Astrophysicist Ron Mallet ek aise scientists hai, jo saalon se time travel machine pe kaam kar rahe hai. Ron ki maane toh e adult life ka jyadatar hissa sirf time travel pe experiment karne me bita diya hai. Ron ka sirf ek hi maksad hai aur woh hai khud ko wakt me peeche le jaana. Scientists Ron iss baat pe bharosa karte hai ki insaan ka past me jaana scientifically possible hai. Ron ne apni zindagi me kayi experiments kiye hai, jinke scientific equation aur principles ke basis pe, woh kehte hai ki Time machine banana mumkin hai. Halanki Albert Einstein aur Stephen Hawking jaise scientists ka kehna hai ki log bhale hi future me travel kar sakte hai, lekin unka past me jaana kaafi mushkil hai. Wahi dusri taraf film Krrish-4 me, Krrish wakt me peeche jaakar Jaadu se milne waala hai. Dekhna yahi hoga ki Bollywood film makers kaise Einstein ki theory ko galat saabit kar, krrish ko past me bhejte hai. Khair, yeh baat bhi sach hai ki har Scientists ki apni alag theory hoti hai, tabhi toh ek scientist hone ke naate Ron ko bhi poori tarah se bharosa hai ki woh ek din yakinan hi past me jaa paayenge. Scientists Ron ke iss sapne ke peeche bhi ek kaaran hai. Asal me Ron samay me issiliye peeche jaana chahte hai, taaki woh apne pita se dobaara mil sake jo ab iss duniya me nahi hai. Ron sirf 10 saal ke the jab unke pita ki maut heart attack ke kaaran ho gayi thi. Ron ne kaha ki unke pita ke jaane ke baad se unki zindagi humesha-humesha ke liye badal gayi thi. Ron kehte hai ki “Mujhe aisa lagta hai ki har din suraj nikal kar mere pita pe hi aakar dhalta tha. Aisa lagta hai, jaise woh har cheez ke hi center the. Aaj unke jaane ke itne saalon ke baad bhi mai kabhi yeh nahi maan paa raha hu ki woh ab mere saath nahi hai.” Yeh Ron ke pita hi the jinhone Ron ke andar, Science ko lekar pehli baar pyaar jagaya tha. Ron ke pita peshe se ek TV repairman the. Unhone apne bete ke andar naa sirf Science me interest jagaayi balki unhone Ron ke anadar reading ki aadat bhi daali. Apne pita ki maut ke thik ek saal baad Ron sci-fic novel “Time Machine” se rubaru huye. Ron ke mutaabik iss novel ne naa sirf unki zindagi badli, balki unhe ek naya nazariya bhi diya. Iss novel ke hi kaaran Ron ko ek wakt ke liye vishwaas hua, ki woh apne pita se jarur mil paayenge. Aaj Ron 74 saal ke ho chuke hai aur woh pichle 60 saalon se University of Connecticut me as a professor kaam kar rahe hai. Ron ne apne career me Black hole ke alawa time, space aur gravity ki theories pe bhi research ki hai. Inn theories ko sabse pehle Albert Einstein hi duniya me laaye the, jiske baad ab har scientist uspe research kar duniya me nayi khoj kar rahe hai. Philhaal Ron ek aisi machine pe kaam kar rahe hai, jo unhe past me le jaane ka kaam kare. Rob kehte hai ki unhe kayi logon ne yeh kaha hai, ki “time travel” ka unka dekha hua sapna impossible hai. Par yeh Ron ka apne pita ke liye pyaar hi hai ki jo unhe vishwaas dilaata hai, ki ek din woh jarur hi apne pita se milne apne banaye huye time travel pe baith kar jaayenge. Waise toh Duniya me Ron ke jaise kayi aur scientists hai jo wakt pe kaabu paakar khud ko future ya past me le jaana chahte hai. Mahaan scientist Albert Einstein kehte the ki duniya me light ki speed sabse jyada hoti hai, aise me agar time machine light ki speed se jyada fast travel kare toh log wakt me aage ya peeche jaa sakte hai.
Ab dekhna yahi hai ki Ron ka dekha hua yeh sapna aakhir kab poora hota hai.
Toh yeh thi aaj ki kahani agar aapko yeh video pasand aaya toh ise like karna naa bhule dhanyawaad.
The End