Kuch din pehle hi Bareilly ka ek ajeeb sa qissa headlines mein tha. Ek din ek regular state bus kuch passengers ko lekar jaa rahi thi. Yeh bus ka driver waise hi thaka hua tha, upar se iss bus mein ek naya passenger bina ticket ke ghus gaya. Yeh passenger tha ek “BANDAR”.

Abb aapko Housefull ka woh qissa toh yaad hoga hi jis mein ek bandar Deepika ka phone lekar bhaag jaata hai aur Akshay uske peeche peeche chal deta hai usse phone cheen ne ke liye. Bus aisa hi ek scene hamein phir se Housefull series mein dekhne ko milega.

Toh iss bus mein hua yun ki yeh bandar bus mein ghus aaya, aur isne ek mahila ka pura purse le liya. Bus ke sabhi log chilaane lage jisse driver ka dhiyan unn par chala gaya. Achanak se bus ka accident hone wala hi tha jab driver ne steering sambhaal liya. Iske baad hua yeh ki yeh bandar bus se toh nikla, magar driver ke saamne hi jaakar beth gaya. Yaaniki abb driver ko saamne kuch dikh hi nahi raha tha kyun ki yeh bandar vision block kar kar baitha tha. Driver ne bahut koshish ki usse hatane ki. Kabhi muh banaya, toh kabhi paas mein pade dande se Daraya bhi. Magar hamare star kahan kisi se darne waale the. Issi wajah se lagatar 1 minute tak driver bina aage ka road dekh kar gaadi chala raha tha. Aise mein jaise hi bandar hata toh bus driver ne dekha ki bus bhidte bidhte reh gayi hai. Jaise hi bandar kud kar saamne wali car par baitha, toh driver ko ek dum se break lagane pade taaki bus uss car mein naa jaa bhidhe. Bandar aage ki car ki chatt par baitha, aur woh iss bus ke driver ko ghurne laga?

Kya kahani khatam?

Nahi. Yeh karne ke baad driver ko laga ki bus abb toh bandar chala hi gaya hai, magar woh toh hamare Khiladi kumar ke jaise wapas se side se kud kar agaya. Phir woh bus ke andar chalne laga tha, jab gaadi ruki aur kuch logon ne milkar iss bandar ke upar kapdha daal diya. Itne mein paas se Police ko bulaya gaya jo iss bandar ko lekar gayi.

Jaate jaate bandar iss driver ko aise dekh raha tha, jaise Akshay ka dushman usse dekhta hai. Housefull 5 mein bhi aisa dekhne ko mil sakta hai jis mein antt mein yeh bandar Akshay ko apni aankhone se hi warn karega ki “Beta mai phir se kisi na kisi part mein wapas zaroor aaunga.”

Iske baad complaint chali gayi, aur aas paas ke sabhi bandaron ko wahan se hatane ka faisla kiya gaya. UPSRTC walon ne bataya ki aisa bandaron ki activity badh gayi hai, toh inhein iss ilake se hatana zaroori hogaya hai.

-By Pratima Ratwani.