Pichli blog me humne Kennedy ki hatya ko baariki se jaan’ne ke liye, sabse pehle unke hatyare Oswald ko jaana, jo U.S Marine Corps me kaam karne ke bawajood bhi dushman desh, Soviet Union ka hissa ban’ne aur unhe America ki khabar dene ko utaaru tha. Soviet Union ne Oswald se pucha ‘kya use US waapas jaana hai?’ Ispe Oswald ne saaf taur pe keh diya ki ‘nahi! use Soviet ka hi naagrik banna hai’. Oswald ne embassy waalon se kaha ki woh US marine corps me radar operator reh chuka hai. Aise me woh unhe kayi aise informations dene me kaamyaab rahega, jo Soviet Union ke bahut kaam aa sakta hai. Oswald ke iss bayaan ke baad, marine se use jo “honourable discharge” mili thi, woh badal kar “undesirable” kar di gayi. Oswald ko Soviet Union me rehne ki permission de di gayi. halanki Oswald chahta tha ki woh “Moscow State University” jaaye lekin 1960 me use Belarus bhej diya gaya, jaha ke Electronic shop me Oswald ek “Lathe operator” ke taur pe kaam kar raha tha. Lathe ek aisi machine hoti hai, jisse metal ya wood ko shape di jaati hai. Independent Belarus ke first head of state Stanislau(स्टानिस्लाउ ) bhi pehle ussi electronic shop me kaam karte the, jaha pe Oswald karta tha aur unhe tab Oswald ki Russian sudhaarne ki zimmedaari di gayi thi. Oswald ko sarkaar dwara subsidized, fully furnished studio apartment, prestigious building me di gayi. Oswald ko factory ki taraf se bhi pay mil raha tha, jis kaaran Oswald bade aaraam se ek working-class Soviet ke taur pe rehne laga. Halanki use kadi nigraani me bhi rakha gaya. 1960 se 1961 ke beech Oswald apni co-worker Ella German ko date karne laga. Ella Belarusian thi, jiska janam 1937 me hua tha. Ella aur Oswald hafte me do baar ek dusre ko date karte the aur factory me saath hi me khaana khaate the. Apne diye ek byaan me Ella ne bataya ki “Oswald accha dikhne waala ladka tha, jiski sense of humour bhi acchi thi.” Ella ke mutabik Oswald baaki ladkon ki tarah rough aur rude nahi tha. Ella Oswald ko like nahi karti thi, woh bas Oswald ko akela dekh thodi dukhi thi, aur issi wajah se Ella Oswald ke saath thi. Halanki Oswald ki aankhon me yeh relationship kaafi serious ho chuki thi, lekin October aate-aate unki relationship khraab ho gayi, jab Ella ko pata chal ki shayad Oswald dusri ladki ko bhi date kar raha hai. Wahi jab 1961 me Oswald ne Ella ko propose kiya toh usne seedhe reject kar diya. January 1961 me Oswald ne apni diary me likha ki “mai yaha rehne ke baare me apni iccha pe dobara vichaar kar raha hu. Yaha ka kaam kaafi dull hai, jo paise mujhe yaha mil rahe, unhe mai kahi bhi acche jagah spend nahi kar paa raha, naa hi koi nightclubs aur naa hi koi Bowling alleys…bus ab bahut ho gaya…mere se ab aur nahi Saha jaa raha.” Kuch hi samay baad, Oswald jisne apni official U.S citizenship ko nahi choda tha, woh Moscow Stith American Embassy me ek baar phir jaata hai aur US waapas jaane ke apne iccha ko, unke saamne rakhta hai. Embassy se Oswald apni American passport waapas maangta hai aur kehta hai ki use waapas America jaane de.
Ussi saal ke March me Oswald Marina Prusakova se milta hai, jo tab 19 saal ki thi aur ek pharmacology student thi. Oswald aur Marina ne apne mulakaat ke 6 hafte baad hi shaadi kar li. 1962 ke February me Oswald ki beti “June” ka janam hua. Iske baad Marina aur Oswald Moscow stith U.S Embassy ka rukh karte hai, taaki unhe woh documents mil sake, jisse Marina bhi Oswald ke saath, ek immigrant ke taur pe America jaa paaye. Iske baad U.S Embassy ne Oswald ko U.S jaane ke liye “435.71” dollars ka loan diya, jise “Repatriation loan” bhi kehte hai. Loan milne ke baad Marina, Oswald aur unki beti, Soviet Union se America ke liye rawana ho gaye, jaha pe Oswald ke expectation ke ulat unhe bahut kam media coverage di gayi. U.S pahuch kar Oswald apne pariwaar ke saath Dallas-Fort Worth me rehne laga, jaha pe Oswald ki maa aur bhai reh rahe the. Iss area me reh kar Oswald ke pariwaar ka dusre anti Communist Russian aur East European immigrants se saamna hua. Apne dwara diye ek bayaan me Alexander kehte hai ki “Russian immigrants Marina ke liye sympathy rakhte the, lekin woh Oswald ko Rude aur arrogant maante the, jise immigrants bus jhel rahe the.” Halanki in sab ke baad jab Marina ne Oswald ko chodne ka koi sign nahi dikhaya, toh Russian immigrants ne Marina ko bhi chod diya. Issi beech Oswald aur Marina ne apne kuch Russian immigrants dost bhi bana liye. U.S me reh kar Oswald ne kuch jobs me bhi apply kiya, Oswald ka pehla job ek welding company me tha, jaha se woh jald hi bore ho gaya aur naukri chod di, dusra job Oswald ne photo-print trainee ke taur pe kiya, jaha pe uski rudeness ki wajah se, ek baar bada jhagda hone se bacha. Ussi jagah jab ek din Oswald ko Russian language ki magazine ko padhte dekha gaya, toh usse 1 hafte ke andar apni dusri naukri se bhi haath dhona pada.
