Ek baar reputation kho dene pe shaayad hi woh waapas milti hai. Kuch aisa hi haal Sajid Khan ke saath hua, jab Nadiadwala ne unki ko request seere se nakaar diya. Housefull-4 ke dauran “MeToo” campaign ke shikaar huye Sajid Khan ko, ab unhi ke dost support karne se apne pair peeche kar rahe hai. Sunne me aaya hai ki Sajid Khan Housefull ke producer Nadiadwala ke saamne kaafi request kar rahe hai, taaki unhe Nadiadwala ek baar phir film ka hissa bana le, aur unhe Housefull-5 direct karne de. Lekin Sajid Khan ke request ke bawajood Nadiadwala ne unhe film se baahar ka raasta dikhaya hai. Sajid Khan ko laga ki thode dino baad log unpe lage allegations ko bhul jaayenge after all woh “Sajid Khan” hai. Lekin unhe yeh nahi pata tha ki unki yeh egoistic soch unhi pe bhaari pad jaayegi, jab unke film industry ke dost unse doori banane lagenge. Sajid Khan pe jabse aarop laga hai, tab se Housefull-4 kaafi jayda sensitive topic ban gayi thi, kyunki iss film ke actor aur director dono ko beech me hi hatana pada tha. Iss dauran Sajid Khan social media pe itne troll huye ki unki reputation ka paapad hi ban gaya. Kisi tarah sujh-bujh ke saath Housefull-4 release hui aur logon ke beech kaafi hit bhi rahi. Film itni hit hui ki khush hokar producer Sajid Nadiadwala ne, “Housefull-5” ki ghoshna kar daali. Ab jab naye part ki baat shuru ho gayi toh kahi na kahi Sajid Khan me bhi ek aasha ki Kiran jaagi, ki ab unhe waapas iss franchise me entry mil jaayegi. Sajid ne turant Nadiadwala ko phone kar request kiya ki unhe ab “Housefull-5” direct karni hai. Shuruat me toh Nadiadwala ne Sajid ki request ko pehle hi min me nakaar diya. par phir unhe apni aur Farah khan ki dosti yaad aa gayi. Asal me Sajid Khan ki behan aur Bollywood choreographer Farah khan ki Sajid Nadiadwala se acchi dosti hai, jis wajah Nadiadwala aur Sajid Khan me bhi pakki dosti ho gayi. Woh alag baat hai ki ek wakt aisa bhi aaya jab Nadiadwala aur Sajid ek dusre ko dekhna tak pasand nahi kar rahe the. Iss baare me hum aage baat karenge, lekin usse pehle hum aapko bata de ki aakhir kyun Nadiadwala ne Sajid ki request ki thi reject. Asal me Nadiadwala Sajid Khan ke request pe vichaar kar hi rahe the, ki Housefull franchise ke lead actor Akshay Kumar ne unhe aisa karne se mana kar diya. Nadiadwala ke anusaar unke best friend aur parosi Akshay kumar, Sajid khan ke saath kaam nahi karna chahte hai, issi kaaran majboran Nadiadwala ko bhi Sajid ki request ko reject karna pada. Dekha jaaye toh har koi aaj kal image conscious ban raha hai. Ab Akshay ko hi dekh lijiye sabhi jaante hai ki Sajid Khan aur unme kitni gheri dosti hai. Jab Sajid pe “MeToo” allegation laga toh uske kuch hi dino baad Akshay ka ek bara bayaan saamne aaya, jisme unhone kaha ki ‘Sajid pe se jaise hi allegation hat jaayega, woh unke saath aage jarur kaam karna pasand karenge.’ Akshay ke iss bayaan se Sajid ko laga ki unka dost ab bhi unke saath hai, lekin jab sach me dosti nibhaane ki baat aayi, toh Akshay ne Sajid Khan ka aakhiri hope tor kar unhe baahar ka raasta dikha diya.
Khair, yeh toh business ki baat hai. agar image nahi maintain karenge toh unhe apne career ko bhi daanv le lagana pad jaayega.
2015 ke ek interview me Sajid ne apni aur Nadiadwala ki dosti ko lekar kaha th,a ki “mere liye meri life ka sabse bada regret yeh hai, ki mujhe apne sabse acche dost Sajid Nadiadwala se ladayi nahi karni chahiye thi. Mujhe lagta hai unhe bhi iska regret hai. Mai aur Nadiadwala soul brothers ki tarah hai. Unhone bhi meri tarah gareebi dekhi hai. Woh kaafi acche insaan hai. Humari dosti 17 saal se chali aa rahi hai, lekin pichle do saalon se hum dost nahi the. Par ab hum waapas aa gaye hai. Hum dono ne yeh baat maani ki 17 saal ki dosti me, do saal ka break chalta hai. Hum dono ko pata tha ki hume waapas saath aana hi tha.”
Asal me 2012 me housefull-2 tak saath kaam karne ke baad Sajid Khan aur Nadiadwala me kisi baat ko lekar ladayi ho gayi thi, jis wajah se Nadiadwala ne unhe Housefull-3 ka hissa nahi banaya. Woh alag baat hai ki Sajid Khan baar-baar yeh kehte aaye hai ki “unhone film ko reject kar Nadiadwala ka offer thukraya tha”.
Ab maamla jo bhi ho, par ab yeh pakki baat hai ki Nadiadwala aur Sajid Khan ki dosti ke beech aayi daraar thik ho gayi hai.
The End