Captain Jaydev Dangi ( Bobby Deol ) fatafat plan mein kuch changes karte hai, jiske baad Rashtriya Rifles ke soldiers in teeno gharo ke compound ko gher lete hai. Captain Dangi ki calculation ke hisaab se Adil Mir ( Mir Sarwar ) compound ki pichli deewar se hi bhaagne ki koshish karega, isliye vo apne saathi commandos ke sath compound ki pichli deewar par positions le lete hai. Captain Dangi aur unka 19-20 saal ka saathi paratooper Mukesh ( Vishal Jethwa ) pichli deewar se thoda dur ek ped ke peeche cover le lete hai. Captain Dangi ko ped ke peeche se compound ka ekdum clear view mil raha hota hai. Captain Dangi aur Mukesh apni TAR 21 rifle ko check karte hai or Suraj doobne ka intezar karne lagte hai. Udhar Rohtak mein baithi Ritu ( Lara Dutta ) baar baar Captain Dangi ko call mila rahi hoti hai, lekin Captain Dangi ka phone switch off jaa raha hota hai. Suraj doobte hi saare commandos Captain Dangi aur Mukesh ke peeche apni apni position le lete hai. Iss assault operation ko Captain Dangi aur Mukesh lead kar rahe hote hai. Captain Dangi ka ishaara milte hi Jammu & Kashmir Police ke Special Operation Group ke officers ghar ke darwaaje par knock karte hai. Kuch seconds ke baad ek aatanki ghabraate huye Ghar ke pichle darwaaje se bahar nikalta hai. Captain Dangi us aadmi se uski pehchaan batane or agar uske pass koi hathiyar hai to use neeche rakhne ke liye kehte hai. Lekin vo aatanki Captain Dangi ki baat nhi maanta hai, or apni AK 47 rifle se firing karte huye vahan se bhaagne ki koshish karta hai. Captain Dangi firing se bachne ke liye fir se ped ke peeche cover le lete hai. Iske baad Captain Dangi aur Mukesh dono apni rifle se aatanki ke upar counter fire karte hai, jisse vo aatanki vahi par dher ho jaata hai.
Kareeb 30 seconds ke silence ke baad doosre Ghar se do aatankwadi bahar nikalte hai, or apni automatic rifle se Captain Dangi aur unki team ke upar firing karne lagte hai. Captain Dangi aur Mukesh ne jis ped ke peeche cover liya hua tha vo jyada bada nhi tha, isi baat ka faayda uthakar vo dono aatanki Captain Dangi aur Mukesh ke upar tabadtod firing karte huye unki taraf badhna shuru kar dete hai. Captain Dangi ko unki thigh mein kuch mehsoos hota hai, jab vo check karte hai to unhe pta chalta hai ki unhe thigh mein ek goli lagi chuki hai. Captain Dangi apne thigh ke wound dekh hi rahe hote hai, tabhi ek goli aakar unke pet mein lagti hai. Jab Captain Dangi apni chot ko check karte huye Mukesh ki taraf dekhte hai, toh unhe pta chalta hai ki Mukesh ke pet mein bhi ek goli lag chuki hai. Mukesh ko army join kiye huye abhi ek saal bhi nhi hua tha, or aaj use pehli baar goli lagi hoti hai. Captain Dangi ache se jaante the ki eisi haalat mein koi bhi aadmi ghabra jaayega, isliye vo Mukesh ko apni dono bullet wound dikhaate huye kehte hai ki,” dekh yahan to do do goliya lagi hai, tujhe to fir bhi ek hi goli lagi hai. Tu tension mat le, tujhe kuch nhi hoga. ek Indian Commando ko maarne ke liye ek goli kaafi nhi hai, or vaise bhi ab ye operation jyada der tak nhi chalega”.
Itna kehte huye jhakhmi Captain Dangi apni Tar 21 rifle ko reload karte hai, or firing karte huye aatankwadiyon ki taraf badhne lagte hai. Captain Dangi ki ek goli seedhe ek aatanki ke sir mein lagti hai aur vo vahi par dher ho jaata hai. Jaise hi vo aatanki dher hota hai, doosre aatankwadi ki goli seedhe aakar Captain Dangi ki rifle mein lagti hai jisse vo damage ho jaati hai. Captain Dangi jaise hi Mukesh ki rifle uthaane ke liye peeche jaate hai, doosra aatanki canal ki taraf bhaagne lagta hai. Ye doosra aatanki lambi ghaas mein letkar pet ke bal neher ki taraf badhne lagta hai. Captain Dangi Mukesh ki rifle lekar ghaas mein chupe aatanki ki taraf badh hi rahe hote hai, tabhi ek goli Captain Dangi ke gaal ko chookar nikalti hai. Lekin iss goli se us aatanki ki location pta chal jaati hai aur Captain Dangi usi direction mein kai goliyan fire karte huye us aatanki ke paas jaakar khade ho jaate hai. Captain Dangi neeche jhuk kar uss aatanki ke chehre ko dekhte hai, toh unhe yakeen ho jaata hai ki ye Adil Ahmed Mir hai. Iske baad Captain Jaydev Dangi aur Mukesh ko helicopter ki madad se Srinagar ke 92 base hospital le jaaya jaata hai, jahan in dono ki jaan Bach jaati hai. Iske baad Captain Jaydev Dangi ko unke adamya saahas or asadharan veerta ke liye Kirti Chakra se sammanit kiya jaata hai.
( The End )
