Duniya me waise toh har din hi loot aur chori hoti rehti hai. Lekin jab baat duniya ki sabse badi loot ki aati hai, toh sabke dimaag me “Antwerp heist” hi pehle aata hai.
Antwerp heist duniya ki sabse badi diamond heist thi. Yeh loot 2003 me, Belgium ke Antwerp me hui thi. Iss heist ko “heist of the century” yaani ki ‘sadi ka sabse bada loot’ kaha jaata hai.
Lekin jis dukaan me yeh chori hui waha pe diamond bahut safely rakhe gaye the. Jis लॉकर(vault) me diamond the, woh main floor se do floor aur neeche thi. Ise bhaari suraksha me rakha gaya tha. Yaha tak ki Diamond locker ko ek alag locker me rakha gaya tha, jisme kareeb 10 crore se jyada number combination diye gaye the. Iske alawa heat detector, seismic(भूकंप) sensor, Doppler radar aur magnetic field bhi insert kiye gaye the. Yaha tak ki jis building me yeh diamond thi, uske liye special security force ko tainaat kiya gayw tha. Asal me yeh building Antwerp ki “Diamond District” me stith thi, jaha ki suraksha kaafi tight hai. “Antwerp Diamond District” aisi jagah hai, jaha pe diamond ko kaatna, shape dena ke alawa precious diamond rakhe jaate hai. Issi wajah se iss area ki suraksha kaafi kadi hai. Lekin itni security me bhi, 2003 me iss area me chori ko anjaam diya gaya. Leonardo Notarbartolo(नोतरबार्तोलो) ne Antwerp Diamond District me, ek lavish office ko rent pe liya. Iss office ke liye Leonardo per month 700 dollars, yaani ki 57,000 rupay pay karta tha. Leonardo peshe se ek jeweler tha, jise iss chori ko anjaam dene ke liye 10 saal ki saza sunayi gayi. Leonardo Italian tha. Loot me uske 4 aur saathi the, jo bhi Italians the. 3 ko 5-5 saal ki saza mili, wahi chautha kabhi police ki pakad me nahi aa paaya. 16 February, 2003 ke Sunday ko hui iss chori me, 109 diamond ki boxes ki loot hui, jiski keemat 100 million thi. Iss loot ke liye choron ne 18 mahino ki taiyaari ki. Inn 18 mahino me choron ne security system ko baariki se samjha. Yahi kaaran raha ki jab loot ko anjaam diya gaya toh guards bhi hairaan the, ki aakhir lootere security system ko todne me kaamyaab kaise huye. Looteron ne itni safayi se security ko hack kiya ki jab woh loot karne ke liye andar ghuse, toh naa hi koi buzzer ki awaaz sunayi di aur naa hi kisi guards ko iss baare me khabar huyi. Looteron ne locker aur building ki secret pictures lene ke liye camera pen ka istemaal kar building ka survey kiya. Asal me Leonardo ne apne plan ke tehat logon ko bataya ki woh ek Italian jeweler hai. Leonardo jaha logon ke saamne khud ko jeweler ke roop me dikhata tha, wahi woh iss beech kayi choti-moti jewelry heist ko bhi anjaam de chuka tha. Bhale hi police ka maan’na tha ki loot ke peeche Leonardo ka haath hai lekin Leonardo ne dawa kiya, ki use ek anjaan diamond dealer ne contact kiya tha aur use paison ki laalach dekar, iss crime ko uske through karwaya. Leonardo ne bataya ki use building aur locker ki pictures lene ke liye paise diye gaye the. Ussi pictures ke through diamond dealer ne locker ki ek replica(copy) taiyaar ki. Leonardo ne kaha ki dealer ne use Italian looteron ke saath milkar, ek gang form karwayi, jisme shaamil har chor loot me acchi tarah se maahir the. Leonardo ke aisa kehne ke bawajood police uski baaton ko maan’ne ke liye taiyaar hi nahi thi, ki ek anjaan dealer jaisa bhi koi insaan iss loot ke peeche shaamil hai. Iske alawa uss diamond dealer ke hone ka koi saboot bhi nahi mila. Jis Diamond District me loot hui, waha pe 100 se jyada diamond trader apni lavish dukaan chalate hai. 3 block ki iss Diamond District me kadi suraksha hai. Wahi jis diamond ki chori hui uski suraksha ko तोड़ना kisi aam insaan ke bas ki baat nahi thi. Yeh 10 layer ki security se bhari thi. Leonardo ne locker, building