Kahani jyada purani nahi hai. 1990 ka daur, duniya ke har kone me kisi nayi ghatna ko anjaam de raha tha. Kahi Hubble space telescope launch hua toh kahi koi desh, Soviet Union se saalon ki ladayi ke baad azaad hua. Lekin inn sab se alag 1990 me ek aisi case logon ke saamne aayi, jisne कला ki duniya me saalon tak aisa toofaan machaya, jisse log aajtak ubar nahi paayein hai.
“Isabella Stewart Gardner museum” ki loot ek aisi unsolved mystery hai, jiske liye owners, choron ka pata batane pe, 1 crore ka inaam bhi dene ko taiyaar hai. Zara sochiye inaam ka rakam jab itna bada hai toh uss museum se churaye gaye artworks kitne bade honge.
Boston stith “Isabella Stewart Gardner museum” me loot, 18 March, 1990 ke subah ke shuruati ghanton me hui thi. Kuch ussi tarah se jaise Paris me Monalisa painting ki chori hui thi. Jaankaaron ke mutaabik uss subah duty pe sirf do guards hi maujood the, jinhone museum me do police officers ko aate huye dekha tha. Guards ke mutabik woh log koi Police officer nahi balki lootere the, jo museum me loot ko anjaam dene aaye the.
Museum ke guards se nakli police officers ne kaha ki unhe kisi ne call kar bulaya tha. Woh issi kaaran iss area me patrolling kar rahe hai. Police officers patrolling ka naam dekar museum me bhi ghus aaye aur aas-paas ki cheezen dekhne lag gaye. Guards ko shuruat me iss baat ka anadaza bhi nahi tha ki woh jinhe officers samjh rahe hai,
woh koi officers nahi balki lootere the. Do guards me se ek guard ne nakli police officers ke liye apne museum ka protocol tod diya. Asal me guard ne museum ke “Employee entrance” ke through, police officers ko museum ke andar enter karwa liya, jiski permission use nahi di gayi thi. Guard ne socha ki ‘aree who toh khud hi police hai, unse bhala kya khatra ho sakta hai.’ Aur issi soch ke saath guard ne woh kar diya, jo shyaad ab kuch hi minton me, uspe bhaari padne waali thi. ek baar nakli police officers jab museum ke andar ghus aaye, tab unhone guards ko apna asli rang dikhaya. Police ke roop me aaye looteron ko dekh guards ke hosh udd gaye, lekin ab yeh sab samjhne ke liye kaafi der ho chuki thi.
Dono looteron ne turant guards ke haathon ko baandh kar, unhe basement me band kar diya. Yahi se looteron ne sirf 81 min ka samay liya aur woh museum se 13 artworks ki loot karne me kaamyaab huye. Museum me lage “motion detector” ke kaaran looteron ki movement document ho paayi. Lootere kareeb 13 paintings apne saath chura kar le gaye. Kaha jaata hai sabse pehle choron ko kareeb raat 12:30 baje kuch logon ne dekha, jo party se apne ghar jaa rahe the. Logon ke mutabik looteren police ke kapde pehne ek gaadi me baithe huye the, jo museum se sirf 100 feet ki doori pe parked thi. Aate-jaate logon ne bhi unn looteron pe shak nahi kiya kyunki woh police ke gateup me the. Loot waale din jo do guard museum me maujood the, woh 23 saal ka Rick aur 25 saal ka Randy tha. Rick har din hi museum me night shift karta tha, lekin Randy ke liye yeh pehla baar tha. Itne bade museum me sirf do young guards ka hona, apne aap me hi kamzor security ki nishaani hai. Looteren kaafi der se museum ke baahar mujood the aur woh bus ek sahi mauke ki talaash me the. Raat ke kareeb 1:30 baje ek chor intercom ke sahare museum ke andar baithe Rick se kehta hai, ki woh police hai aur unhe kisi gadbadi ki jaanch karni hai, issiliye woh unhe museum ke andar aane de. Rick “closed-circuit-television” ki madad se asaani se police ke kapde pehne do log ko dekh sakta tha. Aapko hum bata de ki “Intercom” ek aisi device hoti hai, jisse building ke baahar khada aadmi, building ke andar ke logon se baat kar sakta hai. Infact uss device me ek camera bhi lagi hoti, jisse andar baithe log yeh dekh paate hai ki aakhir baahar unke darwaze pe kon hai. Yaha pe Lootere aur Rick ek dusre se ussi device ki madad se baat kar rahe hai.
Jab looteron ne museum ke andar aane ki baat kahi toh Rick ko yahi khyaal aaaya, ki use toh koi gadbadi nahi nazar aa rahi toh phir officers kis baare me baat kar rahe hai. Sawaal karne pe nakli police officers Rick se kehte hai ki “kyunki aaj St. Patrick’s day tha, issi kaaran party karne ke baad ek aadmi museum ki boundary pe chehad gaya hai, jiski jaankaari kisi ne hume phone kar di hai.”
