Ek film se na-jaane kitne logon ka ghar chalta hai. Aise me agar mehnat se ban rahi koi film, achaanak kisi controversial drama ki shikaar ho jaaye, toh uss film se joode unn cast aur crews ka kya hoga, kabhi socha hai? Jaahir si baat hai har controversy ki apni pros aur cons dono hoti hai. Agar koi film mazedaar controversies me phansti hai, toh logon me yahi baat anticipation jagaati hai. Wahi agar film kisi negative aspect ki shikaar ho jaaye, toh phir uss film ke doobte career ko shaayad hi koi bacha sakta hai.
Lekin ek baar Bollywood ke khiladi Akshay Kumar ne film ki reputation ko bachane me apna bada yogdaan diya tha. Isse naa sirf Akshay ki, balki unn saare logon ki mehnat bach gayi, jinhone apni mehnat Housefull-4 ko banane me lagaya tha.
Asal me Housefull-4 ki ek dancer ke saath, film ke set pe hi maujood dusre crew member ne badsaluki kar di. Film ki female dancer ke mutabik, Housefull-4 ke cast Mumbai ke Chitrakoot ground me shoot kar rahe the, jaha unhe 5 se 10 min ki tea break di gayi thi. Dancer bhi break ke kaaran ek jagah baithi thi. Kuch di der me film ka dusra dancer Amir bhi aakar dancer ke saath baith gaya. Iske turant baad film ke dance association ka member Pawan apne 4 aur doston ke saath aa gaya aur Amir ko ghaseetne laga. Pawan aur Amir me kaafi dino se jhagda tha, jiske baare me dancer bhi jaanti thi. Yahi kaaran raha ki dancer beech-bachaav karne lagi. Woh maamle ko aur bigaadna nahi chahti thi. Tabhi Pawan female dancer ko peeche se utha leta hai aur usse badsaluki karta hai. Dancer chillane lagti hai, jisse set pe maujood baaki star cast aa jaate hai. Maamla ko bigadta dekh, Pawan mauke se bhaag jaata hai.
Dancer ki cheekh sun, Akshay usse puchte hai “Kya hua tum chillayi kyun?” Akshay ke saath Riteish Deshmukh aur dusre stars bhi dancer se maamle ki jaankaari le rahe the. Pura maamla jaan’ne ke baad, Akshay ne dancer ko advise diya ki use police me iss baare me complaint file karwani chahiye. Dancer ke mutabik usne Akshay Kumar ke hi kehne pe apna rukh police starion tak kiya aur badmaash ke khilaaf complaint file karwayi.
Ajeeb baat yeh rahi ki yeh maamla tab limelight me aaya, jab kuch dino pehle hi Film ke director Sajid Khan aur actor Nana Patekar, “MeToo” campaign ke shikaar huye the. Film ki bigadti reputation ko dekh Akshay jinki Sajid se acchi dosti hai, unhone Sajid ko advise diya ki jabtak unpe se allegation hat nahi jaata, tabtak unhe iss film se door hi rehna chahiye. Naa chahte huye bhi Sajid ne Akshay ki baat maan li, jiske baad Farhad Samji ne film ke direction ka kaam sambhaala. Nana Patekar wahi film me “Raja Gama” aur “Papu” ka dual role nibha rahe the. Nana Patekar pe lage “MeToo” allegation ke baad unhe film se hata diya gaya, jiske baad unki jagah South ke star Rana Daggubati ne li. Akshay ne waise toh Sajid pe badhte aaropon ko dekh yeh keh diya tha, ki woh unke aur Nana Patekar ke saath aage kaam nahi karenge. Lekin maamle ke kuch dino baad hi Akshay ne media me yeh bhi kaha, ki woh Sajid ka maamla khatam hone ka wait kar rahe hai, jiske baad who aage Sajid ke saath jarur kaam karenge. Ab hum ise hypocrisy bole, dosti bole ya phir business kahe yeh toh ab humpe hai.
Khair, dusri jaruri baat film ke “Batuk Patel” urf Boman Irani ko lekar hai.
Jisne bhi Housefull ki abtak ki saari parts dekhi hai, use Housefull-4 me Boman Irani aur unki humor ki kami saaf dikhayi di hogi. Boman Irani bhale hi main kirdaar me naa ho, lekin woh film me jaan daal rahe the. Darshakon ke mann me ab yahi sawaal hai ki aakhir unke favorite “Batuk Patel” Housefull-5 me shaamil honge ya nahi. Iske alawa log yeh bhi jaan’na chahte hai ki aakhir kyun Boman Irani Housefull-4 se door the. Boman iss maamle me kehte hai “Housefull franchise se meri kaafi acchi yaadein joodi hai. film ke director, actor aur writer sabhi ke saath maine kaafi accha time spend kiya hai. Halanki meri upcoming film “Made in China” ki dates Housefull-4 se clash ho rahi thi aur kyunki mai dono filmon ka hissa nahi ban sakta ,issi kaaran mujhe Housefull-4 ko majbooran naa kehna pada.” Boman Irani se ab umeedein jatayi jaa rahi hai, ki woh ab Housefull-5 me jarur nazar aa sakte hai. Boman Irani ek baar phir darshakon ko apne sense of humor se hasane ko puri tarah se taiyaar hai. Asha yahi hai ki iss agaami film ke liye darshak bhi puri tarah se taiyaar honge.
Akshay kumar kaafi naye rang me rangne ko taiyaar hai. Unke paas kaafi nayi filmon ke collection maujood hai, jinke liye Bollywood ke khilaadi kaafi mehnat bhi kar rahe hai. Akshay ki pichli kuch filme box office pe clean bold ho gayi thi, jis kaaran Akshay apne uss special sixer ka wait kar rahe, jisse woh waapas form me aa sake.
Waise toh Akshay ne Housefull-4 ke liye bhi kaafi mehnat ki thi. Aisa lag raha tha jaise saari zimmedaari hi unpe aa gayi ho. Pehle director ka change hona, phir ussi case me film ke dusre actor ka phansna aur toh aur crew member ka bhi molestation ka shikaar hona. Iss film aur film se joode logon ki mehnat bachane ke liye hi Akshay ko kaafi paapad belna pada. Unhone pehle hi apne co-stars ko se diya tha, ki jab tak film naa release ho jaaye, kisi ko bhi Sajid ke case pe apni tippani nahi karni hai. Ajeeb baat rahi ki dusre stars ka toh pata nahi, lekin Akshay ne iss maamle me khud ko media ke saamne ghirte huye paaya aur unhone apni tippani bhi ki.
Kaafi mushkil bhare safar ke baad, jab film sach me theater me release hui, toh sabhi ke chehare khil uthe. Sab film ke acche performance se khush the. Accha hua ki wakt rehte Akshay ne Sajid ko film se kinaaara karne ko keh diya, warna unki maujoodgi yakinan film pe asar daal sakti thi.
Khair, yeh toh thi prequel se joodi baat, lekin yeh baat toh tai hai ki iss baar Farhad Samji, Housefull-5 ko kaafi naye tarike se laane waale hai. Farhad ki inn dino filme me bhi kaafi acchi jaa rahi hai. Unki filmon me darshakon ko woh majboot plot nazar aata hai, jiski woh har film me talaash karte hai. Issi kaaran Housefull-5 se hum sab high expectation jarur rakh sakte hai.
The End