Kahani ki shuruaat hoti hai North Kashmir ke Gurez sector se. Hum dekhte hai ki har raat ki tarah 18 August 2011 ki raat bhi Indian Army ke do soldiers Kishen Ganga Nadi ke paschimi kinare par surveillance kar rahe hote hai. Tabhi achanak se un dono soldiers ko unke night vision monoculars mein kuch ajeeb si cheej dikhayi padti hai. Ye dono soldiers apne high tech night vision monoculars ki madad se nadi ke doosre kinare par Line Of Control ki taraf ho rahi hulchul ko dekhne ki koshish karte hai. Ye dono soldiers iss waqt jis jagah par hote hai, vo jagah Line Of Control se 1Km ki doori par hoti hai or iss jagah se sabse jyada aatanki ghuspeth hoti hai. Ek soldier jab apne monocular ke lens ko set karke dekhta hai to vo ekdum se shock ho jaata hai. Vo dekhta hai ki kuch log Kishen Ganga nadi ke poorvi kinare par ek rubber boat ko fulakar nadi ko paar karne ki koshish kar rahe hote hai, or fir do-do ki jodi banakar boat mein savaar hokar Nadi paar karne lagte hai. Ek soldier apne saathi se kehta hai ki jaldi se Rana ko call Karo.
Darasal, Rana North Kashmir mein Indian Army ki 15th Maratha Light Infantry ke operations headquarter ka naam tha. Hum dekhte hai ki headquarter mein Lieutenant Navdeep Singh ( Bobby Deol ) aur Colonel Girish Upadhyay ( Sunny Deol ) eksaath baithkar dinner kar rahe hote hai. Lt. Navdeep ne abhi 5 mahine pehle hi army join ki hoti hai. Lt. Navdeep March 2011 mein Officer’s Training Academy Chennai se pass out huye the, jiske baad unhe Army Ordinance Corps mein commissioned kiya gaya tha. Kuch din ke baad Lt. Navdeep ko 15th Maratha Light Infantry ke saath attach kar diya jaata hai, jo iss time Kashmir mein serve kar rahi hoti hai. Dinner ke dauraan Colonel Upadhyay dekhte hai ki Lt. Navdeep thode se bechain hai or unka Mann dinner mein bhi nhi lag raha hai. Colonel Upadhyay Lt. Navdeep se unki bechaini ka kaaran poochte hai, to Lt. Navdeep Colonel Upadhyay se kehte hai ki vo ghuspethiyon ka saamna karne ke liye kaafi excited hai lekin pichle 5 mahino se yahan par koi bhi action nhi hua hai. Colonel Upadhyay ek smile ke saath Lt. Navdeep se kehte hai ki tum thoda patience rakho, ye Gurez sector hai yahan par aaye din ghuspethiyon ke saath muthbhed hoti hi rehti hai. Dinner karne ke baad Lt. Navdeep apne seniors ko good night wish karte hai, or apne Barack mein chale jaate hai.
Barack mein jaane ke baad Lt. Navdeep sabse pehle Gurdaspur mein apni girlfriend ko call karte hai, kuch minutes baat karne ke baad Lt. Navdeep achanak se call cut kar dete hai. Unki girlfriend niraash ho jaati hai, lekin Lt. Navdeep ne apni girlfriend ko pehle hi bta diya tha ki jab bhi vo ese achanak se call cut karde to vo samajh jaaye ki use CO sir ne bulaya hai. Apni girlfriend ka phone cut karne ke baad Lt. Navdeep jaldi se operation room mein jaate hai, jahan Colonel Upadhyay unhe batate hai ki unhe surveillance team se information mili hai ki lagbhag 12 atankwadi ek rubber boat ki madad se Kishen Ganga nadi paar karne ki koshish kar rahe hai. Ye khabar milte hi Lt. Navdeep Colonel Upadhyay se ghuspeth ki location par bhejne ke liye request karte hai. Colonel Upadhyay Lt. Navdeep ko unki team ke saath ghuspeth ki location par jaane ki permission de dete hai, iske saath hi Colonel Upadhyay or bhi kai ambush teams ko location par jaane ke orders dete hai. Colonel Upadhyay se order milte hi Lt. Navdeep apni AK-47 rifle ko check karte hai or apni team ke saath Rana headquarter se ghuspeth ki location ke liye nikal jaate hai.
Surveillance team se lagbhag 500 meters dur Lt. Navdeep apni team ke saath Kishen Ganga nadi ke kinaare par position le leti hai. Lt. Navdeep aur surveillance team ke beech mein teen or teams apni apni positions le chuki thi. Sabhi teams ke apni apni positions lene ke kuch minutes baad hi, unke radio par surveillance team ki taraf se ek message aata hai. Message hota hai ki 14 se 15 log hathiyar ke saath apni back par bade bade bag taange do do ke group mein rubber boat ki madad se nadi paar kar rahe hai.
Aage kya hoga ? Kya Lt. Navdeep hoge apne operation mein kaamyaab ? Jaanenge iss blog ke agle part mein.
