets khatam ho jaati hai. Halanki tab tak Henry Dillinger ke left arm ko ghyaal kar chuka hota hai. Apni bullets khatam hote hi Henry jaldi se seed0iyon ke raaste neeche bhaagne lagta hai aur apartment ke front entrance se bhaagne lagta hai. Ek baar jab Henry neeche chala jaata hai, waise hi Evelyn aur Dillinger bhi seehiyon se neeche utarte hai aur apni gaadi pe baith, apartment ke peechle darwaze se baahar nikal jaate hai. Iss ghatna ke baad Evelyn aur Dillinger seedhe Minneapolis me based criminal Eddie Green ke apartment me jaate hai. Eddie turant apne sahyogi Dr. Clayton ko bulata hai. Eddie ke gaadi me uski wife Beth, Evelyn, Dr. Clayton aur Dillinger baith jaate hai. Dr. Clayton Dillinger ko Augusta Salt ke yaha le jaate hai, jo ek nurse thi. Augusta Dr. Clayton ke unn patients ka ilaaj karti thi, jinka checkup doctor apne regular office me karne ka risk nahi le sakte the. Augusta ne turant antiseptic ki madad se Dillinger ki chot ka ilaaj kiya. April 2 1934 ko Eddie Dillinger se milne aaya tha, jiske 1 ghante baad hi uspe FBI ne khatrnaak humla kar diya, jis wajah se Eddie buri tarah se ghayal ho gaya. Eddie Dr. Clayton se poore 5 dino tak apna ilaaz karwata raha, jiske badle me doctor ko kareeb 500 dollars milne waale the, lekin unhe kuch bhi nahi diya gaya. Inn sab maamlon ke baad Dillinger April ke shuruat me hi Evelyn ke saath apne pita se milne Mooresville aa jaata hai. 6 April, 1934 ka pura din, Dillinger ka pariwaar se milne-julne me beet’ta hai, khaaskar apne step bhai Hubert se. Hubert ke saath Dillinger Mooresville se Ohio gaya, jaha pe usne apne khaas saathi Harry ke maata-pita se mulakaat ki. Lekin waha jaakar pata chala ki uske maata-pita ghar pe hai hi nahi, jis wajah se aadhi raat me Dillinger aur Hubert waapas Mooresville laut aaye. Dillinger apne sautele(सौतेले) bhai aur pita ke saath tab tak Mooresville me raha, jab tak ki uski chot naa thik go gayi. Issi lagbhag Evelyn apni ek dost se milne Chicago chali gayi aur FBI dwara pakdi gayi. FBI Evelyn ko arrest kar apne office me le aate hai. FBI ne Evelyn ke khilaaf ek badmaash ko panah(पनाह) dene ke aarop me case darj kiya. Evelyn ko doshi tehra kar uspe 1000 dollars ka fine lagaya gaya aur do saal ki jail ki saza bhi sunayi gayi. Wahi Eddie Greene ki wife pe bhi same aarop ke tehat, 15 mahine ki saza sunayi gayi. Tab tak Dillinger apne saathi Homer ke saath milkar police station ko loot leta hai aur waha se bulletproof vest aur guns ke saath faraar ho jaata hai. Dillinger kuch dino tak Michigan me rukta hai lekin FBI ke waha pahuchne se pehle hi woh phir kahi faraar ho jaata hai. Phir FBI ko kahi se information milti hai ki “little Bohemia lodge” ke summer resort me achaanak kuch ajeeb guests aa gaye hai. Ajeeb se unka matlab tha “संदिग्ध”. Inhi mehmaano me se ek Dillinger tha, toh dusra uska saathi Nelson tha. Khabar milte hi FBI ki task force gaadi ka intezaam kar Lodge ki yor chal padi, halanki raaste me hi unme se do gaadi kharaab ho gayi. Jis wajah se kuch agents ko raaste me jaa rahe dusre gaadi ke running board pe khade hokar safar tai karna pada. Resort se 2 mile ki doori pe gaadi ki roshni band kar di gayi aur andhere me FBI agents aage badhe. Jab car resort pahuchi toh waha pe maujood dogs bhaunkne (भौंकने) lage. Agent lodge ko gherne ke liye fail gaye par jaise hi woh aage badhe, roof se agents pe machine-gun se humla kar diya gaya.
Aage hum jaanenge ki kaise John Dillinger aur uska saathi FBI ko chakma dene me kaamyaab hota hai. Lekin FBI bhi haar maan’ne waalon me se nahi hai, woh kisi bhi haal me Dillinger ko pakad ke rahegi. Par woh yeh kaise karengi, yeh hum jaanenge apni agli blog me tab tak ke liye bane rahiye humare saath iss blog pe, jiska naam hai Bollygrad studioz.
To be continued… part-3