aur aas-paas ke ilaake ki 100 se jyada pictures click ki. Inn pictures ko Leonardo ne ek pen ki madad se liya, jisme 100 high resolution pictures click karne ki capacity wala ek camera inserted tha. Diamond District me photos lena saaf mana hai, lekin kisi ka bhi dhyaan Leonardo ke pencam pe nahi gaya. Inhi images ke through loot ko anjaam diya gaya. Leonardo ke pass ek aisi paas thi, jiske through woh 24 ghanton tak ke liye Diamond District ke kisi bhi dukaan me jaa sakta tha. Kyunki Leonardo ne District me apna ek dukaan liya tha aur usne khud ko ek Italian diamond jeweler bataya tha, issi wajah se kisi ka bhi shak uspe nahi gaya. Woh apne pen cam ke saath dukaan me ghusa, locker ko dekha, aas-paas ki pictures click ki aur shaanti se baahar aa gaya. Naa kisi ko uspe shak hua aur naa hi usne shak ka koi mauka diya. 15 February, 2003 ki aadhi raat ko Leonardo ne apne saathiyon ke saath loot ke plan ko implement kiya. Looteron ne saavdhaani se building ke heat-sensing infrared detector ko disable kar diya. Phir unlogon ne security cameras ko plastic bag ki madad se cover kiya. Iske baad lootere bade aaram se 10 layer ke security ko paar kar locker tak pahuch gaye. Iss loot se pehle tak logon ko lagta tha ki 10 Layer ki security ko koi nahi tod sakta hai. Looteron ne cameras, key lock, magnetic sensor, keypad disarming sensor ke alawa aur bhi kayi tarah ke locks ko paar kiya aur ek 1 foot lambi key ko dhund nikala, jo steel ke gate ke bagal me rakhi ek box me thi. Looteron ne iske baad darwaza khola aur andar ghus aaye. Ussi jagah unlogon ne aluminum ki sheet ka istemaal kiya aur diwaar pe lagi magnets pe laga diya. Isse sensor unhe detect nahi kar paayi aur alarms bhi nahi baja. Locker ke andar ghus aane ke baad looteron ne dekha waha pe kareeb 109 boxes rakhi hai jinme diamonds thi. Looteron ne ek special drill ki madad li aur saare lockers ko khol diya. Lockers jaise hi khula waise hi looteron ne jaldi-jaldi gold aur diamonds ko apne bag me bharna shuru kar diya. Jab woh log aur weight uthaane ke laayak nahi rahe toh unhone jaldi se building ke main office se videotapes ko chura liya aur mauke se faraar ho gaye. Kyunki looteron ne pehle hi locker ki replica(copy) ke sahaare khud ko lock todne me maahir bana liya tha, issi wajah se unhe sirf 10 sec laga aur woh 109 boxes ke lock ko, ek special driller ki madad se kholne me kaamyaab huye. Lekin pure loot me unhe kareeb 2 ghante ka wakt laga. Loot ke baare me logon ko seedhe Monday yaani ki 17 February 2003 ko pata chala. Loote gaye diamonds ko choron ne alag aalg gaadi me bhar diya. Loot ke baad looteron ka plan tha Italy ke Milan me milne ka, jaha pe woh loote gaye items ko ek dusre me divide karne waale the. Halanki looteron ne acche-khaase evidence jaldibaazi me apne peeche chod diye. Issi wajah se Leonardo ko pakarna police ke liye asaan ho gaya. Leonardo ko 10 saal ki saza, wahi baaki looteron ko 5-5 saal ki saza di gayi. Halanki Leonardo ne police ko bata diya ki 100 million dollar ki iss heist ko usne nahi balki diamond dealer ne anjaam diya tha. Aur use sirf 20 million dollar hi mile. Par Leonardo ki baaton pe police ko bharosa nahi hua. Police Leonardo se jitna diamonds le sakti thi, unhone liya, lekin puri rakam kabhi unke haath nahi aa saki, naa hi uss diamond dealer ke baare me kisi ko pata chala. Iss chori ko log century ki sabse badi loot kehte hai.

Toh yeh thi aaj ki kahani, jo ki famous “Antwerp heist” pe based thi. Dhoom ka protagonist aise kisi badi loot ko agar anjaam deta hai, toh film ki canvas aur storyline bahut anokhi lagegi. Isse logon ko Belgium ki location ke saath ek acchi plot aur audience ko khub saara entertainment bhi mil sakta hai.
The End