Kahani hai U.P ke Grater Noida ki jaha ki Payal naam ki ek police officer ne ek gangster se shaadi kar li. Yeh khanai saal 2014 ki hai, jab 30 saal ke Rahul Tharasana(थारासना) ko, murder ke aarop me Greater Noida ki ek court me pesh kiya gaya. Issi court me Payal naam ki police officer Rahul naam ke iss gangster se pehli baar mili. Rahul pe ek businessman ki hatya ka aarop laga tha, jiske liye uspe kaanooni karyawahi ki jaa rahi thi. Iske alawa Rahul ke khilaaf loot aur hatya ke alawa aur bhi kayi saare criminal maamle darj hai. Kaha jaata hai ki jo bhi insaan uski maa ke khilaaf “gram pradhan” ke election me khara hota hai, use Rahul dwara kaafi bura anjaam bhugatna padta hai. Kayi baar toh anjaam murder ka bhi roop le leti hai. Issi wajah se 9 may, 2014 ko police ne use giraftaar kar court me pesh kiya. Dekha jaaye toh Rahul kaafi khatarnaak gangster tha, lekin uski yeh history, ek police officer ko uske pyaar me padne se rokne ke liye kaafi nahi thi. Kyunki jab Rahul court me pesh hua ussi dauran Payal Rahul ke contact me aayi aur woh aage chal kar bhi Rahul ke contact me rahi, chahe woh jail ke andar raha ho ya phir baahar. Rahul Tharasana U.P ke “Anil Dujana” gang ka hissa hai, jisne 2008 se apni criminal activity ki shuruat ki. 2017 me bhi Rahul pe illegal weapons rakhne ki wajah se use jail ho chuki hai, halanki usne surrender bhi kiya tha. Khair, police officer Payal ki baat kare toh woh lagataar Rahul ke saath contact me rahi jis beech woh dono bahut acche dost ban gaye aur jiske kuch hi saalon baad inn dono ne shaadi bhi kar li. Wahi jab Payal ke senior officer se iss shaadi ke baare me pucha gaya, toh unhone iss baare me koi bhi jaankaari rakhne se saaf mana kar diya. yaha tak ki yeh bhi kaha ki ho sakta hai ki Payal pe kaanooni karyawahi bhi ki jaaye. Payal ke former seniors ko yeh bhi nahi pata ki philhaal Payal kis area me tainaat hai. Payal aur Rahul ne kaafi shaanti se ek dusre se, anjaan jagah pe shaadi kar li, jisse kayi logon ko toh iss baare me tabtak jaankaari nahi hui, jabtak Rahul ne khud apne social media handle pe, iss baare me post nahi kiya. Jaise hi Rahul ne apni shaadi ki jaankaari apne dosto ko di turant hi uski aur Payal ki shaadi ki photo viral hone lag gayi, kyunki yeh kahani thi hi itni alag. Par jab Rahul ke gaaon waalon se police officer aur gangster ki iss shaadi ke baare me pucha gaya toh unhone bataya ki “Payal har teen-chaar din pe gaaon aati hai. Lekin general election ke baad se Rahul apne gaaon nahi aaya hai.” Gaaon waalon ne yeh bhi bataya, ki Payal ne unse kaha tha ki woh unke saare maamlon ko suljha degi aur unhe “Gram Pradhan” ke paas jaane ki koi jarurat nahi hai. Halanki yaha pe cheezen phir bhi normal nazar aaye, lekin U.P police Payal ke iss step se zara bhi khush nahi nazar aayi. Unke mutabik woh Payal ke iss kadam se kaafi jyada sharminda hai.
