Delhi me apna aatank faila rahe Tillu Tajpuriya ka asli naam Sunil Mann Tajpuriya hai. Tillu ka janam Delhi ke ek gareeb pariwaar me hua tha. Gareeb pariwaar se hone ke kaaran Tillu ne bachpan se hi kaafi dikkaton ka saamna kiya tha. Issi kaaran Tillu ka sirf ek hi sapna tha aur woh tha poore Delhi pe raaj karna. Naa sirf apne young age me Tillu ne Delhi ke banks me loot ki, balki woh jald hi Chota Rajan jaise criminals ke bhi contact me aa gaya. Tillu ki education ki baat kare toh usne apni schooling private school se ki hai, wahi uski graduation Amity University se hui hai. Gangster Tillu Tajpuriya ka aantank naa sirf Delhi me balki Haryana me bhi faila hai. Tillu ki Delhi aur Haryana me kayi properties bhi hai. Tillu murder aur vasooli jaise aur bhi kayi apraadhon ko abtak anjaam de chuka hai. Apne college ke dauran se hi Tillu aur gangster Jitendra Gogi kaafi acche dost ban gaye the, lekin college election ko lekar dono ki dosti ke beech dooriyaan badhne lag gayi. College me ho rahe student election ke dauran Gogi aur Tillu alag-alag candidates ko support kar rahe the, jis kaaran Gogi aur Tillu ke beech aksar behas ho jaati thi. Iss election me Gogi aur Tillu direct nahi khade the, lekin woh apne candidates ko mazbooti pahucha rahe the. Waise toh yeh baat aajtak police bhi nahi pata laga paayi hai, ki aakhir kyun itne acche dost hone ke bawajood bhi Tillu aur Gogi do alag candidates ko support kar rahe the. Wahi college ke dauran hi Tillu aur Gogi ne apna haath local criminals se mila liya tha. Gogi pe file hua pehla case bhi ek jgahde ko lekar hi tha. Asal me 2008 me College ke baahar Gogi ki ladai College ke dusre students se ho gayi thi, jis kaaran police ne Gogi ke khilaaf case file kiya tha, kyunki Gogi ne tab kisi ki hatya karne ki koshish ki thi. Iske baad bhi Gogi sudharne ke badle aur bhi dusre gangsters se joodta chala gaya. Tillu Tajpuriya ne bhi apna haath local gangsters se ab mila liya tha. Kaha jaata hai Gogi aur Tillu ka gang, ek dusre ka sabse bada rival hai. 2015 me Gogi ke gang ne Tillu ke khaas dost “Raju” ki hatya karwa di thi, jiske baad dono gangsters ke beech rivalry war shuru ho gayi. Yeh war din-prati-din itni kharaab ho gayi ki dono gang ek dusre ke members ki hatya karwaane lag gaye. Yeh gang war sirf yahi nahi ruki, balki 2018 me bhi dono gang ke beech jhagda hua, jiske baad dono ne ek dusre ke gang ke kuch members ko maar giraaya. Iss ladai me kuch nirdosh logon ki bhi jaan chali gayi thi. 2021 me Tillu Tihar Jail me band tha, ussi dauran usne Gogi ki hatya ka plan banaya. 21 September 2021 ko, Gogi ki Delhi high Court me kisi aarop ko lekar peshi thi, jiska pata Tillu Tajpuriya ko pehle se hi tha. Issi kaaran usne apne gang ke do logon ko court me vakeel banakar bhej diya. Tillu ke aadmi Court me pehle hi pahuch gaye the bas unhe intezaar tha toh sirf apne dushman Gogi ke aane ka. Wahi kuch der baad jaise hi Court me sunwayi honi shuru hui aur Gogi ko Courtroom me bulaya gaya, waise hi vakeel ke gate-up me maujood Tillu ke aadmiyon ne Gogi ko goli maar di, jisse uski mauke pe hi maut ho gayi. Jaankaari ke mutaabik jab Gogi ko goli maari gayi tab Tillu Tajpuriya live video chat se poore mamale pe nazar banaye huye tha.
Gogi ki hatya mamle me police ne aage jaakar Tajpuriya ke gang members ko toh pakar liya lekin Tillu ab bhi faraar hai.
Toh yeh thi aaj ki kahani. Ho sakta hai ki film KGF, aane waale wakt me aise hi kisi gang war ko anjaam de. Ho sakta hai ek wakt pe dost rahe Tillu aur Gogi ki hi tarah Rocky ka bhi koi dost Gold ke laalach ke kaaran uska dushman ban jaaye aur apni alag gang form karke KGF pe kabza jamane ka plan banaye.
The End