Bajrangi Bhaijaan ki Munni ki hi tarah Geeta naam ki ek ladki ki bhi aisi kahani hai, jo 14 saal pehle apne maata-pita se bichad kar Pakistan pahuch gayi thi. Geeta ko humare desh ki purv foreign minister Sushma Swaraj ne, waapas uske maata-pita se milwaane ka kaam kiya tha. Jiske baad Ameristar ke rehne waale ek couple ne khud ko Geeta ka parents bataya tha. Geeta kuch bol ya sunn nahi sakti. Wahi uske maata-pita bhi bol ya sunn nahi sakte hai. Geeta ke maata-pita kaafi gareeb hai, jo bheekh maangne ka kaam karte hai. Halanki ajeeb baat yeh thi ki Geeta ne Amritsar ke rehne waale iss couple ko apna maata-pita maan’ne se inkaar kar diya tha. Geeta ke mutaabik woh log uske asli maa-baap nahi the.
Wahi Amritsar ke rehne waale yeh couple apne 14 saal ke bete ke sahaare baat karne ki koshish karte hai. Woh khud ko Geeta ka asli maata-pita batate hai. couple ke mutaabik Geeta ka asli naam Pooja hai.
Couple ka kehna hai ki unka naam Rajesh aur Ram Dulari hai, jo aaj se thik 20 saal pehle naukri ki talaash me apne pariwaar ke saath Bihar se Punjab shift ho gaye the, jis beech hi Geeta unse bichad gayi thi.
Geeta philhaal 2015 me 23 saal ki thi, yeh puri kahani bhi ussi wakt ki hai. Kuch logon ka kehna hai ki jis train me Geeta ka pariwaar Bihar se Punjab jaa raha tha, woh Bharat se Pakistan ki yor jaane waala train tha. Shaayad ussi beech jaha Geeta ka pariwaar Punjab me utra, wahi Geeta galti se Pakistan aa gayi thi. Lekin iss baat pe abhi tak uske maata-pita ne koi tippani nahi ki hai. Jab se Geeta Pakistan pahuchi hai, tab se hi woh apne pariwaar se milne ko betaab hai, par kyunki Geeta kuch bol aur sun nahi sakti hai, issi kaaran use apne pariwaar ko doondhne me kaafi dikaat hui. Jaankaari ke mutaabik saal 2002 me Geeta Lahore ke railway station pe bina kisi identification paper ke confused aur akele mili. Geeta ko “Edhi foundation”(एधी) ne apne paas rakh liya. Asal me Edhi Foundation Pakistan ke Karachi me based hai, aur yeh Pakistan ka sabse bada charity hai. Geeta ko foundation ki taraf se Lahore se Karachi laya gaya, jiske baad use ek rehne ke liye chota sa ghar diya gaya, jisme ek mandir bhi tha. Geeta Karachi me kareeb 1 decade tak rahi thi. Pakistan ke rehne waale Abdul Edhi aur unki wife Bilquis(बिलकिस) ne Geeta ki dekhbhaal karne me apni ruchi dikhayi. Yeh wahi log the jinhone Pooja ko Geeta naam diya tha. Waise toh Bilquis jo Geeta ko apni beti jaisa maanti thi, woh uski shaadi, Pakistan ke hi kisi Hindu ladke se karana chahti thi, lekin wahi Geeta tab bhi apne pariwaar se milne ki aasha banaye huye thi. Geeta ne ek baar apne pariwaar ka number bhi likhne ki koshish ki thi, lekin woh adhuri thi. Iske alawa Pakistan ka koi bhi insaan Geeta ki handwriting samjh hi nahi paa raha tha. Geeta akele me roti thi, lekin woh mazboor thi.
Use jab India ka map dikhaya gaya, toh use turant pehchane gayi. Geeta baar-baar Jharkhand aur phir Telangana ki yor ishaara karti thi. Aisa lagta tha, jaise woh Edhi Foundation ke logon ko kuch batane ki koshish kar rahi thi. Issi beech Salman khan ki film Bajrangi Bhaijaan release ho gayi, jise Edhi Foundation ne mauke ki tarah dekha aur usne Geeta ki kahani ko sahi logon tak pahuchaane ki koshish ki. Pawan Putra ki baat kare, toh ho sakta hai iss baar film me ek aur ladki galti se seema paar chali jaaye, bus iss baar fark yahi hoga ki woh galti se India se Pakistan chali jaayegi. Wahi uss ladki ke pariwaar ka use doondhte-doondhte bura haal ho jaata hai, phir unhe Bajrangi bhaijaan ke baare me pata chalta hai, jisne kuch saalon pehle Munni naam ki ek ladki ko, uske pariwaar se dobaara milwaya tha. Yeh pata lagte hi uss ladki ka pariwaar bhi seedhe Bajrangi ke paas madad ke liye pahuch jaata hai.
Geeta ki kahani pe waapas laute, toh Edhi Foundation ne Geeta ki kahani ko, kisi tarah social media ke sahaare India tak pahuchane ki koshish ki, jiske baad khud Shushma Swaraj ne use waapas uske pariwaar se milwane ka waada kiya. Jald hi Geeta Bharat Sarkaar dwara desh laut aayi, jaha pe use unn logon se milwaya gaya, jo shaayad khud ko Geeta ke maata-pita keh rahe the. Issi beech Geeta Prime Minister Narendra Modi se bhi mili, jiske baad use waapas uske pariwaar tak pahuchaane ki baat sarkaar ne Geeta se ki. Kayi koshishon ke baad Rajesh Kumar aur Ram Dulari naam ke Amritsar ke wahi couple ne bataya, ki unki beti 4 saal ki umar me unse bichad gayi thi. Geeta ne jab unhe saamne se dekha, tab usne sign language me baat kar bataya ki Rajesh aur Ram Dulari hi uske asli maata-pita hai. Iske alawa Geeta ki shakal bhi uski maa se kaafi match kar rahi thi. Asal me shuruat me Geeta Rajesh aur Ram Dulari ko TV pe dekhne par issiliye nahi pehchaan rahi thi, kyunki Geeta ka kehna tha ki uske parents Jharkhand se hai, naaki Bihar se aur uski maa saari pehanti hai, Ram Dulari ki tarah Punjabi salwar suit nahi, lekin Geeta yeh bhool gayi Punjab me shift hone ke baad uske maata-pita ka pehnawa bhi badal gaya tha.
Rajesh aur Ram Dulari ne bataya ki Pooja yaani ki Geeta railway station pe bheekh maangti thi, ho sakta hai ussi wakt Geeta galti se Punjab ke Attari boarder ke raaste se Pakistan jaane waali “Peace Train” pe baith kar, Pakistan pahuch gayi hogi. Jaankaari lene aur data’s match karne ke baad, yahi pata chala ki Geeta yaani ki Pooja sach me Rajesh aur Ram Dulari ki asli beti hai. Issi ke saath Edhi Foundation aur Sushma Swaraj ke kaaran Geeta waapas apne pariwaar se mil paayi.
Pawan Putra me bhi jab ek ladki Bharat se galti se Pakistan chali jaati hai, toh uski madad ke liye Sushma Swaraj ki hi tarah ek minister saamne aati hai, jo uss ladki ko har madad karne ko taiyaar hoti hai. Wahi Bajrangi bhi Munni ke baad, ek aur ladki ko uske pariwaar se milwane ko ab phir taiyaar hai.
The End