Duniya me ajeebo-gareeb cheezen hoti hi rehti hai aur unhi me se ek hai Parallel universe ki kahani. Parallel universe ka matlab hota hai, humari duniya ki hi tarah ek dusri duniya, jo bilkul dharti ki tarah hi dikhti hai. Kayi scientists ka maan’na hai ki galaxy me humare samaan ek aur planet hai. Par iss baat me kitni sachayi hai yeh abhi tak nahi pata chal paaya hai. Kaha jaata hai ki logon ne abtak aise kayi ajeeb cases witness kiye hai, jisme yaa koi aadmi gyaab ho gaya jo kaafi saalon baad, ussi jagah, woh bhi ussi age me paaya gaya hai. yaa phir aisa bhi kaha jaata hai, ki kayi logon ne dusre duniya se aaye, logon ko dekha hai. Unhi me se aaj hum aapko ek aise aadmi ki kahani batatne jaa rahe hai, jo ek aise desh aaya tha jo humare duniya me hai hi nahi. Yeh ghatna 1954 ki Haneda Airport ki hai jo ki Tokyo Japan me hai. Uss din ek aam din ki hi tarah Tokyo me kaafi garmi thi, lekin Haneda me log tab bhi apne kaam me vyast the. Tabhi Europe se ek plane apne passengers ke saath Haneda Airport pe land karti hai. Plane ke land hone ke baad passengers ki tickets aur ID check ki hi jaa rahi thi. ussi beech ek passenger aata hai, jo dikhne me saaf kapde pehne, ek middle age ka aadmi tha. Skin uski kaafi white thi. aisa lag raha tha jaise woh European region se taaluk rakhta tha. Aadmi Airport ke officials se kehta hai “yeh meri normal business trip thi..mai iss saal teesari baar Japan aaya hu.” uss aadmi ki primary language French thi. lekin woh Japanese ke alawa dusre European languages bhi jaanta tha. Uss aadmi ke wallet me bhi kayi European deshon ki currencies thi, jisse koi bhi andaja laga lega ki woh aadmi “ Frequent traveller” tha. Maamla abtak toh sahi jaa raha hai, lekin tabhi Airport incharge ne uss aadmi se uske desh ke baare me puchta hai, ki aakhir woh hai kaha se? Tabhi maamla ek ajeeb turn lene lagta hai kyunki woh aadmi ke anusaar woh kisi “Taured”(टौरेड) naam ke desh se taaluk rakhta hai, jo France aur Spain ke border pe padta hai. Officials ne uss aadmi se kaha ki “Taured, naam ka koi desh hai hi nahi” officials ke iss jawaab pe, woh aadmi apna passport Airport ke officials ko dikhata hai,jo ki Taured desh ke naam se issued tha. Ajeeb baat yeh hai ki iss naam ka koi bhi desh humari duniya me hai hi nahi, toh phir uss aadmi ne passport banwaya kaha se? Yaha tak ki uski passport pe visa stamps bhi lage huye the, jo ki uske abtak ke traveling details ke proof de rahe the. Woh aadmi ke anusaar woh business trip ki wajah se Japan aaya tha, lekin jab Airport ke officials ne uske company ka naam aur details maanga toh woh dang reh gaye kyunki kisi ne bhi isse pehle aisi company ka naam hi nahi suna tha. Yaha tak ki uss aadmi ne apna hotel reservation bhi dikhya, jo uski company ne book karwaya tha. Par Hotel ne saaf yeh keh kar mana kar diya ki.. humare hotel me aise naam ke kisi bhi aadmi ka reservation nahi hua hai. Yaha tak ki uss aadmi ke checkbook pe jo bank list kiya gaya tha woh bhi non-existent tha. Officials ne samjha ki kahi woh aadmi masaak toh nahi kar raha. Officials ne use world map dikhaya unhone bataya ki jis desh ko woh Taured keh raha hai, woh asal me Andorra hai. Woh aadmi ab buri tarh irritate ho chuka tha.uske anusaar usne apni identity ki saari proofs de di thi,par phir bhi koi uski baat maan hi nahi raha tha aisa laga jaise uss aadmi ne apna hi masaak bana liya hai. Woh aadmi ab irritate hokar kehta hai ki “Andorra” naam ka koi desh exist hi nahi karta hai, balki uske jagah Taured hai. Uss aadmi ke anusaar uske desh ki history 1000 saal se bhi jyada purani hai. Inn sab baaton ke bawajood uss aadmi ko officials ne detained yaani ki apne hiraasat me le liya. Officials ne uss aadmi ko Airport ke paas ki hotel me raat bhar rukne ke liye ek room de diya, taaki tab tak officials iss pure maamle ki jaankaari juta sake. Par agli subah uss aadmi ne aur mystery create kar di, kyunki agli subah woh aadmi achaanak hi apne hotel room se gaayab ho gaya. Ajeeb baat yeh hai ki uske room ko hotel ke main log guard kar rahe the, jis wajah se uska bhaagna naamumkin tha. Yaha tak ki Airport officials ne uss aadmi ki jo document rakhi thi jisme Taured desh ka passport, Visa aur bank details jaisi cheezen thi woh bhi acchanak hi airport se uss dauran gaayab ho gayi. Aisa lag raha tha ki aisa kuch hua hi nahi tha. Logon ke paas koi proof nahi bacha tha jisse woh yeh baat saabit kar sake ki ek Taured desh ka aadmi Japan aaya tha. Halanki kuch books me uss aadmi ke baare me likha gaya hai jaise ki “The Directory of Possibilities” ya “Strange but True: Mysterious and Bizarre people”.
Pata nahi woh aadmi aakhir tha kon? Ek baar aisa hi kuch Germany me hua, jab ek aadmi ne kaha ki woh Laxaria naamak desh aur Sakria naam ke continent se hai, jo humari duniya me exist hi nahi karti hai. Iske alawa ek ajeeb si bhaasha bolne waala aadmi 1905 me Paris se bread churate pakra gaya tha. Uss aadmi ke according woh Lizbia se hai. Authorities ko laga ki woh aadmi Lisbon se hai jise Portuguese me Lizboa bhi kaha jaata hai. Halanki uss aadmi ki bhasha naa hi Portuguese thi naa hi woh Portugal ki map ko pehchaan paa raha tha.
Aapke according woh log kon the? Kya woh dusri duniya se taaluk rakhte the? Hume apne jawaab comment section me jarur bataye.
