Baat saal 2016 ki hai, jab US me phanse ek Punjabi yuva ka video, achaanak Facebook pe viral ho gaya. Yeh aadmi khud ko Punjab ke Hoshiarpur(होशियारपुर) ka rehne waala Amarjit Singh bata raha tha. Amarjit Singh apne video me rote huye bata raha tha ki kis tarah se woh illegally Punjab se U.S.A pahucha aur waha jaakar phans gaya. Amarjit apni iss yaatra ki kahani batate huye kehta hai, ki usne sabse pehle Delhi se ek flight pakri thi, jisse woh Ecuador pahucha tha. Yahi se usne phir Donkey flight, yaani ki illegal route ka sahara liya, jisse woh Columbia pahucha. Columbia se woh phir Mexico aaya, jaha se boarder wall ke sahare woh America me illegally ghus aaya. Amarjit ki hi tarah har saal kayi log, Mexico-America boarder line ke sahare USA me illegal taur pe entry karte hai, jisse naa sirf America me population badh rahi hai, balki employment milne me bhi kaafi dikkatein aane lagi hai.
Amarjit ne apne iss video ko May 2016 me upload kiya tha, jisme usne kaha tha ki use America aaye huye kareeb 2 mahine ho chuke hai. Amarjit ne iss video ko Midland, Washington se upload kiya tha, shaayad woh tab wahi reh raha hoga. Amarjit Punjab me apne bitaye huye dino ko lekar kehta hai, ki jab woh Punjab me tha tab woh aaram se dopehar ke 2 baje, sirf so kar uthta tha aur use koi kuch bolta bhi nahi tha. Par wahi USA me use rozana subah uthna padta hai.
Amarjit ne humesha se hi videsh jaane ka sapna dekha tha. Uske do bade bhai bhi pehle se hi U.S me reh rahe the. Amarjit apne ghar aur apne pariwaar ke logon ko yaad kar emotional ho jaata hai. Woh batata hai ki Punjab me uske maata-pita aur Bhai use bahut acche se rakhte the aur ek aaram ki zindagi dete the. Amarjit kehta hai ki “mai bed pe khaata tha, apne bartan tak nahi uthata tha. Mere college ke din bhi kaafi mazedaar guzare. Mere parents bhi mujhse pyaar karte the, kyunki woh jaante the ki ek din mujhe bhi videsh me hi jaakar kaam karna hai.” Aisa kehte hi Amarjit ek baar phir ro padta hai. U.S me reh kar Amarjit ko 12 ghante kaam karna padta hai aur waha pe uska koi accha dost bhi nahi hai. Amarjit kehta hai ki yaha pe kisi ke paas bhi time nahi hai. yaha tak ki thodi der baat karne ke liye bhi logon ke paas wakt nahi hai. Amarjit kehta hai “kitna ajeeb hai, Punjab me reh rahe mere maata-pita ko logon se compliments mil rahe honge ki unke teeno bete hi videsh me settled ho gaye hai, lekin jispe beet-ti hai usi ko asliyat pata hoti hai. Ghar ko chod kar itni door aana bilkul bhi asaan nahi hai.” Film Dunki me bhi main kirdaar Punjab ke ek kisaan pariwaar se taalukh rakh sakta hai. Ho sakta hai Amarjit ki hi tarah SRK ka bhi kirdaar bachpan se hi videsh me settle hone ka sapna dekhe, lekin ho sakti hai ki cheezen uske mutaabik naa jaaye.
Amarjit toh phir bhi kaafi lucky tha ki use kam se kam Donkey flight ke hi through, lekin America me entry toh mil gayi aur iske alawa use waha pe ek naukri bhi lag gayi, kam se kam uski zindagi unn migrants ki tarah nahi thi, jo apna sab kuch chod kar America jaane ka sapna dekhte hai, lekin unhe boarder pe hi maar diya jaata hai, yaa phir U.S me illegally enter karne ke jurm me jail me band kar diya jaata hai. Aisi hi ek ghatna 2018 ki hai, jisme Punjab ke Kapurthala ke rehne waale 18 saal ke Davinder Pal Singh ki maut Mexico boarder pe ho gayi thi. Davinder apne ghar se U.S.A jaane ke liye nikale the. Iske liye unhone Donkey flight, yaani ki USA me enter karne ke liye illegal route ka istemaal kiya tha. Davinder ke hi gaaon ke rehne waale 20 saal ke Gaurav ki bhi maut ussi wakt ho gayi. Jaankaari ke mutaabik, Davinder aur Gaurav ne apni aankhon me America me settle hone ka sapna dekha tha. Yeh dono sabse pehle India se Greece, Italy aur Spain hote huye Mexico pahuche. Davinder aur Gaurav ke saath ek Punjabi ladki bhi thi, jiski identity disclose nahi ki gayi hai. Khair, flight se Mexico pahuchne ke baad inhe khatarnaak jungle ka raasta paar karna tha, jiske baad hi woh America pahuch paate. Davinder ke pita Sukhwinder ka kehna hai ki unhone travel agent ko 24 lakh rupay diye the, taaki woh safely Davinder ko U.S me enter karwa sake. Travel agents ne bhi Sukhwinder se Davinder ki safety ka waada kiya tha, jiske baad teeno yaani ki Davinder, Gaurav aur ek Punjabi ladki, July 2018 ko USA ke liye nikal pade the. Sukhwinder ke mutaabik unki apne bete se aakhiri baat, 6 july ko phone pe hui thi, jisme Davinder ne kaha tha ki woh apni destination ke kareeb hai aur jald hi America pahuch jaayega, jiske liye woh philhaal USA-Mexico boarder pe ek jungle ke raaste se, ek choti yaatra karne waala hai. Lekin iss jungle me teeno raasta bhatak jaate hai aur kayi dino tak bhukhe aur pyaase phans jaate hai. Unke paas khaane-peene ko kuch nahi tha, kyunki travel agent ne unhe bahut kam maatra me paani ki bottle aur snacks provide karwayi thi. Woh kisi tarah U.S ke Arizona me pahuch gaye, lekin beech jungle me hi bhookh aur pyaas ke kaaran unki maut ho gayi. Halanki kisi tarah uss ladki ki jaan bach gayi thi.
Dunki ki kahani me SRK ka bhi kirdaar, videsh jaane ka sapna dekhega, jiske baad woh Punjab me kisi travel agent ke contact me aa jaayega, jo use America me settle karaane ka sapna dikhayega aur badle me usse moti rakam vasoolega. Main kirdaar bhi apna ghar aur property bech kar travel agent ko sab kuch de dega, kyunki use umeed hai ki ek baar America pahuch jaane ke baad uski life toh waise hi set hai, lekin aisa hoga nahi.
The End