Mumbai, Delhi, Hyderabad, Pune kuch aisi cities hain jin mein India ka youth rehta hai. Delhi strategically important hai toh Mumbai economically! Aise mein agar inn dono cities mein attack plan hota hai toh India ki jadh hil sakti hai.
January 12 ko Delhi- NCR mein khabar aayi thi ki sleeper cells active hogaye hain. Yeh Khalistani sleeper cells hain. Dehshat phailaane ke liye, Police ko aagha karne ke liye, inhone saaf saaf Delhi mein bata diya tha ki yeh kuch bada plan kar rahe hain. Inka tarika bhi bilkul alag tha. Naa toh inhone koi attack kiya, aur naa hi koi call kar kar, yaa mail bhej kar bataya.
Hua yun ki 12 January ki subah ko Delhi ki bahut si jagahhon par jaise Vikaspuri, Janakpuri, Paschim Vihar, Peeragarhi aur aisi hi West Delhi waali jagahon par inhone deewaron par graffiti banakar ailaan kiya!
Inn sabhi jagahon par inn Khalistani sleeper cells ne naare likhe the, aur ajeeb ajeeb si tasveerein banayi thi. Inn tasveeron mein kuch buildings giri hui dikh rahi thi, toh kinhein jagahon par aag lagi hui thi. Aur toh aur inn pictures mein khoon bhi behta dikh raha tha, toh logon ki darri hui shakal bhi bani hui thi.
Yeh sab inhone raat ke andhere mein kiya tha kyun ki subah jab sab uth kar kaam par laut rahe the toh yeh pictures deewaron par dikh rahi thi, aur posters auto par lage the, pedhon par lage the aur yaa tak ki public toilets mein bhi likh kar inhein sleeper cells ne chetawani di thi. Jagah jagah log darr gaye the, aur Police se puch taach kar rahe the.
Police ne agencies ko khabar kardi thi aur subah hi agency ke specialist jagah jagah inn pictures ko analyze karne mein lag gaye the. Woh dekhna chahte the ki kayin inn pictures mein koi sanket toh nahi hai jo Khalistani sleeper cells dena chahte hon!
Unhone unke likhe naaron ko bhi decode karne ki koshish ki. Naaron se toh yahi lag raha tha ki koi dhamaka hone wala hai Rajdhaani mein. Agency ne vada kiya hai ki woh iss dhamake se pehle hi inn sleeper cells walon ko pakdh lenge, taaki kisi bhi deshwasi par aanch naa aaye!
Koshish jaari hai magar tabse abb tak sab shaant hai. Naa toh uske baad koi activity hui hai, aur naa hi aisa koi dusra signal mila hai. Agency ne talaash band toh nahi ki hai, woh sakht checking bhi shuru kar chuke hain.
Toh bus iss baar Khalistani Sleeper Cells ki kahani dikhayi jaa sakti hai Sooryavanshi 2 mein. Akshay Kumar waise bhi inn sleeper cells ko dundh nikaalne mein specialist hain. Toh tyaar hojaayiye aise hi power pack performance ke liye!
-By Pratima Ratwani.