St. Patrick’s day ki baat kare, toh yeh ek religious festival hai, jo har saal 17 march ko St. Patrick’s ki death anniversary pe manayi jaati hai, jinhone Christianity ko Ireland me spread kiya tha.
Khair, Rick looteron ko police samjh kar unki baaton ko maan jaata hai aur unhe andar aane deta hai.
Andar aate hi chor ne Rick se pucha ki agar museum me uska koi aur saathi maujood hai, toh woh use bhi neeche bula le. Rick ne walkie-talkie ki madad se Randy ko security desk pe bula liya, jaha pe philhaal woh aur nakli police officers maujood the. Issi beech Rick ne dekha ki ek officer, jiski height lambi thi, uski nakli moonche uske chehare se nikal rahi thi. Issi beech chote height ke officer ne Rick se kaha ki “Tumhari shakal chor se kaafi mil rahi hai, humare paas tumhare liye arrest warrant bhi ho sakta hai. Issiliye accha yahi hoga ki tum security desk se baahar aakar hume apna identity proof do.” Rick ghabra kar, security desk se baahar jaata hai, jaha asli police ko inform karne ka ek maatra alert button diya gaya tha. Looteren jaante the ki agar woh Rick ko pehle hi apni asliyat ka pata de denge, toh Rick alert button daba kar asli police ko bula lega, issiliye looteron ne pehle Rick ko security desk se baahar nikaala, uske baad use bandi bana liya. Tabhi upar se Randy bhi aa jaata hai, jise dekhte hi looteren uske bhi haathon ko baandh dete hai. Ek baar jab dono guards ko looteren apne kabze me le lete hai, tab woh unhe apni asli identity ka pata dete hai, ki woh iss museum ko lootne aaye hai. Iske baad looteren unn guards ki aakhon pe duct tape laga dete hai aur guards ko basement me chod aate hai, taaki woh apni loot ko shaanti se anjaam de sake. Looteron ne guards ki wallet leli aur use acche se examine kiya. Iske baad unhone guards se kaha ki “hum jaante hai ki tumlog kaha rehte ho. Authorities ko kuch mat batana. Tumhara reward ek saal baad tumhe mil jaayega.” Looteron ko guards ko thikaane lagane me sirf 15 min ka samay laga.
Chor ab dheere-dheere museum ki seedhiyon ko chad kar upar ke floors pe jaane lage, jaha pe paintings rakhi hui thi. Looteron ne jaise hi painting ko haath lagaya, achanaak alert beep bajne laga. Bina apna samay gawaye looteron ne painting ko diwaar pe se nikaala aur unhe jod se zameen pe patak diya, jisse uski glass frame ke saath, alert beep bhi toot gayi. Looteron ne baaki paintings ke saath bhi aisa hi kiya. Jin paintings ko woh chura rahe the, woh kaafi historic thi. Loote gaye 13 artworks ki kul keemat 500 million dollars yaani ki 4 arab rupay thi. Loote gaye artworks me famous painting “A Lady and Gentlemen in black” aur 16vi sadi ke famous Dutch painter ki paintings bhi maujood thi. Kitni paintings ko loot’te wakt chor uski khaali frame ko diwaar ya zameen pe hi chod gaye. Maana gaya ki paintings ko frame ke saath carry karna looteron ke liye mushkil hote jaa raha tha, issi kaaran who Bina frame ke paintings apne saath le gaye.
Raat kareeb 2:40 baje tak looteron ne saari paintings loot li aur woh mauke se faraar ho gaye. Agli subah museum ke naye shift ke guards aaye, jinhone intercom device se Randy aur Rick se contact karne ki koshish ki, taaki woh unhe museum ke andar aane de. Kaafi der tak intezaar karne ke baad, jab guards ko koi jawaab nahi mila tab unhe shak hua ki museum me kuch toh gadbad hai. Guards ne security director ko bulaya, jinke paas museum ki keys maujood thi. Jab woh sabhi museum ke andar ghuse, toh security desk pe kisi ko naa dekh paakar, director ne turant police ko phone kiya. Museum ke chaaron yod toot hui frame aur uski glass bhi bikhri padi thi, jo director ko shak karne ka mauka de rahi thi.
Aage hum jaanenge ki aakhir kis tarah se Randy aur Rick ko security director ne basement se khoja aur kaise yeh pura maamla FBI tak pahucha. Kya FBI choron ka pata lagane me kaamyaab hui? Yeh sab hum jaanenge apni agli kahani me, tabtak ke liye bane rahiye humare saath iss blog pe, jiska naam hai Bollygrad studioz
To Be continued…PART-1