Sukha Kahlon Ka janam 21 June 1987 me Kapurthala, Punjab me hua tha. Sukha ko sharp shooter hone ke liye jaana jaata hai. Kaha jaata hai woh humesha hi dusron ko shooting sikhaane ke liye bhi taiyaar rehta tha. Sukha peshe se shooter, sniper aur contract murderer tha. Sukha ki zindagi pe “Shooter” naam ki ek film bhi bani hai, jisne kaafi controversies ka saamna kiya tha. Yeh film itna bada mudda ban gaya, ki Punjab ke CM ko ise antt me ban karna pada tha. Sukha pe saal 2000 se 2015 ke beech gangster act ke alawa 60 se jyada khatarnaak jurmon ke cases darj huye the. Sukha Kahlon Punjab ka sabse kam umar ka gangster tha, lekin uska aatank kaafi bada tha. Sukha naa sirf Punjab me balki Haryana, Rajasthan, West Bengal aur Delhi me bhi apna racket chalata tha. Sukha ki criminal career 15 saal tak chali, jisme uspe kayi saare aarop bhi lage. Sukha ka poora naam Sukhvinder Singh Kahlon tha, jise Punjab ka sabse famous sharp shooter kaha jaata tha. Sukha ke maata-pita chahte the ki uska beta acche se padh le taaki phir uski aage ki padhai ke liye, woh Sukha ko America bhej sake, lekin shaayad Sukha ki destiny kuch aur hi thi. Sukha ke pita kaafi dino se America me reh kar kaam kar rahe the aur woh chahte the ki unka beta bhi wahi aakar apni aagi ki zindagi sambhaale, lekin yeh baat toh Sukha ke maata-pita ko bhi nahi pata chali, ki aakhir kab unka beta apraadh ki duniya me chala gaya. Pariwaar ke logon ko iss baat ki khabar bhi nahi thi aur Sukha chote-mote jaghdon se lekar crime bhi karne lag gaya tha. Jab Sukha sirf 17 saal ka tha tab uspe pehla criminal case darj hua tha. Jab Sukhvinder ke pita ko yeh baat pata chali, toh unka apne bete ko lekar dekha hua sapna pal bhar me toot gaya. Issi ke baad Sukhvinder ke pita use uski mausi ke ghar chod kar, khud pariwaar ke saath America chale gaye. Pariwaar ke jaane baad Sukhvinder apne ilaake ke badmaashon ke contact me aa gaya. Issi ke kuch hi saalon ke baad Sukhvinder ne Punjab se lekar Rajasthan tak apraadhon ko anjaam diya. Saal 2005 se 2006 ke beech Sukhvinder ke khilaaf kareeb 1 dozen se bhi jyada murders ke cases file huye the. Yeh wahi daur tha jab Sukhvinder, Sukha naam se jaana jaane laga. Sukha ne dekhte hi dekhte apna khud ka ek gang form Kar liya aur lagataar apraadh ko anjaam deta chala gaya. Sukha ne 2008 me apni ek dost se shaadi kar li. Shaadi ke kuch dino ke andar hi Sukha kayi saare aaropon se ghir gaya, jiske baad Sukha Australia chala gaya. Halanki Sukha ko videsh kuch khaas pasand nahi aaya, jis wajah se woh waapas desh laut aaya. Waapas laut’te hi Sukha ne 2010 me Jalandhar ke speed fund academy ke coach aur gangster Lovely Baba ki hatya kar di. Jaankaari ke mutaabik gangster Lovely Baba Sukha kahlon ka dost tha, par usne Lovely ki hatya kyun ki, yeh baat saaf nahi ho paayi hai. Lovely ki hatya ke baad Sukha ko jail bhej diya gaya. Jail jaane ke baad Sukha ki personal life bhi disturbed rehne lagi, jiske baad woh saal 2014 me apni wife se alag ho gaya. Lovely Baba ki maut se gusaaye uske dost Vicky aur Prem lahoria ne Sukha ko maarne ka plan banaya. Vicky aur Prem ek wakt pe Sukha aur Lovely ke dost hua karte the, jinke saath milkar woh loot ko anjaam dete the. Saal 2015 me jab Sukha ko Jalandhar court me peshi ke liye le jaaya jaa raha tha, tabhi Vicky aur Prem ne Sukha ki gaadi pe goli chalaani shuru kar di, jisse Sukha ki maut ho gayi.
Sukha ne apne criminal career me loot, murder, vasooli, hatya ki saajhish jaise kayi apraadh kiye the, lekin uske khilaaf kabhi koi gawaahi dene nahi aata tha. Sukha ka early 2000s me kaafi khauf tha, jiska 2015 me jaakar antt hua.
Toh yeh thi Punjabi gangster Sukha ki kahani. Ho sakta hai KGF-3 me iss baar North Indian gangster, South ke Kolar ko apna nishaana banaye aur Rocky ko apne raaste se hata kar saara sona kabza karne ka plan banaye.
The End