Pichli blog me humne padha ki kaise FBI officers ko kahi se information milti hai, ki “Little Bohemia lodge” me Dillinger aur uska ek saathi Nelson pahucha hua hai. FBI ki task force iss khabar ko sunte hi lodge ki yor apna rukh karti hai. Halanki waha pahuch kar, jaise hi FBI poore lodge ko chaaron yor se cover karne ke liye pahuchti hai, waise hi koi unpe submachine gun se upar se humla kar deta hai. FBI agents bari saavdhaani se khud ko cover karte hai. Wahi unme se ek agent jaldi se telephone ki madad se dusre agents ko maamle ki khabar deta hai. Jabtak woh agent telephone pe baat kar raha tha, tabtak ek dusra agent andar aa kar kehta hai ki, 2 mile(मील) ki doori pe based ek cottage me koi pareshaani aa gayi hai. Iss suchna pe FBI ke special agent Carter, ek constable aur dusre FBI agent ke saath 2 mile ki doori tay kar,uss jagah pe pahuchte hai, jaha pe unhe ek car parked ki hui milti hai. Constable ke according, woh car shayad kisi local resident ki hi thi. Wahi dusri car me Dillinger ka saathi Nelson, 3 local resident ko gunpoint pe pakad rakha tha. Nelson ne turant apni revolver ko FBI ke car pe point rakha aur unhe car se baahar aane ko kaha, par jabtak FBI uski baaton ko maante usse pehle hi Nelson ne goli chala di, jisme special agent Carter maare gaye. Wahi Nelson ki goli se dusra agent aur constable buri tarah se ghayal ho chuke the. Nelson turant apni gaadi pe baith jaata hai aur mauke se faraar ho jaata hai. Wahi Bohemia lodge me submachine ki golibaari jab rukti hai, use pehle hi Dillinger waha se jaa chuka hota hai. Jab agli subah agents lodge ke andar jaate hai, toh unhe waha pe sirf 3 डरी hui auratein milti hai. Pichli raat Dillinger aur uske 5 saathi agents ke lodge ko gherne se pehle hi waha se bhaag chuke the.
Washington me FBI ke Director Edgar Hoover ne special agent Samuel ko Dillinger ke khilaaf investigate karne ka order diya. Samuel ne Chicago me FBI ka ek headquarter form kiya, jaha pe uske saath Chicago office ke in-charge aur special agent Melvin bhi maujood the. Jab tak dono agents milkar apni strategy ko uss headquarter me plan karte the, tab tak Samuel ke under me maujood dusre agents, Chicago police ke saath milkar rumors aur tips pe apni nazar banaye huye the. July 21, 1934 ke dopehar me ek aurat ne bataya ki, woh kuch paison ke liye Dillinger ka pata FBI ko de sakti hai. Uss aurat ne apna naam Anna sage (एैना सेज) bataya. Anna ke mutabik Dillinger Polly Hamilton naam ki ek ladki ke saath kal shaam ko movie dekhne jaane waala tha. Asal me Anna Polly ko pehle se jaanti thi aur ek baar Polly Dillinger ke saath uske ghar pe bhi aayi thi. Anna ne Dillinger ko newspaper photographs se pehchana, jiske baad usne paison ke liye FBI ki madad karne ka socha. Anna ne FBI agents ko bataya ki abhi tak theater tay nahi hua hai, lekin ek baar theater select ho jaane pe woh unhe iss baare me inform kar degi. Anna ne yeh bhi bataya ki, woh orange color ke dress me rahegi, jisse FBI ko use pehchaan’ne me asaani hogi. Agle din yaani ki 22 July 1934 ko, Samuel ne Chicago ke saare officers ko urgent duty ke liye apne paas bula liya. Anna ne plan ko confirm karne ke liye, usi shaam FBI ko phone kiya, halanki use abhi bhi yeh pata nhi tha ki, aakhir Dillinger “Biograph” aur “Marbo” me se kis theater me jaane waala hai. Issi kaaran agents aur police officers ko dono theater me tainaat kar diya gaya. Raat 8:30 baje Anna, Dillinger aur Polly Hamilton “Biograph theater” me “Manhattan Melodrama” naam ki movie dekhne pahuche. Agent Melvin ne special agent Samuel ko phone kar jaankaari di ki Dillinger “Biograph theater” me maujood hai, jis wajah se saare agents aur police officer “Marbo theater” se seedhe Biograph theater pahuch gaye. Special agent Samuel ne FBI ke Director Edgar ko bhi phone kar maamle ki suchna di. Edgar ne Samuel se kaha ki, bheed se bhare theater me aam logon ki jaan ko risk me daalne se accha, unhe baahar hi wait kar lena chahiye. Iske baad sabhi agents ko inform kar diya gaya ki, unhe bina matlab ke khud ki jaan ko khatre me daalne ki koi jarurat nahi hai.
Raat kareeb 10:30 baje Anna, Dillinger aur Polly theater se baahar nikalte hai. Baahar nikal ke jaise hi woh मूड़ते hai, waise hi side me khada agent Melvin apni cigar ko jala deta hai. Yeh ek tarah ka signal tha, taaki baaki ke agents andar aa jaaye. Dillinger samjh chuka tha ki, aakhir kya maamla hai. Ab Dillinger kaafi saavdhaani se kaam le raha tha. Woh dheere se apne pant se pistol nikaalta hai aur turant गली ki yor bhaagne lagta hai. FBI agents ke gun se, peeche se 5 shots fire kiye gaye, jinme se 3 Dillinger ko lage aur woh muh ke bal zameen pe gir gaya. 22 july 1934 ki raat kareeb 10:50 me, Dillinger ko paas ke hi ek hospital me ‘dead’ announce kar diya gaya. Dillinger pe 3 agents ne milkar fire kiya, halanki unhone kabhi yeh nahi bataya ki unme se kisne asal me Dillinger ko maara tha. FBI ke Director Edgar Hoover ne inn teeno agents ki bahaduri ki taarif ki.
FBI ke documents ke mutabik, 22 july ki raat ki iss ghatna ko “gangster era” ke annt ki shuruat kaha jaata hai.
Iss maamle ke baad 27 logon ko court ke dwara, mujrim ko sharan(शरण) dene aur uski madad karne ka aaropi paaya gaya. 27 November 1934 ko Baby Face Nelson FBI agents ke saath gun fight me buri tarah ghayal ho gaya tha. Wahi iss fight me special agent Samuel aur agent Hollis maare gaye. Agent Hollis unhi teen agents me se ek the, jinhone Dillinger pe goli chalayi thi.
Toh yeh thi, Famous Bank robber John Dillinger ki kahani, jisne apni zindagi me 30 se upar banks ko loota tha. Dillinger ke kayi aise saathi the, jo most wanted criminals the. Dhoom-4 ki kahani ki agar hum baat kare, toh Dillinger jaisa ek khatarnaak criminal film me shaamil hote hi inspector Dixit ke liye badi musibat ban sakta hai. Iss kahani me agar Dhoom ka main character Dillinger ki tarah चालाक bank robber hua, toh kahani kaafi interesting ban jaayegi, kyunki aisi kahani me gangsters ke saath police officers ka bhi murder hoga, gunfights hogi aur khub saara action hoga. Yeh ek aisi nayi kahani saabit ho sakti hai, jise Dhoom franchise ke darshak dekhna pasand karenge.
The End. Part-4