Kaha jaata hai ki 1963 ke March me kisi dusre aadmi ke sahare, Oswald ne ek rifle khareedi, jo 30 dollar ke kareeb thi. Iske baad usne issi method se ek revolver bhi khareeda. Maana jaata hai ki Oswald Retired U.S Major General “Edwin Walker” ki hatya karne ke prayaas me tha. Aur 1963 me usne Edwin ko maarne ka ek fail attempt bhi kiya tha. Halanki iss baat me kitni sachayi hai yeh koi nahi jaanta hai, kyunki shaayad Oswald ko ek killer mindset ka dikhaane ke liye bhi, aisi kahani banayi gayi hogi. Kyunki kisi ne dekha nahi ki Oswald ne Edwin pe shoot kiya. “U.S House Select Committee on assassination” ka kehna hai ki “saare saboot yeh dawa kar rahe hai ki Edwin ki hatya karne ke pryaas ke peeche Oswald tha.” Yaani ki koi puri tarah se confirm nahi hai, bus ek assumption ke basis pe Oswald ko aaropi banaya gaya tha. Edwin Walker anti Communist, अलगाववादी aur John Birch Society group ke member the. Edwin apne virodhi nature ke kaaran arrest bhi huye the, jab unhone racial discrimination ko rokne ke khilaaf apni awaaz Mississippi ke university me uthayi thi. Edwin pe desh ki shaanti khraab karne aur deshdrohi jaise kayi charges lagaye gaye. John. F. Kennedy ke bhai Robert F. Kennedy ne Edwin ko mental hospital me rakhne ki baat kahi, jise jury ne mana kar diya.
Jaanch me pata chala ki Marina ko Oswald ne pehle hi bata diya tha, ki woh Edwin Walker ke ghar bus se jaayega aur uspe apne rifle se shoot kar dega. Lekin iss baat pe bhi saaf taur pe yakin nahi ki jaa sakti. Marina ke anusaar Oswald Edwin ko fascist organization ka leader maanta tha. Oswald ne Marina ke liye, ek letter bhi choda tha, jo maana jaa raha hai Edwin ke hatya ke pryaas karne ke, ek raat pehle ki thi. Letter me Oswald ne Marina ke liye likha tha ki agar woh waapas nahi aata hai, toh use kya karna hoga. Yeh note Kennedy ke murder ke 10 din baad mila. Aisa bhi ho sakta hai ki jab Kennedy ki hatya karne ke liye Oswald jaa raha ho, tab usne Marina ke liye yeh note likha ho, kyunki woh shayad kahi na kahi jaanta tha, ki hatya ke baad who kabhi waapas nahi aa paayega, jo ki hua bhi. Yaha tak ki Kennedy ke assassination se pehle tak, Dallas police ko iss baat ka bilkul bhi andaaza nahi tha ki aakhir Edwin Walker pe kisne goli chalayi. Par Kennedy ki hatya ke baad, Police ka saara shak Oswald pe gaya. Yaani ki Oswald ne hi Edwin pe shoot kiya tha, yeh abhi tak clear nahi hai! kuch theories ko mila kar assume kiya jaa raha hai. Logically dekha jaaye toh Kennedy ke bhai ne Edwin ko mental hospital ka raasta dikhaya, iss wajah se Oswald ke liye Kennedys dushman nahi balki dost saabit hote, dusri yod kabhi-kabhi J.F.K Communist bhi maane gaye the, aise me Oswald apne hi president ki hatya kyun karega aur phir Edwin aur Kennedy ka case, ek dusre se kaise jooda ho sakta hai?
Conspiracy theories iss maamle ko lekar bahut hai lekin, jaisa logon ko aaj-tak dikahya gaya hai maamla bilkul bhi waisa nahi hai.
Toh darshakonn aapko kya lagta hai, Oswald ne kyun Kennedy ki hatya ki hogi? Kennedy ke khilaaf, Oswald ne pehle koi bayaan bhi nahi diya hai, aise me usne apne mann se toh iss hatya ko nahi anjaam diya hoga. Toh phir kon tha inn sab ke peeche? Jaan’ne ke liye padhte rahiye humare iss blog ko, jiska naam hai Bollygrad studioz.
TO BE CONTINUED… PART-3