Waise toh apne shaadi ke baad naa hi Payal aur naa hi Rahul dobara news headlights me apni jagah bana paaye, jis wajah se logon ko unke baare me kuch khaas jaankaari nahi hai. Logon ka maan’na hai ki shayad Rahul ne 2019 me Payal se shaadi kar lene ke baad se, gundagardi ko alvida keh diya hai. Halanki yeh kaha tak sach hai yeh bhi koi nahi jaanta. Wahi Payal aur Rahul pehle Gangster aur cop ki Jodi nahi hai, jinhone ek dusre se shaadi kar li. Kyunki aisi aur bhi kahaniyan saamne aayi hai, jisme police waale khud hi gangster se shaadi karne ko taiyaar ho jaate hai aur puri samaaj unhe hairaan nazaron se bus dekhti reh jaati hai. Waise jis tarah se Payal aur Rahul ne ek alag lifestyle hone ke bawajood ek dusre se shaadi ki waisi hi kuch Salman khan ki film “kisi ka bhai kisi ki jaan” ki bhi kahani hai. Asal me Salman ka kirdaar aksar kisi gunde ya mafia se jhagde me pad jaata hai, jis wajah se use aur uske 3 aur bhaiyon ko police station ka bhi chakkar lagana padta hai. Issi beech film me Salman ke kirdaar ki mulakaat ek ladki se hoti hai, jise maar-peet karne waale aur gunde jaise log bilkul bhi pasand nahi hai. Halanki ek din Salman ki ladai kisi bade gangster se ho jaati hai, jo uske jaan ke peeche kayi dino se pada tha. Salman bina kuch soche-samjhe uss gangster ko harane ke liye har kuch ek kar deta hai, jisme uski jeeti bhi hoti hai. Lekin yeh baatein jab film ki heroine ko pata chalti hai, toh woh Protagonist yaani ki Salman ko usse door ho jaane ko kehti hai. Protagonist kaafi dukhi hota hai kyunki woh heroine ko khona nahi chahta hai. Issi wajah se iss maamle me Protagonist ke bhai uski madad karne ke liye aate hai. Protagonist ke teeno bhaiyon ne soch rakha tha ki woh kisi bhi haal me apne bhai ko uska pyaar waapas karwa ke hi rahenge. Itne me heroine ke pita ko jaan se maarne ke peeche kuch gunde pad jaate hai, jise bachane ke liye protagonist waapas heroine ke gaaon jaata hai, jabki heroine ne protagonist ko uske ghar ke aas-paas bhi aane se mana kar diya tha. Lekin protagonist inn sab baaton ko side kar heroine ke pita ko bachane ke liye, phir ek baar maaf-peet me pad jaata hai aur kaafi jyada ghaayal hone ke baad woh uske pita ko bacha leta hai. Lekin heroine khush hone ke jagah ab usse aur bhi jyada naraaz hoti hai. Kyunki ek toh woh protagonist ko uske aas-paas aane ko pehle hi mana kar chuki hoti hai, upar se woh phir se gundagardi karte, heroine dwara pakra jaata hai, jo baatein heroine ko kabhi pasand thi hi nahi. Lekin woh kahi na kahi apne pita ki jaan bach jaane ki wajah se khush bhi hoti hai. Wahi iss maamle ke kuch dino baad protagonist ke teeno bhai heroine ke ghar pe pahuchte hai aur kehte hai “humne aaj se gundagardi karni chod di hai.” Unn bhaiyaon ka ‘humne’ se matlab Protagonist se hi tha. Wahi protagonist ke bhai heroine ko yeh bhi batate hai ki protagonist ne pehle hi gundagardi chodne ki thaan li thi, lekin kyunki heroine ke pita ki jaan khatre me thi, issi wajah se use ek baar phir iss roop me waapas lautna pada. Jab heroine ko iss baat ka pata chalta hai toh woh khush hone ke saath thodi dukhi bhi hoti hai, kyunki usne protagonist ko shuruat se hi galat samjha. Iske baad heroine protagonist aur uske bhaiyon ko maaf kar deti hai, jiske baad heroine ka pariwaar protagonist ko aur unke bhaiyon ko unke ghar pe aane ka invitation dete hai. Jald hi baat aage badhti hai aur Protagonist jo sabse bada bhai tha, uski finally shaadi ho jaati hai issi ke saath unn teeno bhaiyon ki bhi shaadi ho jaati hai, jinhone apne bade bhai ke liye kabhi shaadi nahi karne ka faisla kiya tha, bhale hi woh log andar hi andar relationships me the.