India ke Uttar Pradesh mein kab kya hojaaye kisi ko nahi pata. Kabhi toh log Taj Mahal ko dekhne aate hain, toh kabhi raaste par ho rahe tamashe ko. Aise hi ek din Uttar Pradeh ke Sitapura naam ki jagah hui paison ki baarish!
Hua yun ki Sitapura ke ek Vikas Bhawan Registry Office ke saamne ek budhe se uncle ek bag mein 4 lakh rupay lekar jaa rahe the. Unhein ek consignment ka payment mila tha, aur woh isse bank mein jama karne lekar jaa rahe the. Monday ki subah thi, aur unhone sabse pehle yahi kaam karna sahi samjha.
Abb uss bank ka raasta iss Registry office ke paas se nikalta tha. Iss raaste par kaafi pedh the, jis pedh par bahut saare bandar bhi rehte the. Bus phir kya hona tha, aisa hi ek shaitan bandar iss budhhe aadmi ke haath se yeh paison ka bag cheen kar bhaag gaya. Budhe uncle abb itne tandrust toh the nahi ki bandar ko paakdh lein, toh bus bandar ne Monday ki subah yeh circus road par dikhaya!
Phir kya hua?
Budhe uncle ko laga ki thodi der mein bandar bore hojaayega aur bag woh neeche gira dega. Magar yeh bandar shaatir nikla. Usne chalaki se bag ki chain khol li. Chain kholte hi usne noton ko udhana start kardiya. Bag mein 500 aur 2000 ke note the, jo bandar abb shaan se udha raha tha. Sunne mein scene ajeeb lagta hai, magar yeh bandar hero nikla. Usne nayi nayi kar 20,00 se 30,000 tak udha diye. Itne mein public bhi pagal toh hai nahi. Turant hi aas paas ke log aakar paise utha utha kar bhaagne lage. Budhe uncle ko samjh hi nahi aya ki yeh kya ho raha hai. Bandar bus paise nikaal nikaal kar phenke jaa raha tha. Uncle ne kayin baar uski punch pakdhne ki koshish ki magar bandar harr baar bach raha tha.
Bandar ko dekh kar aisa lag raha tha maano ki woh show enjoy kar raha ho. Yeh sabse nautanki bandar tha jo uss jagah ke logon ne bataya tha. Baad mein watchman ne kela dekar bag chudwaya. Tab tak uncle ke 35,000 jaa chuke the.
Watchman ne bataya ki yeh bandar hamesha se hi shaitaan raha hai. Kabhi cap toh kabhi goggles bhi chura leta hai logon ke!
Toh bus aisa hi ek bandar hamein Housefull mein dekhne ko mila tha jisne Akshay ko thappad mara tha. Isi liye iss baar yeh paison ka laalchi bandar ek baar phir Housefull 5 mein cameo mein dikh sakta hai. Tyaar hojaayiye iss paise ki baarish ko dekhne ke liye.
Description
A notorious monkey in UP snatched a bag that had 4 lakh rupees in it. He was enjoying giving the show to the locals.
-By Pratima Ratwani.
